第N次生病 ...

過年前帶左小豬去沙巴, 之後又過年, 成日出街, 再之後D天氣又凍又熱又凍又熱咁, 都預左會病, 但小豬又好好野咁冇事喎, 等我係仲同婆婆話, 小豬幾好野喎, 咁都冇病, 點知講完就即賴野, 再次證明BB 係好小氣架....

19號要In德寶, 18號晚臨瞓前摸下小豬既額頭, 覺得有D熱 (平時, 得閒無事我都會摸下佢額頭架), 即刻探熱, 有38度, 小小熱.... 本來諗住唔食藥, 但驚影響第二日面試, 所以都係餵左次退燒藥 , 點知小豬極力反抗, 差唔多餵完既時候, 獲利回吐, 嘔晒出來.. 好彩嘔之前我已經覺得勢色唔對, 將小豬從床上抱起左, 張床先冇事咋, 不過我就一身都係... =.=" (熊熊仲要怪我唔等佢就自己餵藥... >.<)

19號起身探熱, 冇燒, 所以諗住如常去面試, 臨出門前探多次, 已經係37.5啦, 踩界所以照去... 面試完就俾返99湊, 我返工。 果日99話冇咩野燒, 但去到夜晚就39度啦, 即刻餵高燒藥 (今次當然等埋熊熊啦, 食完藥再探, 見到開始退, 就齊齊瞓覺lu...

20號, 本來諗住返工, 點知小豬面紅紅咁起身, 即刻探熱, 39.5度呀... ops... 即刻幫佢貼退熱貼, 打去診所book 時間。本來諗住就睇醫生所以唔餵退燒藥啦, 點知同小豬係床休息時, 佢趴係我身上唔願郁喎 (平時既小豬係爬來爬去, 跳上跳落, 不停要求玩roll the boat 架ma), 所以都係餵左高燒藥

食左退燒藥既小豬去到診所已經好精靈lu, 姑娘探熱已經冇晒燒lu...

醫生話係普通感冒, 肺同氣管都冇事 (咁都好D), 終於我好怪獸咁問醫生第二日(即係21號)可唔可以去面試, 醫生又說如果精靈既話, 都冇咩野問題既...

果日99話佢日頭都係冇咩野燒, 但就唔肯食野, 連至愛既藍莓同士多啤梨都唔肯食... 只食星星餅 =.="

夜晚湊返屋企 又燒到39.X度, 又餵藥... 餵藥時喊下者, 又冇野喎, 點知瞓瞓下咳左2下, 就開始嘔啦, 嘔到我成個枕頭都係... 最攞命既係, 佢嘔左2野但冇醒喎, 一轉頭就瞓左落D嘔吐物度...冇咁攞命既係小豬成日都冇咩野落肚, 係瞓之前飲左枝奶, 所以只係嘔返D奶出來, 唔算好核突(起碼做媽媽既覺得可以接受)

21號, 一路掙扎緊去唔去面試, 但係果日係in St. Cat, 為左Lei 個面試我聽左3-4個talk, 而且小豬食左退燒藥後其實都好精靈, 所以最後都好怪獸咁餵左退燒藥, 貼埋退燒貼咁出發。臨落車前幫小豬探熱, 37.5度, 入學校前, 校方探額頭, 36.2度 (證明超唔準), 最後小豬都算順利完成左個面試 (不過到依家我都依然覺得帶佢去面試真係好怪獸 >.<)

夜晚約左上海來既親戚出街食飯, 雖然小豬仲係有D燒, 但我都帶埋佢去, 諗住出街食飯佢會有D新鮮感, 可能肯食多DD野啦~ 果然, 佢果餐既胃口好左, 食左小半碗米粉, 好幾條菜同埋一大舊蒸魚... 

可惜夜晚又再高燒, 燒到40度。餵藥時又嘔晒出來, 熊熊懷疑係枝高燒藥特別難飲, 先係餵親都嘔, 於是我試左小小, 果然太甜有D la喉, 於是開稀左枝藥水, 小豬就乖乖飲晒lu...

