家姐

諗住寫呢篇諗左好耐...

小豬出左名係小氣豬, 嬤嬤係會所抱其他B, 小豬就會9秒9沖返過去要求嬤嬤放低個B, 如果唔係就爆喊... 如果我抱其他B, 佢連果9秒9都唔俾我, 直接爆喊...所以, 有左咩咩既時候真係做好晒心理準備有排煩... =.=" 不過我大肚時, 小豬又顯得幾興奮喎, 連同學仔派聖誕禮物, 小豬都嘗試幫妹妹拎埋一份。大家都話等個B出左世, 小豬就會呷醋架啦... 咁都冇計架, 只希望唔好太呷醋啦...

但又真係估佢唔到喎, 小豬好鐘意咩咩喎, 第一次見到咩咩就話咩咩好cute, 之後任何人 (包括我)都可以係佢面前抱住咩咩 (佢自己都要每日一抱咩咩),  親朋戚友來探咩咩時, 小豬又好樂意咁介紹咩咩俾大家認識。而我餵奶時, 小豬只係一開始好好奇, 同埋話佢都想飲, 然後就撩起我件衫係我心口錫左啖就走左lu... 然後, 每次咩咩喊, 小豬都會沖過去睇下佢, 再好緊張咁叫我快D餵奶俾咩咩飲...

小豬講左好耐話要同妹妹一齊影相。, 於是係影相果日又好興奮咁等影相, 不過你知啦, 呢輯相咩咩先係主角, 所以小豬其實係一邊等左好耐先影得果幾張, 但小豬又真係好合作喎 ...

又試過, 我陪緊小豬瞓覺, 咩咩係廳哭, 於我同小豬話要出去睇妹妹, 小豬都好大方咁話OK... 當我再入房時, 小豬已經好乖咁自己瞓著左...

當然啦, 小豬都有唔乖, 唔肯讓咩咩既時候, 例如頭果幾次全家出街, 佢C都要坐BB車, 點都唔肯讓俾咩咩... 又或者得間會met 咩咩, 仲要話我細個時, 爸爸媽媽都有met 我架... =.=" , 又會有時見我話咩咩唔乖, 唔肯飲奶時, 小豬會好興奮咁講埋一份, 話要打咩咩pat pat...

不過, 其實小豬只係一個啱啱先4歲既小朋友, 我已經覺得小豬做得好好, 好乖啦... 希望可以保持住啦.. 繼續相新相愛...

有D阻滯既坐月 之 血崩

成個坐月過程中, 最大件事, 應該係我血崩呀...都幾恐怖架... (同埋核突)

話說12朝後, 我就開始食薑醋, 每日都只係食1隻蛋, 1塊豬手, 可能1啖醋 (因為陪月說一開始唔好食好多, 要俾個身體習慣下)去到D16的半夜3,4點, 我起身去廁所, 見又有返D血, 仲以為係惡露 (之前果1-2日, 惡露已經係淺黃色架啦), 所以冇理, 去左餵咩咩,  搞左一個鐘左右,  去多次廁所就瞓得... 去完廁所, 抹完之後仲有血滴緊, 好快成個馬筒都係血...  果下我仲唔知死, 諗住到第二朝先算,  著返條褲, 諗住返房瞓...  點知, 未行到房, 就feel 到好似有野跌左落來 (好似M到時咁, 但又好似跌得再多D...)  咁又行返去廁所check 下... O... 原來係跌左幾塊大血塊落來, 我開始有D驚, 叫醒左老公, 話佢知我好似流血不止...  (果時應該係朝早6點左右)

本來諗住call 白車, 但我個人其實仲好精神, 所以就諗住搭的士去醫院。 打俾我阿爸阿媽, 講左情況, 叫阿爸陪我去醫院 , 阿媽就來我屋企幫手睇住2個囡。(好彩果日係星期日, 大家都放假...) 

係的士上, 打左俾陪月, 話俾佢知個情況, 叫佢盡量早D來我屋企幫手湊咩咩...  係的士上可能坐住冇郁, 所以唔係好feel 到有野漏出來 (好彩咋, 如果唔係搞到的成灘血就唔好意思啦..) 一落車,  就feel 到D血繼續流 , 就好似穿左羊水咁...

