K1大作戰之總結 + PN上學期發展評估

K1同PN大作戰都係草草結尾... 係我太懶...

K1既最後一場係14年12月頭架 (實在係好耐之前)... 又係勁多人報既龍校, 培正...
學校講到明係小朋友自己去考, 所以我都唔知佢考咩野... :P
小豬只係冇喊咁入左去 (其實讀左幾個月既PN班, 唔喊都好應該既), 過左陣就好開心咁拎住張貼紙走出來... 當然, 問佢考過D咩野, 小豬只係答瑤瑤... =.="
結果當然後冇收啦...

K1大作戰既結果係, 9間學校, 有2個offer, 7個waiting / reject. 由於有offer 果2間我都冇留位, 所以最後就原校升K1

總結來講, 我對於LEI個結果, 多少都有D失望, 因為有好幾個面試,  做媽媽既係覺得小豬做得好好 (起碼相比起自己係好有進步). 可惜最後都冇收。可能龍年效應實在太強掛, 咁另一方面, 今次冇offer 既7間學校, 有4間既龍校, 另3間都係勁出名既學校, 係我要求得太高掛... 所以, 希望通過今次既K1大作戰後, 我可以係考小學時, 為自己做好心理準備, 搵D適合小豬既學校啦~

講返轉頭, 好彩小豬都好鐘意依家 返緊既學校, 而我都覺得間學校唔錯 (雖然學費幾貴, 返學時間又短, 又多假期, 又被坊間講為非常之commercial), 老師好有經驗同愛心, 學校本住收得你錢就做得好好睇睇既想法 (個想法係我自己安架 :P) 逢年過節都令到小朋友開開心心, 每份過節既禮物都唔求其, 對家長參與度既要求又唔高, 好啱我地D要返工既媽媽

---

講完報學校, 就講返小豬PN上學期既評估啦... 由於我日日去接放學, 所以班主任話唔好係家長日特登返學校啦, 搵日放學傾就OK啦, 當時, 我都覺得OK架, 不過原來家長日會播片, 我就miss 左啦=.=" 唯有等學期尾既DVD啦...

班主任說小豬主要既問題係坐唔定, 係完成動態既活動時, 一D問題都冇, 但完成靜態既活動時, 就梗係要郁來郁去先完成到, 形容為個pat pat 裝左彈弓... =.=", 建議可以係屋企玩下D遊戲, 提升小豬既專注力, 又可以參加下D畫畫班同Drama 班...

至於其他方面, 基本上都冇問題, 社交計能OK, 容易同老師同學做朋友, 大部份時間識得分享, 學野都冇問題(不過再四圍彈彈下, 就好難講啦=.=") 整體來講係一個happy girl, 就算俾老師話, 轉個頭就會唔記得左(都唔知係咪好事)成日都好開心

講完一輪, 就派返份評估表... 都OK啦, 大部都係4個手指公 (最多係4個手指公), 係紀律相關既就3個手指公, 雖然我好想講, 希望下學期會有進步啦, 不過, 望住成日周圍跑既小豬, 我覺得短期內都係咁上下啦, 其實老師3個手指公已經好厚道架啦

話咁快, PN學年剩下唔到3個月啦 (因為依家放緊假), 希望小豬可以繼續enjoy 啦 (放左假幾日,每朝都話要返學 )

K1再面試... 8

隔左好耐, 又要再面試啦...  今次係女龍校, 本來我麻麻地想小豬讀女校, 但去交FORM時見到學校校舍勁靚勁大, 即刻改觀... 可惜小豬似乎都唔想讀女校呀... =.="

面試當日係in 12:45架, 熊熊去左山野之王, 於是我單拖出發, 諗住搭的士唔太遠啦, 所以12點出門。點知等左半個鐘的士 (call 的士竟然正常價都冇人接order... 內心不斷爆粗), 結果12:50先到學校門口... 好彩又冇話唔俾in...