小豬瞓左後, 我都不斷望實佢, 驚佢咁高燒會抽筋, 好彩藥力發作, 佢開始慢慢退燒

22號, 起身仲有D燒, 餵左退燒藥, 諗住餵埋止咳止鼻水既藥既時候, 遇到強烈反抗, 又嘔左小小, 有熊餵藥餵到發脾四, 於是果2枝藥就留俾99餵啦~

去到下晝瞓晏覺前都冇咩野燒, 所以冇再餵藥, 瞓晏覺初段有好多痰, 時不時咳幾下, 最後抱起小豬幫佢拍背, 等佢嘔晒D痰出來, 之後就瞓瞓左3個鐘, 不過瞓到中段又燒返小小。起身後再餵左次藥, 之後就冇燒啦, 仲好精神咁同公公吵架添... =.="

是次病病終於好返啦, 不過就瘦左圈, 胃口又差左, 又要再慢慢調整啦~

人地話入學後先會病多左, 點解飲左成年人奶既小豬未返學就成日病架... 

懶洋洋沙巴遊... part 4

話咁快就第四日啦~
起身食早餐...

間酒店有2間餐廳, 一間係馬拉及西餐, 一間係食中餐。 早餐係西餐廳食... 

main course 每人只可以揀一份 (不過個waiter話瑤瑤豬都可以揀一份), 生果, 果汁, 粥, 面包蛋糕就任食。我揀左銀雪魚薯餅 (隻蛋好好味, 薯餅就好大份, 食唔晒都好飽), 熊熊要左個all day breakfast, 佢都話好味, 至於瑤瑤豬繼續玩多過食, 所以冇幫佢叫多份啦, 費事浪費啦~

係沙巴果幾日, 天氣好好, 求其影真係勁藍既天, 真係好好彩呀, 因為之前果個星期仲落緊雨, 仲好似落左成個星期呀...

食完早餐, 去左碼頭邊浮潛同餵魚... 好多魚呀... 不過D水就麻麻地清 (sorry, 又忍唔住同馬爾代夫比添 XD) 瑤瑤豬一開始都肯落海玩架, 不過佢件救生衣太大件, 著得佢唔舒服, 再一個唔小心飲左啖海水, 之後就喊住要上水lu...上左水都仲坐係度餵左好耐魚...

玩完又開餐啦~~~ 哈哈, 咁先似渡假呀MA~

係西餐廳有BBQ lunch, 沙律同湯係任食架, 叫多個白飯俾小豬食, 熊貓就望住個海, 嘆住白酒, 有專人燒埋野食, 正~~~  D野食都好味, 小豬都肯飲D湯食幾啖白飯~ 好過唔食啦~

甜品係雪糕配燒菠蘿, 超正呀~~~

食完lunch, 我去做SPA, 熊熊就帶小豬係泳池玩

個SPA最後做唔成, 因為SPA package 中既其中一part 當時冇人可以做, 要到夜晚先可以補返俾我, 我又唔想喎, 所以索性改為massage, 一般啦~~~

瑤瑤豬係泳池玩得幾開心, 有幾個男仔同小豬玩。不過個池都幾深, 小豬又唔肯用水泡, 結果佢就係池邊果小小淺水位爬上爬落 (原來池邊都幾利下, 小豬咁樣爬完之後, 個小腿係損晒架, 不過佢又冇話痛, 就由佢啦~)

中場休息, 叫小豬飲水, 佢見熊貓飲緊枝裝cocktail, 佢又要...  好啦...就俾你試下飲啖樽裝既水啦~ 哈哈, 咁又氹到佢飲多幾啖水... :P

酒店唯一既酒吧, 係5-7 時段, 有免費野飲 (第一杯免費, 第二杯半價) 咁熊貓又去試下, 好彩小豬都可以入去坐下...熊貓飲完第一杯就走lu... 因為係時候晚餐... (係呀, 又開餐啦~)

今餐試左中餐廳... 咁早食飯, 係想小豬可以係瞓左之前食返D野...

果然, 佢食左幾啖白飯, 好幾啖樹仔菜之後就扭計, 再然後就又去搵周公玩lu...