係急症室既分流站量左血壓, 被評估為緊急, 姑娘俾我坐輪椅, 仲放左塊床墊係輪椅度... 等左大概半個鐘就到我去見醫生... 阿爸說, 見到姑娘掉果去床墊時係有一窩血架... 我好辛苦咁由輪椅move 到張檢查床( 主要都係一郁就feel 有好多血流左出來)  醫生話生B個傷口冇事, 已經埋左口, 要照X光, 睇下咩野事...同埋要留院  (我都估到要留院架啦, 雖然好唔想...)  等緊上房既時候, 開始覺得有D眼花同暈  (當時唔知係貧血定係肚餓... 最後應該係肚餓  :P)

上到病房, settle 左就叫左老豆返去lu... 我就等醫生檢查... 醫生第一句就問有冇食薑, 有冇食醋, 然後就開始話, 都話未清晒惡露唔好食薑啦...  然後就人手幫我止下血, 再吃止血藥...  由醫生幫我人手止血開始,  就開始正常返, 好似平時D M咁...  留係醫院都好既, 咪當抖下啦... 醫院可以借泵俾我泵奶, 泵完後可以幫我雪住, 於是果日我就係吃飯, 瞓覺, 每4個鐘泵一次奶...

另一邊, 阿媽話咩咩都好乖, 定時3個鐘醒一次, 好快咁食左100ml 奶, 然後又瞓過, 搞到佢同陪月都好得閒...  而老公就帶左小豬去玩左陣, 夜晚就放小豬係99度, 自己就返屋企湊咩咩...  老公話咩咩由9點幾喊到12點幾, 最後俾30ml 奶KO左, 一直瞓到5點幾先再食奶..

第二日, 一早抽左血, 再見醫生, 冇貧血,其他又冇野, 於是醫生放我出院lu... 搞完一輪出院手序, 再接埋小豬放學, 就齊齊返屋企lu...  我一返到屋企, 咩咩就得閒冇事er幾聲, 又唔再食完就瞓, 瞓完又食lu... 陪月話佢聞到媽媽陣味喎...=.="

咩咩第一次食奶咀...

係我強烈要求下, 老公send 多張相俾我...

有D阻滯既坐月

以為自己有D經驗, 買齊晒D餵奶睡衣, 餵奶Bra, 又請埋陪月, 就可以安坐家中悶足成個月, 點知人算不如天算... 由最小既阻滯講起

1. 上胎做泵媽做足一年, 泵奶對我來講就係好眼瞓, 發呆, 同埋收工...已經完全唔記得初初唔上奶, 谷奶, 追奶既事, 而且,今次懶醒咁買多左個swing maix, 係雙泵... 結果, 一開始依然係塞奶, 有D痛, 忍痛俾陪月按都係唔多得, 用雙泵又冇手一邊泵一邊按, 結果泵極都係得1安, 個胸又依然好實... 最後諗諗下唔對路, 都係拎返之前個swing 單泵出來用, 要叫老公幫我買返D parts...好彩轉左泵, 可以有隻手按下個胸, 之後就要開始追奶lu...

2. 我記得小豬去健康院, 頭一個月只係去左2次, 第1次係首次登記既果次, 隔左個weedend 去check 多次黃就唔駛再去... 今次, 咩咩係頭一個月去左5次... 除左第1次, 同埋去做聽力測考外, 就不時要去check 黃同check 重... 咩咩第一次係健康院check 黃, 真係閘界閘得好梗要 (好似280就要去醫院照燈啦... 咩咩果次係270...)好彩之後就開始退啦... 不過體重既問題繼續係度架...咩咩出世係3.3KG,, 出院時得返2.98KG, 健康院一定要check 到個B重返出世時既重量先可以唔再去, 結果我用左差唔多2個星期先追得返. 最搞笑係第4次check 重, 3.27KG... 差小小所以要去多次... 從此咩咩就由中碼偏大B, 變成左唔到50既細B呀....

3. 壞泵...唉... 個swing maix 用唔夠一個月就壞左啦... 仲要我貪平買左水貨, 又見之前果個用左咁耐都冇壞過, 所以冇加價買保養 (因為保養要係台灣做架) 果下真係灰左... 好彩仲有之前個back-up swing, 買多set parts都用到既... 個swing maix 到依家仲未返到來喎..

4. 壞雪櫃... 係我生之前, 個雪櫃下格已經試過唔凍, 冰格太凍, 要熄左成部雪櫃融左D雪再開返... 點知坐緊月既時候又是唔凍喎... 未生之前, 熄雪櫃都唔係好大件事, 最多咪冇得食雪糕... 生左就大件事啦, 因為咩咩會冇奶飲架... 結果要買冰浸住D奶, 又要不斷換冰, 先可以保住D奶... 點知隔左冇幾日, 個雪櫃又唔得... 真係火都來埋...