入到學校, D老師, 學生同helper 都好nice, 好多人都拎到公仔同小朋友玩, 小豬都有俾反應, 玩得幾開心... 等左一陣就叫number, 入課室group-in (小豬group-in既往績, 成功率係零 =.="), 一group 有7-8個小朋友, 其中一個未入課室就狂喊, 最後個家長話放棄, 另一個見到媽咪係坐後面, 而唔係坐隔離又係度喊, 結果小豬好八掛地係咁望住人喊... 另外有2個小朋友自己走左係媽咪隔離, 結果小豬又有樣學樣想走過來, 俾我叫返佢坐低

正式interview, 家長係要填問卷既...
一開始唱twinkle twinkle little star (小豬係屋企成日都唱), 不過, 當時係冇反應架
之後, 係個袋拎個生果, 講生果名同顏色, 小豬拎左士多啤梨, 冇講到生果名, 好似有講Red
然後, 扮食生果 (冇反應, 掛住四圍望), 同俾返D生果俾老師 (有俾)
最後老師俾禮物, 有講thank you...

其實我之前唔多會理解, 點解家長會in完出來會即刻話小朋友in 得唔好, 今次完全體會到, 出到來只想同小豬講, 你玩野呀... (睇來我都幾怪獸...), 當然怪獸還怪獸, 最後我都有請小豬食雪糕. 學熊熊既講法, 唯有小一時再俾心機啦...

我覺得lei 張勁好笑, 佢自稱俾Teddy Iris XD

---

暫時in左8間, 有3間出左成績, 小豬有2個am offer, 1個pm waiting...

waiting 果間係城中名校, 真係好多人爭, 小豬當日既表現幾好 (即係自己話俾老師知, 自己好乖好合作果間), 所以冇offer我覺得幾可惜...

聽講今個星期仲會有2間出成績, 希望有好消息啦~

另外, 聽日就係最後一個面試, 平常心地加油啦~

繼續K1面試... 567 ... Part 3

星期六係567既最後一間, 面試前2日上網睇面試時間, in 朝早11點...

星期六朝早好凍, 好彩之前果日啱啱執左冬天衫... 小豬有件乾濕褸...

本來出門時著得好開心架, 不過上左車就除左, 落車叫佢著就唔肯啦... =.="

最後要出動糖先肯著返...

我地in 11點, 10點就出左門, 點知塞車塞到爆, 差DD就遲到... 然後, 我又勁大頭蝦, 交信封時唔記得貼郵票... =.="  好彩學校可以即場買... 

係等候室玩左陣玩具就去課室出面等面試 (唔知點解, 星期五同星期六既面試, 小豬都有同其他小朋友搶玩具... =.="  之後問學校老師, 老師又話係學校冇咁既事喎... )係課室外面等左陣, 小豬有D扭, 所以我就拎左貼紙出來俾佢玩, 然後一個外籍老師出來叫小豬去interview, 小豬就俾左張熊貓貼紙老師, 仲要問人"what's this?" =.=", 不過老師都好配合咁講... O.. it's panda...

入到interview, 首先係問字母 (小豬識晒), 然後係數字 (小豬將5講成左S,. 要老師提水先答返啱)

第三題, 係圖片題, 一家三口飲茶... 主要係問顏色 (識), 然後指住個男人問係邊個, 指住個女人問係邊個 (答左daddy 同 mummy), 最後問個女仔做緊咩野 (識答 eating)

咁就完成

中間既插曲係, 小豬in in 下突然指住自己隻錶同老師講 Minnie... 老師都有應下佢 (希望唔會覺得佢唔專心而扣分啦...)

雖然小豬lei 個interview 都表現得唔錯, 不過間學校係龍校, 勁多人爭, 而題目又好淺,  所以應該都係等抽獎架咋...

--------

in 左7間後, 仲有2個龍校未in... 然後就等六合彩開獎啦...

雖然好大機會最後讀返依家讀緊既果間, 不過, 成個面試既過程都令我覺得小豬大個左好多, 亦好有進步, 所以要掌聲鼓勵~ yeah~  (不過隻豬都衰左好多, 成日都趁機要求食糖食雪糕... =.=")

繼續K1面試... 567 ... Part 2

面試567係由星期四開始, 連續3日每日一間... 好過234小小啦~

第6間係屋企樓下既幼稚園, 好近, 但都好難入, 上年我覺得考得幾好, 但都冇offer... 今年就... 註定小豬係要搭車返學...