今餐叫左乾奶油蝦球 (好彈牙, 好味), 

唔知咩野豆腐 (本來係叫來俾小豬食, 點知上枱係炸豆腐, 小豬唔食, 唯有熊貓食, 其實都好味, 不過份量十足, 好飽...)

沙巴樹仔菜, 我真係好鐘意呀, 可惜只係沙巴先有

螺 (宮寶雞丁果隻煮法), 都好味

蒜蓉蒸生蠔, 聞落都幾腥下, 不過食落又唔覺喎, 仲幾鮮甜好味添...

雖然晚飯食得好飽, 不過始終係沙巴既最後一晚, 所以熊貓最後有叫多次 room service

又叫多次果碗好好味既涼拌魚, 又試左馬拉鮮果沙律(我估), 好似用燒汁撈生果咁, 都幾得意

不過個魷魚圈就唔好味...

當熊貓係度努力食食食既時候, 小豬就瞓到成隻小豬咁, 見到lei 個睡姿, 就即刻要影低佢啦~

懶洋洋沙巴遊... part 3

第三日, 要搬酒店啦~

依舊9點幾起身去食早餐, 今次去另一個餐廳食, D野其實都係差唔多...

唯一唔同既係, 佢有個kid corner, d 野食可能啱小朋友多D掛, 不過瑤瑤豬係唔多欣賞架, 繼續係玩多過食 =.=" 又係粥粉面飯樣樣食小小 (今次去旅行, 小豬最唔好就係食既方面)

小豬見我地影相成日都V, 所以佢又V... ops, 未識伸2隻手指出來, 伸住一隻先啦~ XD... 

lei 張好似打功夫...

食完早餐, 我就返房執野先, 熊熊帶住小豬去放電... (由於時間有限, 所以冇得再去泳池玩lu...)

check out 左之後, 熊貓就去左香宮食lunch (lei 餐係酒店送架) , 所以又食XD

香宮係食中式點心架 (不過冇影到野食相...) 野食都幾好味, 不過服務就幾亂下, 搞到一大輪先知我地應該係食咩野餐 (因為酒店送既係set lunch 來架), 然後, 個waiter會冇啦啦黑面啦, 唔理我地啦~ 熊熊臨走前唔小心掃到鼓油樽, 個waiter個樣好似就來打人咁...  well, 做為五星酒店既中菜廳, D 服務仲差過街邊大排檔, 真係唔得...

不過, 瑤瑤豬就一於少理, 繼續食佢既星星餅, 食食下對腳仲放埋上枱... 真係失禮晒... =.="

食完lunch, 就搭的士去碼頭啦~ (熊熊擺左烏龍... 其實特優係包送埋我地去碼頭架, 叫我地2點係lobby 等, 點知熊熊以為我地自己要2點去到碼頭, 所以餐飯食得勁趕。 去到碼頭, 特優既staff 打來問我地係邊, 佢地係lobby 等緊我地喎... =.=")

之後果2晚, 我地住Gayana Eco Resort, 係個島上架, 所以熊貓充满期待...

要搭船去個島... 果程船勁啦~ 我地坐左架類似大飛咁既野, 全程好似坐咁香蕉船咁... 我一手要攬住小豬, 一手要搵地方捉實, 真係有D驚。坐係對面既個香港女仔, 全程都係度驚叫咁滯... 反觀小豬, 佢又好似冇咩野, 只係著住救生衣唔多舒服, 所以一臉不爽...

來到酒店, 嗯... 有DD失望, 間酒店唔係baby friendly, 我諗小豬應該係當日該酒店最細既住客... 酒店所以既通道基本都建係海上, D圍欄就幾疏下, 小豬跑緊既時候, 係要望到實一實架...

酒店房唔算太靚, 不過主要係冇浴缸 (不過之後諗下, 人地叫Eco Resort 呀, 冇浴缸都正常呀...) 熊貓訂既 mangrove villa, 係可以打開露台門, 就可以行落個海啦, 可惜我地間房最靠岸既, 對正酒店既雜物房, 雖然有想過轉房, 不過同一房種已經full 晒, 如果upgrade 另一款房, 係對山既, 而且個露台得幾條線圍住, 對於帶住小豬既熊貓來講, 有D危險, 所以最後都係住返原本果間房

至於個海... 嗯... 可能唔應該同馬爾代夫既海相提並論, lei 度既海真係幾多垃圾, 能見度都幾低... 所以有D失望...  不過小豬依然係好開心既爬上爬落架...

