生日快樂~~~ (又遲左)

女人過左3字頭, 開始冇咁想慶祝生日lu... 生埋隻小豬後, 就更加知道生日唔會有咩野驚喜啦~ 不過又冇所謂既, 個人大個左 (當然啦, 又老左一歲ma ~) 生日願望已經唔會再好似以前咁天花龍鳳, 依家只希望一家人平安, 健康, 開心~~ (真係老啦~)

第一餐生日飯係娘家的, 係我至愛既大閘蟹, 由於太愛, 所以唔記得影相呀~~~ 不過大閘蟹真係好好味呀~~~

第二餐去左坑口村食泰國野... lei 間係飯堂, 通常出街食又諗唔到食咩野, 就會來lei 間, 平靚正... 由於湊住小豬, 又係冇影相 :P

今年唯一既生日蛋糕, 東海堂既芝士蛋糕, 好好味呀~~~ (一個人KO左四分一個, 好飽)

正日生日飯, 熊貓走左去撐枱腳, 冇帶小豬呀~~~ 所以有影相... XD

鮑魚, 龍蝦, 鵝肝, 和牛全部都好好味, 左下角炸魚仔係餐廳送俾我地送酒, 超香口, 正

哈哈, 有翻版熊 加翻版貓, 同翻版小豬 (我地只要求左隻翻版小豬呀, 熊同貓係隔離枱要求架), 咁啱可以變成熊貓囡, 當然要影多張相留念啦~

Lei 餐食得好開心~~~

不過我最期待既, 都係今手既生日禮物, 迪士尼二日一夜之旅呀~~~ 第二日就出發, yeah~~~

19個月

yeah~ 終於唔駛寫面試啦~~~

19個月啦...  開始越來越唔重視lu ... :P  星期日起身餵緊字母粉既時候先記起呀~~~ (LEI 排忙呀ma.. :P)
約82cm / 約25磅 (繼續平穩而龜速向上發展... 唯有講好過冇啦~)

食野方面, 同上個月差唔多, 飲奶KEEP住一日10安左右。聽左健康院的意見, 冇再加奶俾瑤瑤豬啦, 佢又冇要求飲多D, 但每晚見到枝奶就會好自動波咁入房等你抱佢上床。
固體食物, 基本上咩野都俾小豬試下, 特別鐘意食菜,可以食一碗菜, 但唔食飯LOR...  99 投訴話佢粥又唔食, 飯又唔食, 粉又唔食, 一味只係食菜 (嗯... 鐘意食菜係好, 不過應該食下其他野先夠營養喎)一日食2-4餐不等, 視乎邊個湊佢啦... 99湊既話, 會有源源不絕既野食, 所以唔知應該計幾多餐。 星期日自己湊既時候, 小豬通常會同我地一齊瞓到10點幾, 之後skip左早餐, 直接食晏啦~~

瞓覺方面, 月中幫小豬戒左奶咀,所以相對瞓覺既時間短左lu... 朝早差唔多9點起身, 日頭nap 2個鐘左右, 夜晚要到11點先捨得瞓。之前有試過向前調整左半個鐘, 不過由於戒左奶咀, 陪瞓既時間又長返啦~ 希望遲D可以早D瞓啦~如果唔係, 會越來越矮架...

Poo Poo 方面, 1-2日一次啦, 其實應該每日起碼一次, 唔知點解LEI輪又差左小小。唔通真係要狂食橙? 戒片行動0進展, 小豬係自己屋企時間太短啦, 又冇得強逼99幫小豬做potty training, 相信係來緊果幾個月依然會係0進展。目標係入PN前可以完成到啦~

講野方面, 都係冇咩野進展...雖然跟人口水尾既詞語多左好多, 但就好少會自己主動講, 連之前會自動講既"謝謝" LEI輪又少返啦~ 答問題要提水, 例如:
我拎住星星餅, 要佢講謝謝先, 佢會呆左, 然後...
我: 係唔係謝...
小豬: 謝謝
我: 謝謝邊個呀?
小豬: .......... (呆)
我: 係唔係謝謝媽...
小豬: 媽媽
我: 咁LEI樣係咩野呀 (指住星星餅)
小豬: ........... (呆 + 唔耐煩)
我: 係唔係餅...
小豬: 餅餅
我: 咁你叫咩野名呀...
小豬: ....... (伸手去拎餅....)
我: 係咪瑤...
小豬:瑤瑤
於是者, loops 幾次就有得食啦, 但loop左幾次都依然係要人提...