考1500, 我去左另一間幼稚園交form 再帶小豬去面試, 點知交完form俾人點左行好耐先到港鐵站, 所以最後係要跑返屋企架... 一早見時間唔夠, 就已經叫99帶小豬落樓等我... 見到小豬... 嗯... 好似啱啱喊完, 因為瞓左一個鐘晏覺就被叫醒所以發脾四...

係樓下in既好處係超近, 但永遠越近既地方越容易遲到... 我地真係差D遲到 :P

係門口玩左陣就開始interview... 首先係group in... 6個小朋友, 分左2間房... 我地果間第3個小朋友未入房就開始喊, 老師話可以坐係爸爸既大脾, 佢都唔肯, 最後得2個小朋友in group in... Group interview 由外籍老師帶, 幾簡單又好短(可能得2個小朋友), 唱hello song (冇反應), 之後就假裝係花店, 問小朋友花既顏色, 然後叫小朋友拎2枝指定顏色既花, 阿囡要拎2枝粉紅色, 不過佢拎左一枝粉紅一枝紫 (我覺得枝紫色真係唔太紫, 最多叫桃紅) 然後唱goodbye song (有唱有做動作...)

然後就individual interview, 好難...

一開始拎左4個人樣出來, 2個開心2個唔開心, 2個長頭髮2個短頭髮, 2個戴眼鏡2個冇戴, 老師要求小豬指出邊個係短頭髮開心既... (個心寒一寒... 唔係呀...) 小豬一指竟然指中喎 (應該係撞手神), 然後老師可能都咁覺得, 竟然問多一次喎, 結果小豬即刻好confuse, 之後搞左一大輪都指唔到... =.="

然後, 繼續同果4個人樣玩, 要揀個戴眼鏡唔開心既 (又係搞一輪), 然後, 將個公仔頭放上一個公園既map上面(個map 係得幾條路, 好簡單既果種), 要小豬帶個公仔去有紅色細杯既終點 (有4個終點, 分別係紅色既大杯細杯, 綠色既大杯細杯) 小豬指到邊度係紅色既細杯, 但要佢拎住個公仔係個map上放到終點, 真係太難啦掛 (可能我太hea, 從來都冇諗過要教lei D)

之後, 老師拎左2本書出來, 要小豬揀一本, 同媽媽一齊睇書 (由於知道衰硬, 就疊埋心水同小豬睇書啦) 小豬講得晒書上所有既動物出來, 老師都有問幾句.. 

咁就考完啦...

第三part ,同上年一樣, 小朋友玩玩具, 家長填問卷 (問卷內容好似都同上年一樣)然後見校長拎禮物走人...今次校長係同小朋友傾計... 我覺得作為校長應該一視同仁, 唔應該見到有興趣既小朋友就問到好多問題, 冇興趣就叫問名同bye bye... 我地果group有5組, 第1組校長問左起碼有6-7條問題, 第2個小朋友,答問題時要攬住公仔, 校長只係問左名, 就俾左份禮物佢, 小豬係第3個, 交問卷俾校長時有小小拋俾校長既感覺, 但係真係小小... 校長說要重俾, 小豬又企左係度好confuse, 然後校長就問名俾禮物就走得... In完之後, 我同小豬去左vv, 去完vv經過見校長既課室, 見佢仲問緊我果group 既最後一組小朋友...