Settle 好左之後, 趁仲有太陽, 就落海玩下先~ 熊熊話佢自己係海豚, 而小豬就係訓練師.... 哈哈, 都有D似喎... XD

LEI晚食左room service, 其實D野食同去酒店既餐廳食係一樣架, 係露台食都幾正呀... 值得推介既係右下角果碗白色野, 馬拉菜, 唔記得叫咩野, 係類似涼拌海魚肉, D魚肉好滑, 酸酸辣辣咁. 好好味。

瑤瑤豬一開始有參與食蝦片同薯條既活動, 都食左半條炸魚柳既, 之後就扭計要我抱, 下一分鐘就已經瞓著啦 (係呀, 果日又冇瞓晏覺呀) 當時7點幾, 佢一直瞓到10點就醒左, 開左枝奶俾佢, 飲飲下又再瞓過, 然後就一直瞓到第二朝啦~ yeah~~~

懶洋洋沙巴遊... part 2

酒店房都幾好瞓, 齊齊一覺瞓天光 (不過瑤瑤豬既睡相真係嚇死人... 瞓左個H型出來... =.=")
九點幾起身食早餐...

由於係peak season, 所以酒店開多左間中菜廳食早餐... 基本上來講都係普通啦, 冇咩野驚喜。瑤瑤豬果期開始要自己食飯, 同埋唔多肯食飯, 所以拎左粥粉面飯俾佢, 都係樣樣食小小, 玩既成分多D (同大半年前去澳門, 小豬狂食自助餐既情景差好遠...)

食完早餐諗住返房換衫先去泳池, 點知小豬好似認得去泳池既路, 自己走左去泳池果條路, 熊貓特登走埋一二邊, 等佢見唔到我地, 小豬都只係回頭見唔到人就停左係度, 又唔喊又唔行返轉頭。結果, 同小豬講左1X次換左衫即刻去玩水, 先夾硬將佢捉返房... 佢自己一換完衫就即刻拎埋對鞋俾你幫佢著... 然後就拖住爸B去泳池lu... =.="

lei 個係第一日既泳池相, 小豬玩得好開心, 不過沙巴既天氣, 係冇左太陽就會開始涼涼地, 玩左1個鐘, 未到5點, 小豬既嘴唇就開始紫紫地, 所以就啦啦聲抱佢返房沖涼lu...

第二日, 基本上就係泳池邊渡過, 小豬見到人地有玩沙既玩具, 就走埋去玩埋一份, 玩到人地走左都仲要拎住D玩具, 最後要大喊一場先可以俾返D玩具俾人... =.=" 

上次去澳門既經驗, 玩到中午, 就抱小豬上水,俾佢係池邊瞓個晏覺... 以為今次都係咁, 就真係太傻太天真啦~ 幫她換埋衫, 陪埋佢係沙灘椅度瞓, 小豬仲係不斷自己爬落去, 左搞右搞同埋行去泳池邊, 於是者1個鐘之後, 熊貓就放棄啦, 由得小豬唔瞓晏覺啦~

小豬玩左好耐淺水區, 熊熊話要帶佢去深水區喎.... LEI張相係未落水之前影架~

Lei 張幾好, 似模似樣喎... 可惜影完LEI張, 小豬就開始驚驚lu...  喊左輪之後, 就帶佢返淺水區, 由得小豬自己係淺水區行來行去啦~ (原來睇落大膽既瑤瑤豬真係勁細膽呀~ XD)

唯一可以令小豬自動離動泳池既就係LEI杯雪糕啦~ 

LEI間酒店有整個沙巴最靚既日落, 熊貓當然要睇下啦~ 嗯... 同馬爾代夫既比, 其實都差幾遠, 不過大家都慕名而來, 好熱鬧啦~ 而小豬係日落前都仲好起勁咁行來行去, 爬上爬落,係太陽落山前既果刻, 佢就趴左係我度瞓著左lu (當時仲著住泳衣...)