動作方面,
唔知點解地, LEI輪扭人抱, 唔肯自己行。 自己行左唔夠幾分鐘就要人抱... 其實自己行又已經行得好穩架啦~
拍手可以跟住D音一下一下拍
爬高爬低地越來越叻, 成隻猴子咁
開始識得揀人來蝦...  係99度成日都扭計唔肯著食飯衫, 但係自己屋企一次都冇試過; 係99度 (特別係62睇住佢時) 成日都扭計扭到瞓係地下, 係自己屋企又係好少; 公公帶小豬去洗手, 通常洗成20分鐘都唔肯走, 婆婆帶洗手, 1分鐘就洗完啦~...
開始自己會揀鞋揀衫著, 唔鐘意果間就係咁nono...

去公園玩, 唔駛帶BB車啦~ 點知隻衰豬係咁要我抱。結果, 唯有唔俾佢碰到我, 我係前面走, 小豬就係後面一邊喊一邊追住我, 就咁樣佢自己行完成條路, 到屋企lu.... XD

lei 輪朝早都好遲先醒, 可能夜晚太夜瞓, 定係依家開始凍? 今朝抱佢坐起身, 都仲係瞓緊覺咁既樣, 好搞笑... XD

下個月就係2字頭啦~  希望你會有多D既進步啦~  不過最緊要都係做隻健健康康同開開心心既小豬~ ^3^

面試... take 6

係呀, 又面試呀... 不過寫埋LEI篇, 11月既面試就完成啦~ (真係要歡呼...)

面試Look, 幾勁, 影左N張相, 都冇張望影頭...=.="

lei 個面試勁LOR, 瑤瑤豬返既PG 10點班, 共8個人, 有7個請左假, 之後果堂直接cancelled...

爺爺車我地去面試, 所以時間上早左好多, 要排隊, 仲要同上一組既人一齊排, 結果, 小豬見其他人有得入去, 有得用消毒液洗手, 佢冇 (lei 個係重點... 小豬勁鐘意洗手...) 於是係咁逃跑要入去, 結果俾門口既老師同校工笑呀~~ XD

等左差唔多半個鐘, 於是同後面個妹妹/ 姐姐玩下... 個小朋友勁呀... 除左主動同我地講, "叔叔早晨, 姨姨早晨", 仲指住小豬背包上既龜公仔講"龜呀..." 哇... 即刻覺得阿囡大件事...

入到去, 已經係面見證上分好組, 按組又再排左隊, 又等多陣... 

一個家長去見校長, 一個家長帶埋個B去見老師, 最後由我去見校長, 熊熊帶小豬去interview...

見校長果part, 校長當然有出現, 不過所謂既見校長都只係作文, 2條問題, 1張A4紙, 感覺有D似以前考試寫essay.. 問題係點解揀明慧, 同埋, 如果小朋友碰撞, 學校同老師點處理... 正常問題, 不過事前冇準備, 所以係咁E 寫左大半版紙就交貨 (有D家長好認真,走既時候, 見到有媽媽帶埋小朋友上來搵老公, 因為佢地已經等左半個鐘, 但老公仲未落來... 老師話, 應該係你老公好認真咁寫咁文呀...)

另一方面, 熊熊同瑤瑤豬就開始被帶到去分組跳舞。熊熊話, 小豬有D被嚇親, 未完就一首歌就逃走左去爸B度lu...=.=" 然後就帶入房gp interview, 同公仔shake hands (識), 要求指公仔係咀 (唔識, 一出門口就識啦... =.=") 俾紅色既XX俾爸爸  (識), 分大車仔俾MISS (唔識, 從來都冇教過大細), 最後係砌生果puzzle (係爸B既幫助下, 勉強完成, 不過. 熊熊話同枱既另外2個小朋友9秒9 就完成左...)