---

可能覺得小豬冇機會入lei 間, 所以對lei間既印象真係麻麻... 第一佢D題目太難, 可能佢自己PN班既小朋友係答到,但我諗大部份學校都會覺得一個唔夠3歲既小朋友係唔駛識lei D既 (因為冇其他學校考過) 第二就係做為校長應該要公平, 如果連見夠幾分鐘都俾家長覺得偏心既話, 家長又點會放心將小朋友交俾你呀 (well, 同lei 間學校只可以話大家睇唔順眼大家啦~ :P)

繼續K1面試... 567 ... Part 1

Lei 期都係講面試, 原來K1既面試schedule真係密過PN好多呀... 我到左上個星期六已經好hea啦, 一心只希望快D完 (好彩星期六既interview 好短, 遲D先講)

面試5係全城大熱既幼稚園, 係好好好多人in呀... 我地in845, 第一日既第二個時段... 其實果日係早到左半個鐘架, 不過好白痴咁係隔離街既車度等, 冇走去望下... 如果見到果條見唔到尾既蛇餅就一定會早D去排... 最後8點半先去排隊... 雖然係校外排左唔係好耐, 但係校內既唔同位置都排左輪, 結果要到差唔多10點先出得返來 (熊熊係校外呆等成個鐘, 見我地出來就走去返工啦... 早知就直接去返工啦~~~)

等緊冇野做, 當然係影相啦...

入到去, 係門口又排左輪, 交完資料又等左輪, 上到課室門口又等左輪之後, 終於係group interveiw 啦... 所謂既group interview, 係5個小朋友坐埋一齊玩lego, 然後就會有個老師行埋去同小朋友傾下計,而家長就坐埋一邊望住小朋友 (well, 我寧願家長係出面等, 起碼小朋友唔會玩玩下行埋家長度)

老師同小豬傾計時, 小豬好似冇理佢, 一味係度砌高 (對小豬來講, lego 係用來砌高架咋... =.=")佢一直砌一直砌, 直到對面個小朋友話"哇...好高呀..." 然後伸手去拎...  well... 真係冇眼睇... 小豬當然唔肯,想拎返, 然後, 對面個小朋友就掃左幾舊lego 落地, 小豬就扮晒野咁喊左一下... 再然後, 2個小朋友就好似冇事發生咁繼續玩面前D lego喎... well , 我其實覺得2個小朋友都好得喎, (雖然老師都有問小豬發生咩野事, 小豬好似繼續唔理老師), 咁樣都可以唔打交又唔喊既情況下完成左個group interview, 然後各自拖住媽咪去下一個課室... (希望老師都係咁樣認為啦~)

去到下一個課室又係等, 有2張枱interview 緊, 其他人就坐係後面等... 我其實應該係果一組既第一個, 不過唔知點解搞搞下搞到差唔多最後一個in... 不過係小豬仲肯等既情況下, 最後一個都幾好, 我可以係人地In 緊既時候, 盡下人事教下小豬... XD

終於有得in既時候, 已經係950lu..., 家長係要填份問卷既 (D題目都幾難), 不過我見D老師對之前D家長講, 填唔晒唔緊要架..所以我係HEA填 (4條問題只寫左2條), 主要睇下小豬搞成點...

首先問名同年紀, 小豬話自己1歲, 老師問左幾次先講返係2歲... =.="

第一題, 老師拎左個冇五官既人樣出來, 要小豬痴眼睛同嘴巴 (做到) 指人樣同自己既耳仔(做到),問耳仔用來做咩野 (唔答, 只係重覆耳仔... 唉..係屋企問10次, 10次都識架... )

第二題, 睇圖片, 搵3隻lei埋既小動物, 小豬一見到就搵晒出來 (不過,小豬搵到既時候, 咁啱有工作人搵果個老師, 好似俾野佢, 所以係睇唔到小豬做緊咩野... ) 幸好, 老師再問小豬, 小豬都係搵得到既...

第三題, 老師示範推住架車, 然後講bubu, 就"禁"住架車... 老師示範左2次小豬都係唔識... (不過都預左, 諗唔到可以點樣提水..)

第四題, 打開個膠盒, 用匙"不"2粒紅色既珠仔落個碗度 (lei 題有D擔心, 因為小豬平時係要不晒所有野去第2度先會停手架, 而且, 佢仲係唔多識數數... ) 不過lei 題有驚喜, 做到...