返到房換好衫 (除著泳衣都可以唔醒架), 熊貓就又出發去食野啦~

繼續係亞洲城食海鮮... 今次試華興 (拎住特優既卡片有九五折)

食海鮮前叫左沙嗲... 好似馬幣$8.00/ 10串, 超好味

沙巴必試既桔仔冰, 好清涼, 消暑一流

奶油虎蝦, 今次食$70/隻 (不過都唔係最大隻, 華興既最大隻係$80), 超好味, 虎蝦彈牙, 奶油汁又好好味, 好食過雙天既奶油好多下...  熊熊食完返要留返個奶油汁點其他海鮮

白灼虎蝦仔, $36.00/份, 好得, 又係好彈牙好鮮甜, 香港應該又係買唔返...

灼鰤魽, $30.00 / 份, 鮮甜, 不過其他地方應該食得到既

灼XX螺, $30.00/份, 都唔錯

炒沙巴樹仔菜, $35.00 / 份, 好味, 份量好夠, 好满足

白胡椒炒蟹, $60.00 , 超好味, 雖然D蟹唔算平, 不過白胡椒既做法真係好正呀...

當我飽到上心口既時候, 熊熊說要試埋燒雞翼喎.... 仲要2隻起, 結果我幫手食左半隻, 熊熊食左1隻半, 我由於太飽, 所以對雞翼既味道已經冇咩野印象lu...

仲有, 必食既椰子布甸, 原本以為D椰子布甸應該係同一個supplier, 味道應該係一樣, 點知LEI個布甸清甜好多呀, 結果我用左自己個甜品胃, KO左大半個...

整體來講, 華興D野好味D, 可能濃味小小比較啱熊貓胃口掛, 不過華興就貴小小, 但D人又大檬小小, 買單只係馬幣280.00咋 (諗返轉頭, 應該係計少左個蟹... ) LEI餐真係超满足呀...

食完飯, 瑤瑤豬就瞓醒啦~ (即係又冇食晚飯), 佢坐係BB車上食左個之前帶既面包仔咋...  熊貓出發去搵橋底下既榴槤飄香... 原來當時已經過左食榴槤既季節啦~ 所以搵到既時候, 雖然有幾檔仔, 但就冇咩野人買來食。 熊貓搵左間最多人既檔仔, 叫左個唔知咩野名既榴槤, 細細個要$35馬幣呀... 不過都好味...人地話馬拉既榴槤有小小甘甘地既味道... 係真架... 至於瑤瑤豬大小姐, 就連榴槤都唔肯食... 算... 慳返...  返到酒店隊左9安奶就算lu..

咁就第二日啦, 第三日要搬酒店啦~.

懶洋洋沙巴遊... part 1

終於開始寫遊記... 真係有排追... XD

1月25日正式開始遊沙巴啦~ 神咁早, 6299就車我地去機場啦~ 瑤瑤豬應該知道有得玩, 一起身就好醒神, 落左車同爺爺嫲嫲叔叔講左bye bye , 就頭都唔回咁入左機場lu...

入到機場, 換返D薄身小小的衫, 就入閘啦~  小豬都算聽話, 全程都肯坐BB車, 唔扭抱... 入左閘後, 我地去左lounge度坐左陣, 食個早餐, 拎返2枝水 (因為airasia 冇水提供), 小豬都趁機落下地, 爬高爬低撞到頭...:P

好鐘意Lei 張相, 好似俾人捉到小豬偷食咁, 小豬又交足戲喎... XD

機上果3個鐘都真係幾辛苦, 由於架機好爆, 小豬真係要坐係我大脾, D位又幾窄... 小豬全程爬上爬落, 自帶左藍莓, 再加ipad, iphone 都係頂得果一陣... 然後我同熊熊就輪住帶小豬出去行街街, 中途熊熊帶左小豬出去玩左陣 (大概3-4個字)。

本來叫左飛機餐 (自費, 訂機票時訂埋架, 因為熊熊唔知小豬當時想食咩野, 所以每程叫左3個餐...) 不過情況好混亂, 所以飛機餐都冇影相。 我覺得都唔難食, 其中有個面仲幾好味添, 可惜小豬一點都唔欣賞 (可能係馬拉既飛機餐, 個個都有小小辣), 總之就勁混亂啦~ 總結係, 小B上機都係唔好食飯面之類, 食包應該會好好多...