Lei間, 我覺得幾commercial, selling point 係3文4語 (有埋日文呀...)不過, 我就正正唔太buy 個selling point, 覺得好似有D多... 從講座到面試, 個校長都親自上陣, 諗返都幾好, at least 覺得個校長幾有誠意同家長溝通, 有D幼稚園到走都唔知校長個樣係點 (都可能係我做唔夠功課, 見到但唔認得 :P), 不過校長講野就不斷挑起家長間既競爭意識, 說各家長都係競爭對手, 所以叫大家要對外保密 =.=" (我覺得又多左), overall 來講, 我覺得間學校一般, 不過我朋友就勁鐘意 (再次證明各花入各眼....) 都係果句, 收左先算啦~~~

---

面試結果更新...

take 3 同 take 4 都出左結果啦... 結果係跌晒眼鏡...

其實2間都in 得唔太好, 可以用10問8唔應來總結, 所以預左唔收, 不過相對來說, 朗思會好小小。上星期五收到朗思既result, 係唔收架, 連waiting 都冇, 雖然係意料中事, 不過點都會有小小唔開心, 因為朗思都唔得既話, 迦南就更加冇可能得啦~

今朝收到迦南既result, 竟然收左小豬讀pm 班喎... lei 個係我認為in 得最差既interview, 竟然有offer 喎, 諗來諗去應該歸功於我嘔心瀝血既果份問卷 (有睇晒間學校既website, 再用左30分鐘完成架, 認真過prepare 見工interview) XD... 雖然PM班唔係我心水, 不過都叫有人要啦~

估唔到成19個月仲係一舊飯既瑤瑤豬既hit rate 都有50% (暫時, 因為之後果D係越來越多人報, 又越來越難既interview).... 希望有多個幾月, 瑤瑤豬會突然有好大既進步, 可以keep 住 lei 個 hit rate 啦~~  (妄想中... XD)

又面試... Take 5

又寫面試... 係呀, 應該仲要寫多7篇... 希望有恒心俾瑤瑤豬 or 自己一個PN班完整既記錄啦~ XD

上個星期六去左英藝, lei間幼稚園幾特別...
- 唯一一個唔收報名費 (雖然只係$30, 不過佢唔收, 即刻特別左)
- 唯一一個, 面試前打俾我, 提我第二日要去interview (雖然一定記得, 而且佢咁做, 仲有一刻以為係因為唔太多人報名... 結果當然係太天真了, 所以又特別左)
- 信上寫話, 如果安排既時間去唔到, 可以打俾校長改時間... (又幾好喎, 其他學校都寫明唔可以改時間)
- 嗯... 前排有個K3學生, 戴住個黑色口套, 俾罰企, 咪係LEI間既分校lor...  (又特別左... 要減分...)

 interview 時間係下晝2點, 真係一個好差既時段, 因為係瑤瑤豬午睡時間。去緊interview 既時候, 小豬對眼已經"得"晒落來啦~  唯有俾野佢食, 不斷同佢玩, 一到學校就即刻俾佢落地企, 再同佢玩, 再俾野佢食.... 好彩都冇瞓著, 入到學校見到有野玩仲即刻精神晒...

早左3個字去到, 要係門外排隊, 有D曬, 不過瑤瑤豬專心搵野食, 所以都冇扭計

差唔多2點先入得去, 又去左sir滑梯度... 坐... =.="

坐左係樓梯上, 阻住人... 學校放緊D兒歌俾等緊既小朋友聽, 佢又跟住做動作 (自創動作...)

玩左一陣後, 就入去啦~ 去到校舍, 見到四圍都係D芭蕾舞衫同D唔知咩野既表演衫, 感覺幾商業... 去到有 waiting room, 俾小朋友玩住玩具等, 見到有native teacher 同緊小朋友玩 (其他幾間, 如果有玩具房都係俾小朋友自己玩) pat pat 都未坐暖就去interview 啦~

又係一間房分左幾張枱interview... 小豬同埋miss 揮手後, 就開始玩玩具啦~ (個miss 好年輕, 搽左shocking pink 既指甲油... 對小豬幾熱情, 都好多讚美)

一開始玩入豬入錢罌, 小豬未玩過, 所以第一個錢俾我幫手架, 之後就開始識玩啦, 入埋其餘果3個後, miss 主動問瑤瑤豬係咪要玩多次... 於是玩多次, 中間加插左俾個coin 俾媽媽, 禁下豬仔個鼻呀lei d 小問題, 瑤瑤豬都有跟住做。玩左起碼3次後, 要玩其他啦, 小豬都肯同玩具講bye bye~

第二樣玩具, 係切生果... 又係未玩過... 小豬切晒D生果都唔係好掌握到, 都係媽媽幫手... 有時miss 都出手幫埋一份添。最搞笑係, miss 拎左個玩具粟米俾小豬met粟米葉, 小豬met 完之後直接將粟米隊左落口, miss 驚叫, 假架, 唔食得架...