第五題, 俾左2個檸檬茶盒, 一個係吉既, 一個係有野既, 要將有野果盒俾媽媽... ( 我覺得lei 題難, 係等緊既時候, 有解過俾小豬聽) 小豬拎起一盒, 話"冇野既..." 拎起另一盒話有喎, 就俾左我...

第六題, 老師拎左張印左6個生果既圖片同一張得6個格個紙, 要小豬照住印左生果的圖片, 將生果圖片放返係張空白紙 (lei 題冇睇, 因為張問題實在填得太慢 :P) 好似都OK既...

最後一題, 又係唱歌題, 小豬自己揀左唱太陽伯伯, 第一句唱得好大聲, 之後就越來越細聲... 不過都算唱晒既... 

最後收禮物, 有講多謝, bye bye 同推返好張櫈

in 完之後, 即刻走去隔離街, 換衫返學 (不過都遲左9個字 :P)

對於今次既interview, 我覺得幾满意, 雖然都知道咁既水準應該都係唔會收架, 不過, 我見到小豬既進步, 所以要掌聲鼓勵~ 小豬對於自己既表現都好满意, 一返到學校就話俾老師知佢今日好乖好合作... =.="

--- 

另外, 仲有件趣事, 係幼稚園中移動排隊時, 見到有個家長係門口同人講緊... 類似"我知道你都唔會收我個仔架啦, 但唔可以唔俾我In" 咁上下啦... 前幾日同個frd 既frd 講起幼稚園既interview,先知原來果個家長就係佢, 佢唔記得寄返份form俾學校 (去到Interview時先發覺), 但又想個仔失望, 所以唯有硬住頭皮力爭... 最後學校都有俾佢地in... 呢個世界真係細呀...同埋媽媽真偉大, LEI D野都只有媽媽為左仔囡先肯做

---

係8日內in左6間, 真係好辛苦 (因為大部份都會要求交問卷, 所以我已經作左N次文啦)

仲有2間龍校未in, 估計都要到11月尾先再in啦 (等我可以抖下...)

暫時in左7間, 有兩間出左成績, 小豬有2個am offer...

不過我都冇留到位 (今年既留位費好貴呀, 所以要諗清楚先留) 

希望繼續有好消息啦~ 但之後果D既競爭實在太大啦, 應該好難再有offer lu...

K1面試... 234

剛過既週末, 係面試高峰期, 小豬2日共有4個面試, 其中3個仲係同一日...
1日3個面試太多啦, 所以最後取捨左一個 (果個上年都有去in, 雖然熊熊都幾鐘意果間, 但位得1X個, 又多人爭, 所以就放棄左)

星期六既第一站, 全城出名既一條龍女校, 歷史悠久, 一條龍得來仲要收學券, 真係超正架 (雖然我唔太想小豬從幼稚園就開始讀女校, 不過收既機會仲細過中六合彩) 學校又係收好少人, 又係勁勁勁多人報名, 所以我地都係參與下啦~
由於當日四圍都好塞車, 我地預早左好多去, 但都剛剛好趕到, 再加上學校說影相會DQ, 所以真係一張相都冇影

去到排隊登記時, 有D小朋友喊緊唔肯落地 (係小豬後面果2個都勁喊), 我果下有D擔心小豬係跟埋一齊喊, 不過返學既日子有功, 小豬已經唔會俾其他小朋友影響lu... (叻叻~)雖然小豬都有示意要我抱, 不過俾我用唔知咩野理由打發左, 而後面喊緊既2個小朋友, 一個喊左陣冇喊啦, 而另一個就被請左入喊喊休息區
排左一陣, 就被請去課室門口繼續排, 有義工家長帶住小朋友唱歌 (小豬繼續冇反應) 唱完2首就要入課室啦, 仲要係小朋友自己入, 家長係出面等(lei 下幾堅, 好彩我睇左張面試通知書, 有提過, 所以一早就同小豬講定) 有D家長真係去到要放小朋友入課室果下先知係小朋友自己interview... 家長係課室門口等30秒, 如果小朋友冇爆喊, 就可以出去另一邊等啦 (排小豬後面果個小朋友又變樹熊呀, 不過我冇留意佢最後有冇被請入喊喊休息區)
我係出面等左陣, 小豬就出來啦, 以我觀察大部份小朋友都好開心咁出來... 我有試過問下小豬同老師玩咩野, 佢當然後唔答我啦~ 都好啦, 眼不見為淨 XD

---
星期六第二站, 新校一間, 新到連校舍都未裝修好, 所以借左澳洲國際學校來面試... 報LEI間係因為PG強力推介 (PG既founder 將會係lei 間既其中一個consultant), 應該唔會讀LEI間, 但會有興趣上下佢D興趣班...