搞完一輪之後, 熊熊話, 都係唔好貪2歲以下既B唔駛機票LEI樣野, 下次出去都係買個位俾小豬自己坐

終於,過左2個半鐘後, 瑤瑤豬冇晒電啦... 降落時瞓著左... 本來以為一天都光晒, 只要放佢落BB車就搞定, 原來airasia既BB車係跟行李一齊出架, 既係要抱住小豬落機, 要入左境 去左拎行李時先有BB車呀... 再加上入境D counter 動作超~快, 輪流抱都手斷...

扲好行李, 出發... 今次係經特優旅遊BOOK酒店, 所以有人來接機, 同埋送我地去酒店... 咁樣都幾好, 除左慳返的士錢, 仲有人帶我地去唱錢, 買電話卡, 唔駛四圍搵

頭2晚住Shangri-la's Tanjung Aru Resort, 距離機場好近, 好快就到。

Lobby 好靚呀, 不過熊熊去左check-in , 我要睇住隻馬騮瑤, 冇影相咁滯...  (上次放B時覺得好好用既帶, 俾隻馬騮瑤發現左, 唔俾我拖住佢, 係都要自己拎返條帶, 所以我真係追到佢氣咳)

上到房, 好靚又好大, 瑤瑤豬見到酒店房超超超開心, 不斷咁跑來跑去... 

沙巴既天氣好好, 好好陽光, 但又唔係好似香港咁濕熱, 熊熊大愛。

settle左之後, 就換左夏天衫去個club lounge 度食小小野 (因為我地想要既日子冇房, 所以upgrade左房, 送埋個lounge 可以任食, 去左個lounge幾次, 發覺D 野食都OK, 係可以唔駛俾錢食飽飽架。當然, 熊貓係要留肚食海鮮架)

之後去左游水,不過D 相係另一部相機度, 所以skip 左LEI part先。遊完水, 返房沖涼, 再去lounge 度飲返杯 (下晝4-8 係紅白酒任飲啦, 正~)然後出發去亞洲城食海鮮...

第一日去左食相當出名既雙天...

D虎蝦好大隻呀, 雖然唔係好平,由30馬幣至70馬幣一隻, 不過講真LEI個價錢係香港都食唔返LEI 個size既虎蝦, 熊貓試左2隻40, 2隻50既 (因為我刨blog時, 見其他人話最大隻果D, D肉唔滑), $40/隻既用鼓油皇煎, $50/隻既用當地出名既奶油, 結果2款都好味, 不過熊貓覺得反而係鼓油皇既做法出色D, 奶油有DD偏甜。另外, 仲叫左魔鬼魚 (好大份, 先$25馬幣), 螺 (好鮮甜, 好似$20), 沙巴樹仔菜 (我大愛, 不過雙天既份量好少, 有D唔夠喉), 見D蟹做緊特價 (好似$30, 5隻), 又試下... 覺得唔應該貪特價, D蟹好少肉, 不過白胡椒既煮法就超好味....  最後當然係椰子布丁, 雙天既OK, 不過係SSP有間做椰皇布丁既舖都好出色, 所以又唔算好驚艷

食左咁耐, 都冇提到瑤瑤豬LEI... 因為有隻小豬係的士上又跳又爬, 玩左好耐, 然後突然企定定, 發力... 原來poo poo 左... 再然後唔知係咪用左好多力, poo poo 完就企左係度瞓著左...XXXXD

落左的士後, 幫小豬善後, 佢都唔知醒喎, 一路瞓左我地食完走人... 本來諗住食完飯周圍行下, 點知小豬瞓醒, 扭抱不肯坐車, 熊熊抱左陣就頂唔順, 打的返酒店lu... 返到酒店, 叫左room service 雞湯米粉俾小豬, 點知佢又唔多肯食, 仲叫左個超好味既mushroom soup... 冇相, 因為瑤瑤豬冇瞓, 要睇住馬騮瑤lor...

第一天... 完