切好晒D生果, 再將佢地痴返埋, 放落個籃到, 就玩完第二樣啦~

第三樣玩具係木琴, 一邊可以彈, 仲可以用枝棍敲... 都未玩過... miss 示範左一次彈果邊, 然後小豬就係咁禁啦~ 之後miss 再示範用棍敲, 不過小豬似乎對敲冇咩野興趣, 所以繼續禁

miss 見小豬玩得好開心, 就同我傾左幾句, 問下要上午班定下午班, 如果冇上午, 下午班ok嗎?

仲有要本土課程定係國際課程等...

然後, 個interview 就完左啦, miss 送左隻 bear bear 俾小豬, 小豬有幾大聲叫講謝謝, 之後又肯講bye bye, 揮手同飛吻...

出來之後, 同小豬玩多左陣 (又係超多人), 就走lu... 臨走時, 見到有幾個native teacher 同埋小朋友一齊唱歌跳舞

雖然個interview 唔知點計分, 不過, 小豬就玩得好開心... overall來講, 我幾欣賞lei 間學校真係用遊戲既形式來認識小朋友,  比起封interview 信話係見係個小朋友, 但in果時, 又要答問題, 又要對形狀, 又要指顏色既好好多...

走既時候, 我幾鐘意間學校呀, 不過之後. 聽朋友講返, 話LEI間其實幾谷下, N班就開始有幾多功課, 聽完有D縮... but anyway, 間學校收先算啦~~~

另一樣得意野, 我個朋友既仔同小豬係同一個timeslot interview, 之後大家聊埋, 原來見到既野好唔同... 佢覺得間學校好商業化 (都有D認同), 覺得D老師同校工都唔多有愛心, 同第二間比差好多, 仲見到有校工黑面添... 哈哈, 可能我見到小豬in 得唔錯, 好開心. 所以咩野都見唔到掛... :P

戒奶咀...

瑤瑤豬出世之後, 其實唔多食奶咀架, 佢亦唔多好... 直到8個月大時舉家去高雄時, 先開始戀上奶咀... 雖然係咁, 其實小豬只要係扭瞓覺時先出動奶咀, 又或者係半夜醒左既時候先用... 所以一直以來, 我都覺得唔算大問題 (最重要係, 個人認為BB食奶咀真係好可愛呀... XD)

瑤瑤豬慢慢大左, 對於奶咀亦越來越熱愛, 已經由拎住個奶咀要人幫她開奶咀蓋, 變成自己爬上張枱, 搵到放奶咀個盒, 開左個盒, 拎個奶咀, 開埋個奶咀蓋, 餵自己食奶咀, 再爬返落來...=.=" 咁樣好似唔多好bor...

於是, 諗住要幫她戒奶咀啦~
第一晚, 陪瞓時冇提供奶咀, 只係熄左燈, 拍下佢, 都算順利瞓左... 不過床頭都放左奶咀, 第二朝起身, 見佢含住左個奶咀
第二晚, 陪瞓過程同上, 不過連床頭既奶咀都冇啦, 果然半夜喊醒左... 喊左一輪, 熊熊話俾返奶咀佢, 費事嘈住瞓覺... 但最後都係拍拍拍搞掂...
第三日, 同99講, 開始盡量唔好俾奶咀... 返屋企後, 99話冇俾到, 不過小豬就會周圍搵奶咀, 所以要將奶咀收埋, 而且唔好係小豬面前講"奶咀"...由果日開始, 6299稱奶咀為"果樣野" (第一次聽到時真係R晒頭, 以為講咩野神秘野添... XD)仲有, 前排先啱啱教左瑤瑤豬講奶咀 (係佢第一個2個音既詞語呀...) 依家變左禁語添... =.="