一去到, 先被請入遊戲室玩, 小豬一去到見到有波波池就兩眼發光, 第一時間除鞋跳左入去(屋企個波波池又唔見佢去玩, 正一隔離飯香...) 玩左陣, 老師就要求大家移去隔離音樂室 (好彩小豬都肯乖乖走人, 我真係有D驚佢唔肯走, 然後發脾四...) 去到音樂室, 有大中細B一齊跳舞(小豬係中B, 有個再大一年, 考K1插班既, 同埋有幾個細一年, 考PN既) 唱左1X首歌, 小豬終於warm-up完, 開始跟住一起跳既時候, 就已經跳完啦, 又被要求再去遊戲室玩多陣... =.="

又玩左陣之後, 就去面試啦, 面試係以玩玩具方式進行, 考下顏色, 數數字, 生果等... 小豬仲唔係好識數數字(即係老師話要3個蘋果, 小豬要識得係一堆蘋果中拎3個出來), 我覺得lei part幾難, 其他都OK, 雖然有一堆玩具搞到小豬唔多專心, 不過都預左係咁上下架啦~ 臨走時, 老師送左個貓咪公仔俾小豬, 小豬勁開心... 咁就考完...

---

星期日, 另一傳統名校, 歷史悠久 (雖然明知買左六合彩係唔會中既, 但都會去買下... 同一心理)

原本俾小豬著第二套戰衣... 但係... 總覺得好奇怪 (應該同個髮型冇關既............. XD)

最後忍唔住係搭地鐵時同佢換左 (LEI輪小豬成日都話要搭地鐵, 知道有得搭時就超開心...)

好彩係求其拎左條裙出來, 上年都有著來面試架, 不過今年就變左超短裙 XD

排隊入學校時, 無野做, 影下相... 

well... 係角度問題, 唔關個髮型事架~ :P

排左陣隊, 然後學校好奇怪咁分左男女隊, 分開入去面試 (真係唔知點解)

LEI個面試, 有D難度, 雖然家長係同小朋友一齊去面試, 但學校都安排左2個老師, 一個主力問家長, 一個就考小朋友, 家長好難又要答好D問題, 又要望下可以點樣幫下個小朋友... 雖然之前已經mock 過一次, 但係我自己依然答得唔多好得來, 又基本上理唔到小豬D野...

我見得到既考題係, 首先玩形狀配對, 係蜜蜂, 蘋果, 蝸牛同樹, 小豬雖然唔係一下就放得到入去, 但佢就用左我教佢個轉轉法, 轉下轉下就4個圖案都放晒入去

之後係考立體拼圖 (我覺得都有D難, 因為正反面既圖案係唔同架), 我諗老師有幫下小豬既, 聽到老師話俾小豬聽反轉左, 之後應該完成掛...

第三樣, 係看圖題, 老師指住一張圖, 要小豬指出各種物件係邊度, 然後, 再難D既係, 指住個人問小朋友佢做緊咩野 (小豬有答到沖涼涼... 不過唔知啱唔啱)