而今次最大既阻滯係血崩....聽落都幾恐怖, 實際都係好恐怖... 詳情都係下篇先講, 真係有排講...

除左以上果D阻滯之外, 其他都幾好...  最感恩既係小豬基本上都冇呷醋... 會肯俾我抱咩咩, 咩咩喊時又會第一時間去佢... 就算夜晚俾咩咩吵醒, 都只係話咩咩好嘈, 但又會去睇下佢...我已經好满足啦...

好快咁, 一個月就過左啦 (其實係我不斷咁出街去健康院同醫院.. 所以一D都唔悶 XD)

鐘意瞓high chair 既咩咩...

住院1.2.3.4.5

繼生小豬時既住院1,2,3後, 要寫返生咩咩既住1.2.3.4.5先...  係醫院住左5晚喎... 真係好耐... 係咩野都比生小豬時耐左... 生之前本來係住一晚, 第二朝就催生, 點知第二日太多人催生/自然生 / 緊急生, 我竟然冇位生喎, 於是第二日係醫院無所事事, 同人吹下水, 睇電視由朝早7點睇到夜晚11點... 第三日係戲肉, 生完咩咩差唔多夜晚11點先返到產後房, 又再開始我既牛牛生活...

雖然係第二胎, 但初初開始餵母乳依然係苦差... 我依然勁快咁俾咩咩咬損左... 依然係不停咁俾咩咩啜啜啜, 都啜唔飽...  唔同既係, 咩咩好快有poo poo, 但好耐好耐先有vv喎, 而且今次唔知係咪因為醫院努力推廣母乳, 竟然唔俾我補奶粉喎... 所以咩咩做左房入面最嘈既果個B, 嘈到最後一日有個姑娘笑笑口咁同咩咩講, 我認得你把聲喎, 做咩野又喊呀 (我心諗, 肚餓咪喊lor...)結果, 咩咩出院既時候, 收水收左差唔多10%, 跌穿3KG...

雖然係第二胎, 但我真係咩野都唔記得晒...好雞手鴨腳咁幫咩咩換片, NB 對我來講真係好耐之前既事, 而且臍帶夾又係度, 結果一開始既2-3條片片都係漏濕左架... (真係失禮晒...) 於是又要雞手鴨腳咁幫咩咩換衫

原本順產住3日2夜就可以走啦, 但係咩咩出世時, 個頭上有個水瘤 (仲好大下), 醫生姑娘都同我講話個瘤會慢慢吸收返, 所以我一直都冇擔心過, 直到臨出院時, 個兒科醫生話唔出得院, 要再觀察多一日, 睇下個瘤有冇變大... 果下, 我係度諗, 原來醫生唔係一直都有留意架... 原來有機會變大架...  個心即刻驚左... 好啦, 留多一日就一日啦... 好彩之後又冇變大...

係醫院留多一日, 個黃又再升左... 再次臨出院時, 個黃已經升到閘晒界 (之前果幾日都一直係合格架, 不過我就望住咩咩越來越黃), 然後要抽血睇下駛唔駛去兒科病房照燈, 如果要既話, 咩咩就要自己留係醫院啦...咩咩抽完血, 等份report 等左好耐, 終於有姑娘理我時, 她話... 頭先抽血抽得唔夠多, 驗唔到, 所以要再抽過.... (即刻想爆粗...) 可憐既咩咩於是又要捱多一針... 最後都唔駛照燈可以出院啦... 不過醫生說同我講, 由於個水瘤入面全部都係血水, 吸收左之後會加重D黃, 所以要小心睇住... (又驚過...) 出院後果日都仲係紅日, 要初四先可以打去健康院...

雖然樣樣都好似有小小阻滯, 但都係好小事, 可能係第二胎, 我自己既心態比較好, 知道樣樣都會慢慢好起來, 唔駛太緊張  (但第一次出唔院果下都係有D唔開心架)

終於可以出院啦... 小豬見到咩咩好開心呀... XD

(下一篇, 繼續係有D阻滯既坐月生活)

4歲快樂~

望住D小朋友大, 就會覺得時光飛逝... 4年時間真係眨眼就過啦...

四歲既小豬已經由個BB樣變成左小朋友樣lu (要睇返D相先記得小豬之前真的好BB呀)

我最可愛既小豬

雖然今年媽媽俾唔到太多時間你, 但做左家姐既你真係表現得好好呀...

希望你可以繼續開開心心, 健健康康咁享受你既童年生活 (最好乖D, 唔好睇咁多電視同i Pad)

繼續做個鍚妹妹既好家姐...

生日快樂呀~~