就咁樣, 瑤瑤豬到今日為止已經冇用奶咀10日啦~ 應該算戒左啦掛...
雖然夜晚既陪瞓時間長左, 雖然瞓得好似冇咁安穩, 而且半夜都會喊醒1次左右, 雖然日頭既nap由2-3個鐘變成左1-2個鐘, 雖然同瑤瑤豬share 奶咀好sweet (佢好鐘意食食下奶咀, 突然拎出來然後塞落貓貓個口度 :P), 雖然貓貓真係覺得BB食奶咀好可愛, 不過, 奶咀始終要戒既, 而且過程順利, 都算可喜可賀... 戒左奶咀, 亦證明左瑤瑤豬又大個左啦... (媽媽有D唔捨得... =.=")

搵左一輪奶咀相, 發現最近果張已經係halloween 時影架啦, 

PO多次啦, 紀念下LEI段咁可愛既成長片段

題外話, 唔知係咪LEI幾日凍左, 定係提早左7點9既早餐奶到7點LEI... 總之LEI幾日瑤瑤豬飲完奶都好好瞓, 同佢換埋衫抱埋上BB車都唔醒, 唯有就咁推去99度啦~~~ 如果成晚都係咁, 唔好半夜醒就好啦~~~ XD

生活趣事

通常星期六, 小豬返完PG就會來公司玩陣, 食埋中午果餐, 再去婆婆度
但係公司又冇咩野俾小豬玩, 所以佢就四圍搞搞震... LEI輪既大愛係飲水機 同紙杯

唔知點解, 突然擘大個口俾人影相喎 (可能平時佢問我拎野食, 我會叫佢擘大個口, 睇下口入面果D野食, 食晒未...)

熊熊見到阿囡玩得咁開心, 又玩埋一份... =.="

早知瑤瑤豬肯坐係個筒入面, Halloween 就俾佢扮龍蝦, 放係筒入面做seafood platter 啦~ XD

講起Halloween, 發現原來未寫喎... 了返幾個字先~ :P
上年Halloween 幫小豬扮南瓜, 不過當時佢仲好細, 又冇去D Halloween party, 所以只係當日著左件衫影左幾張相。 個南瓜衫洗左一次, 就唔用得啦, 好唔抵。 所以, 今年再慳錢D, 只買左頭cool 同枝魔鬼义 ($15.00咋, 好抵玩), 小豬又肯戴喎, 於是帶埋去上PG, 都算可以玩多次啦~

Halloween 當日, 拎埋枝魔鬼义行返屋企, 小豬好開心 (不過當左枝义係行山枚, 係咁篤地下 =.=")
行行下, 仲搵左個地方坐底俾我同佢影相呀....

同場加映, 含住奶咀既小魔鬼... 

醜死鬼啦, 係時候幫佢戒lu...  (雖然BB含住奶咀既樣真係好可愛... XD)

面試, 第三第四次...

剛過的週末, 好忙, 而最忙係星期五... 因為星期五有面試X2...

LEI個星期既瑤瑤豬, 狀態麻麻, 上個星期六病左, 感冒咳同有小小燒, 好返之後, 星期四唔知點樣地夾到手指尾, 甩左塊皮,再加喊到無比淒慘... 仲第一次要叔叔唔到媽媽呀... =.=" 當晚無論如何都唔肯用左手, 結果用左隻腳幫手托奶樽... XD 去到星期五, 經過一晚, 唔記得左隻手痛痛, 肯用返隻左手啦~

牛仔裙面試look - in 迦南
諗住睇落幾smart, 又唔會太斯文 (因為斯文同瑤瑤豬實在係冇可能劃上等號架...) 點知賴野... 去到幼稚園真係熱到high high, 又曬又冇風又多人, 個個小B都除成短袖, 瑤瑤豬又冇得除, 唔通著住爬爬四圍走咩... =.="
等左陣, 終於有得入去... 等啦... 係呀, 入到去又再等過。食完星星餅, 飲埋水水, 又再多輪, 終於有得見啦~