最後, 係最易亦係最難既唱歌啦, 小朋友要任唱一首歌... well, 要小豬自己唱歌, 佢可以一口氣唱10首8首, 但係前題係冇人既時候呀, 臨瞓前呀, 總之係佢想唱既時候, 唱歌真係好易... 但要佢係老師面前唱就好好好難呀... 老師一開始揀左ABC song , 小豬識唱左成年有多, 聽佢唱左幾百次都有呀, 但係老師面前就係唔肯唱, 然後老師叫我幫小豬揀一首, 我揀左ten little witches (今期大熱), 再加上我提返佢, 係老師面前唱左歌, 我就應承做D野 (由之前果晚瞓覺前, 我就話俾佢知, 如果肯係老師面前唱歌, 我就請佢食雪糕), 終於小豬用從來都冇咁細既蚊滋聲唱完首歌啦... (掌聲鼓勵~~~)

唱完歌, 就走得啦~ 一出課室, 小豬就同我講雪糕呀... =.="

--------

咁就完成左差唔多一半既面試啦~

暫時in左4間, 有一間出左成績, 小豬有am offer... 

希望繼續有好消息啦~

K1 面試... 1

N班大作戰完成好似冇幾耐, 又到K1啦~
其實對於小豬依家讀緊既果間, 我覺得so far 都幾好, 只係貴左D, 所以K1主要想搵D一條龍既學校又或者試下D再出名D既幼稚園 (主要係熊熊係咁叫我報 =.="), 當係玩下啦 (實在唔敢抱好大期望
最後, 預計會報10間, 其中3間一條龍學校未開始報, 其餘既7間已經出晒面試時間表啦。 有2間撞左時間, 所以我地只會去其中一間...
面試前既準備工作係...

報名相

其實我覺得未必有好大作用, 不過每年有張靚相都幾開心...

然後, 係戰衣...

襯左2套,可以以防萬一

再然後,當然係幫小朋友準備面試啦... well, 呢方面除左PG有安排左1-2次既mock interview (其實係俾我既)之外, 其實我冇幫小豬做D咩野特訓, 唱歌同玩玩具就平時做開既, 教形狀都係平時做既 (佢D形狀係上2個星期先開始OK D, lei 樣野有D小朋友歲幾就識啦~ =.=") 顏色既中文有時仲係講到亂晒咁, 不過英文就OK啦... 其他, 就希望小豬當日心情靚靚又遇到個笑容好DD既老師啦~

---

上個星期五, 係小豬第一個K1面試... 

間幼稚園其實同小豬依家讀緊既好類似 (好似小豬既校長係lei間既校董?), 不過LEI間學費平D, 所以諗住見來warm-up 下...  而事實證明真係要warm-up架, 我....

去到學校, 我先發覺, 又冇幫小豬帶水, 冇安慰零食, 冇濕紙巾, 冇帶小玩具, 簡單來講就係咩野都冇帶 =.=" 好彩學校開放左個playground俾小朋友玩住來等, 個滑梯又好滑好好sir, 小豬玩得好開心, 雖然媽咪咩野都冇帶, 但小豬又一樣都唔需要...

去面試, 分為2 part, 1 part 係家長面試, 由我負責, 另一part 係小朋友既group interview, 由熊熊負責...

家長部份, 有2個家長輪住來答, 共4條問題,  每人每題45秒 (其實我覺得一個個見都係差唔多者, 雖然我隔離既家長好鬼勁, 令我覺得自己D答案好似小學生咁...=.=")

小朋友部份, 跟據熊熊既講法, 小豬係零反應... =.=" 連自己叫咩野名都唔肯答 =.="

熊熊話, 個老師係個好肥既印籍女仕, 可能小豬有D驚掛, 全group 7個小朋友, 得1個小朋友係有講到自己叫咩野名, 之後有講故事時間和跳舞時間, 但小豬 (同埋其他小朋友)都係冇咩野反應, (其實講既故事係有關猴子食生果, 小豬應該係識晒啦... 唱歌都只係唱Hello Song 同Head and Shoulder , 小豬平時係屋企係一邊唱一邊作動作架) 所以今次既面試係百分之百失敗架... :P

不過唔緊要啦, warm-up 下啦, 希望來緊既面試好運D啦~

臨入學校前, 影張相先...

好乖咁企定定俾我影, 不過個樣唔駛咁唔满意掛...

都係有得玩先開心~

來緊既一星期就in埋報左名既果幾間幼稚園啦, 要加油呀~