寵

話說剛過既週末, 舉家返左廣州, 因為爺爺生日...
再話說, 有隻小豬走左去玩人地既私家波波池, 玩到點都唔肯走, 抱走佢時喊到LEI... 最後人地送左2隻波波俾佢拎住, 都仲係喊緊...
再然後, 星期一晚, 屋企就多左舊野...

外加250隻波波(相內既波波大概係一百個多小小啦~)


有個人一路抱走隻小豬, 一路說佢失禮人... 但轉個頭就買左一大堆波來孝敬個囡...
除左個"寵", 仲可以有邊個字來形容呀... 希望遲D 唔好變成"寵壞"啦~


當然啦, 貓貓都有D想買個波波池俾小豬架, 因為係街玩, 好似唔多乾淨 (雖然係屋企都只係好DD...), 所以冇阻止LEI個廿四孝爸B~

初次沙灘遊

其實已經係好耐之前既事, 仲前過爸爸的牛一
果次, 會所既泳池收左檔(因為有人高空掉左D大頭釘落泳池, 超冇品...) 天氣又可以, 唔算太熱, 所以臨時臨急決定去個沙灘
去之前打定輸數 (因為小豬上次係銀河人造沙灘時, 唔多LIKE),不過都係試下先

首先去左銀線灣踩場... 好少人呀, 但係D沙都好粗下, 好彩既係, 小豬唔係好抗拒...

之後去左清水灣2灘, 多好多人, 好彩都搵到地方坐, 一坐低就開始玩沙...
都算肯玩, 雖然全程唔笑... 

之後就落海啦~~~ D水有小小凍
瑤瑤豬又唔驚喎, 反而係貓貓有D驚 (因為貓貓唔識游水...)
小豬好ENJOY咁跟住D浪wo來wo 去 (即係一有浪湧過來, 小豬就會跟住一齊wo woo 咁叫), wo 左半個鐘左右, 就上水啦~

上水後, 玩活埋小豬同沙中求生 (即係熊貓用沙堆係小豬身上, 而小豬就係拔走D沙...) 玩得好開心, 不過小豬都係冇笑架
不過, 貓貓覺得小豬應該幾鐘意沙, 仲放左啖沙落口, 慢慢品嘗

影返張相之後, 就走啦~
一個人抱住小豬係淋浴室沖身真係幾係野, 公眾既浴室始終唔乾淨, 完全不敢將小豬放低... LEI個係唯一辛苦既地方

回程經過布袋澳, 又入左去行下, 冇野睇...
再前D有間fusion 超市, 好多平時買唔到既鬼佬野買, 熊貓好開心咁行行行, 而小豬就一早去左搵周公玩lu, 一玩玩左3個鐘..

今次初體驗都算成功...不過返到屋企就有排搞, 搞到成屋都係沙希望今年夏天可以去多次沙灘啦~~~

爸爸牛一

星期日, 爸爸正日生日, 提早食左生日飯, 正日留返去海洋公園。生日當日 可以免費入場呀, 再加上瑤瑤豬未夠3歲, 又係免費, 所以只係俾貓貓一個人既$$ 就可以一家三口去玩啦~

等買飛既時候, 小豬自己好開心咁四圍走, 所以只可以影到個大露背, 正面完全影唔到

幾年冇去海洋公園, 唔同晒啦~ 好似去左個新既主題公園咁...
當日係星期日, 又熱又多人... 唯有見到咩野唔駛點排隊就去左先啦~
第一站, 熊貓館, 可惜安安佳佳都係房, 冇出來, 所以冇野睇...

第二站, 四川奇珍館
原來都有熊貓睇喎, 不過唔知瑤瑤豬知唔知佢睇緊咩野LEI?

除左熊貓後, 仲有小熊貓同娃娃魚呀, 不過, 似乎小豬都係對熊貓稍稍有興趣 (咁又係既, 佢係熊貓囡ma~)
出左奇珍館, 隔離就係金魚館。以前冇野睇既金魚館, 依家整得好靚下喎, 但係唔識欣賞既瑤瑤豬飛咁快咁行過左個館lu~

路徑威威天地, 發現原來係兒童王國 (o... 以前行都唔會行入去既地方, 依家成為左一大重點...)

首先排隊搭小火車... 小豬好開心...坐定定四圍望...

然後係旋轉木馬... 一開始坐上木馬時, 小豬竟然驚喎, 驚到喊 不過開始轉既時候, 小豬就開始笑啦~ 仲跟住木馬一上一落咁係度大叫...佢一定以為自己去左沖浪, 陪坐既貓貓覺得, 轉左好多圈, 有D暈...

摩天輪... 小豬又係唔知發生咩野事, 不過, 第一次點都要影張相...

以上所有既機動遊戲, 都係BB mini版, 其他既機動遊戲, 小豬全部都未玩得...

然後就坐吊車上山啦... (好彩唔係排好耐隊, 小豬都肯合作坐係BB車上...

上左山之後, 係露天茶座度食左個late lunch。 當日既天氣都係幾唔錯, 好好陽光但又好通爽, 係冇冷氣既茶座度一D都唔覺得熱。
食完野, 換左片片, 順手換埋衫, 小豬就開始扭眼瞓啦~ 奶咀一出, 唔駛5分鐘就去左搵周公啦~

熊貓唯有推住小豬繼續行,行左水母館, 南極館, 北極館...水母館依然好靚, 不過真係好多大陸人... 一係擋住條路係咁影相, 一係以為前面有金執, 係咁向前逼...
而貓貓最鐘意既係有企鵝睇既南極館 (幾想叫醒小豬一齊睇...) 除左D企鵝真係好好好得意外, 成個館既設計都好好, 最鐘意係地下既透明玻璃, 可以見到D企鵝游過。不過南北極館都好凍呀, 貓貓將帶去既所有衫都放係小豬既身上, 希望唔會冷親啦~

路經動感天地, 哇... 所有機動遊戲都唔同晒, 好吸引呀... 不過冇得玩 算啦, 本來就預左係咁....

行行企企就差唔多五點啦, 諗住搭海洋列車落山... 哇..... D人多到LEI.... 以為要排成個鐘啦, 點知BB車可以行特別通道, skip晒所有人, 有車來就可以上得車啦~超爽 落左山去埋海洋奇觀就完成啦~ 不過LEI個海洋奇觀反而係最失望既一個館, 以前分左3層既大魚缸細左好好好多呀, 可能都想學其他地方既水族館咁, 有個一抬頭就可以見到魔鬼魚個笑樣既地方掛... 不過真係冇以前咁好睇啦, 覺得好細, 好冇特色... 以前果個真係好好多.................................

當熊貓準備走既時候, 小豬瞓醒啦~~~ well , 我地都冇理由再行一次架, 唯有下次請早啦~~~

當日真係天公造美, 全日都好好天 (好熱), 然後, 係我地離開海洋公園唔夠半個鐘就開始落雨, 到差唔多返到屋企時, 大雨大到睇唔到路啦... 熊熊一路開車, 一路話"個天真係好俾面你喎... "

就咁樣愉快既爸爸牛一就好愉快咁過左啦 (由於有人又大左一歲, 玩完半日海洋公園後, 攰到牙痛咁既聲呀...)

生日快樂呀, 老公, 希望你日日都好開心, 老婆越來越靚, 個囡越來越精靈活潑可愛啦~