同第二次一樣, 一個班房, 有幾枱面試...
去到同MISS揮手, 自己坐低
1. 問叫咩野名... 無反應 (well, 係無教過LEI.. )
媽媽幫拖... 係咪叫瑤瑤呀, 叫瑤瑤既舉手... 無反應 (=.=" 幫拖失敗)
2. 問邊個帶你來玩架... 無反應 (=.="...)
媽媽幫拖... 係咪媽媽呀, 媽媽係邊呀... 係咁E望左我一眼 (幫拖又失敗)
3. 拎左貓狗魚同雀仔既相出來... 問係咩野動物... 無反應...  (平時見到狗狗, 會旺旺咁叫架...), miss 每問一張相, 瑤瑤豬都好開心咁接過張相, 繼續無反應... 最後收齊4張俾返個miss...  =.="
4. 砌積木 (唔係lego), 紅色放紅色上面, 綠色放綠色上面 係媽媽既幫拖之下, 勉強叫做到
5. 生果配對, 老師要求將配對既生果放係下面, 小豬就放左係上面。 媽媽幫拖, 話俾miss 知, 平時係屋企, 玩開果款係放上去架...
6. 面試完畢, miss 送左隻熊仔俾小豬, 小豬接過左之後係... 無反應架.. 無講謝謝... =.="
最後有揮手講bye bye, 媽媽補飛, 叫佢來個飛吻...  (不過咁既表現, 睇來飛吻都冇用架啦~~~ =.=")
面試完左, 係等爸B時, 遇到BLOG友仔呀...

熊熊話, 小豬太太太熱喎, 所以呆左, 叫我換衫喎... Ops... 臨時臨急拎唔到第二套面試衫出來, 唯有買過...

係公司食完飯, 即刻去第二間...
LEI間有D得意, 從面試信, 到interview 既叫名, 到group interview 都係全英文 (幾驚面試都係全英文, 瑤瑤豬一定係唔識架, 不過最後發覺, 原來廣東話或英文面試, 結果都係差唔多地... 唔識... :P)

襯衫牛仔褲面試LOOK... in 朗思
LEI 間, 一開始有個Gp Interview, 帶小朋友去左間房, 枱面上放左D玩具, 家長同小朋友一齊玩 (瑤瑤豬遇到會所朋友仔, 所以坐埋一齊玩), 玩左一陣就完左個gp interview 啦...
再來, individual interview,形式同上, 不過, 間班房可能比較細, 又或者人比較多, 總之就非常之嘈, 瑤瑤豬完全地俾週圍環境吸引左去啦
1. 問叫咩野名... 無反應 (well, 係無教過LEI.. )
媽媽又幫拖... 係咪叫瑤瑤呀, 叫瑤瑤既舉手... 無反應 (=.=" 幫拖又失敗)
2. 拎左車, 波, 杯出來, 問小豬係咩野, 冇反應... 叫佢俾個波俾miss, 冇反應...
3. 拎左圖片出來, 問沖涼點沖架, 波係邊呀, 之類既問題, 有DD反應, 但又唔算識晒lor
4. 拎左動物既puzzle 出來, 叫小豬砌返好... 識喎... *O* 拎出來果下... 我係度諗, 有冇咁難呀, 通常都係形狀咋..  但小豬搞搞下, 差唔多放晒落去喎...
5. miss 又再拎返D 車, 波, 杯出來, 再問多次叫咩野, 繼續玩自己D野, 冇反應 =
6. 同家長吹水, 邊個湊呀, 平時去邊度玩呀, 點解會揀LEI間幼稚園呀... 係唔係未識講野呀... 如實回答啦...
最後送左貼紙俾小豬, 小豬係係咁E點左點, 口擘擘...
走既時候, 有揮手講bye bye , 同埋飛吻...

出左來, 見到有好多野玩, 即刻開心晒, 仲玩到唔肯走添...
玩左陣, 上的士走人, 係的士度扭左陣, 就瞓左覺lu... 聽99講, 返到屋企繼續瞓, 瞓到五點...

總括來講, 小豬LEI 2個面試既表現應該比第一間要差 (第一間已經被reject了..) 所以LEI 2個都應該係冇咩野希望lu... 熊熊話, 要幫小豬做特訓喎, 不過佢都係講下架者... 但係要小豬講多D野係真既, 因為, miss 對住18個月有多既小B, 開始要求佢地講野啦~

所以LEI幾日做左個小小既特訓, 經過2日既努力, 再加小豬既一公升眼淚, 小豬終於間唔中識得叫佢既至愛啦...  佢既至愛之唔係奶咀LOR...

瑤瑤豬, 你要加油啦, 飲多D水, 準備流多D眼淚啦 XD, 因為媽媽開始要扮唔明你要咩野, 等你講多D野啦~