年終篇

呵呵呵... 個blog 停寫左大半年呀... 要係2015年最後一日寫返個年終篇, 幫小豬總結下今年先...

瑤瑤豬, 44個半月大, 102CM 高, 38磅... (好耐冇度高, 但就啱啱磅左重...)

食野方面, 冇以前咁鐘意食菜同生果, 但就開始鐘意食肉, 特別係雞肉。識食左好多, 見到好野 (例如黑豚肉, parma ham (仲要係36個月或以上既), 鮑魚等) 就搶住來食. 平時食飯食一半就開始冇耐性要人餵 (唉, 以前覺得追住小朋友餵飯係好唔要得架..., 依家, 只可以做到唔追住咋... )
飲奶都係早晚一枝, 共16安士, 未戒奶樽, 因為朝早6點果枝奶仲係瞓住食... 不過我又覺得冇所謂啦, 一日24小時, 得15分鐘係用奶樽, 應該冇咩野影響掛...

瞓覺方面, 平時仲係瞓緊3個鐘晏覺, 所以夜晚唔肯瞓, 日日朝早都要剷佢起身返學, 係一個惡性循環...不過自己每日都起碼8點幾先返到屋企, 又要再做功課, 玩, 講故事, 又好難叫佢早D瞓既, 唯有希望遲D會好D啦...  小豬有得玩時係可以唔瞓晏覺架, 有試過直踩到夜晚12點, 跟住瞓到第2日11點半既記錄 (似足我=.=") 好消息係, 小豬由今年7月開始戒夜片啦, 到依家為止都幾成功, 只係失手左2-3次, 我覺得好好成績架啦...

返學方面, 間學校真係happy school, 雖然學校被稱為好商業化, 但小豬 (同埋佢D同學仔)都好鐘意返學, 每日都勁開心咁衝入學校, 返到屋企成日都會有新歌聽到, 我已經好满意啦... 上到K1, 每日都要做功課, 都幾辛苦D阿爸阿媽 (即係我), 今個月仲開始寫字添... 唉... 好想我幫佢寫左佢...=.=" 來緊1月中仲有考試呀... 不過hea 媽如我成個假期都帶住小豬週圍玩, 好似冇溫書... 希望佢有用心上堂啦 XD

6月尾, 愉快既PN學年終於完左, 家長一齊搞左個gathering  (其實係家長好想影相XD)

6月30日, PN 班last day, 當晚就飛左去布吉lu...

第一次搭送機, 第一次小豬係飛機上瞓覺=.="

個旅行冇行程, 主要係酒店泳池邊hea... 不過老公都幾辛苦, 陪住小豬跳涯跳足30-40次...

真係you jump, I jump... XD

8月中... 小豬第一次游船河...

玩得好開心, 都肯落海玩...

不過玩得太開心時... 趕唔切去VV呀 (失禮晒... :P)

學校既中秋節便服日... 同學仔都好可愛呀...

小豬件衫, 著左第2年啦... 小小緊... 

( 其實金魚燈籠都係第二年用啦... 上年阿囡唔捨得掉, 今年一玩完就bye bye lu)

某日, 單拖小豬同D PN同學仔一齊去左迪迪尼...

呢個係小豬第二次入迪迪尼, 識玩左好多 (第一次得個歲幾)

好勁咁係10點半入場, 玩到睇埋煙花先走... 小豬玩得好開心 (但就熱C我啦)

好彩地, 小豬冇因此迷上迪迪尼 (雖然佢間唔中都有提下要去玩)

國慶假期, 去左沖繩玩呀... 雖然只係4日3夜, 但小朋友都玩得好開心...

老公們, 就好開心咁偷得半日閒出海釣魚...

老婆們, 當然係勁開心咁shopping 啦...

(對上果次去沖繩, yen 係10算架, 今次係6.5算... 真係勁開心)

出發前, 老公話帶個紅白藍去.. 我=.="

不過最後個紅白藍win晒... 裝到超超超多野...

旅行返來... 仲係好鬼熱...

搵左一日去BBQ... 同放風箏...

小豬第一次BBQ, 佢好開心, 但就唔食野, 只係狂食腸仔...

另一個某一日, 單拖同同學仔去左海洋公園...

玩得好開心... XD

期待左好耐既學校旅行

今次既行程緊湊好多, 小朋友又個個大左D, 互動多左好多

但個lunch就比上年差左好好好多... 

小豬仲勁好運咁抽中到全車最大份禮物添... (瞓覺都要攬住 XD)

最後散水時, 小豬驚覺唔見晒D朋友仔, 竟然開始喊...

某日去左玩渣打嘉年華 (如果唔係有小朋友, 肯定唔知有呢樣野)

小豬第一次玩畫面, 又肯俾去面人地畫喎...

雖然個個攤位都多人排隊, 又唔係檔檔啱小豬玩. 不過有朋友仔一齊玩點都好開心

係横風横雨既星期六, 小豬第二次去露營, 第二日朝早仲要係全年最凍既朝早=.="

阿囡玩得好開心, 好快就同隔離營既小朋友混熟左

我就覺得張充氣床墊真係唔多舒服... (可能我太重, 郁唔到=.=")

不過小豬都應該瞓得麻麻, 第二朝11點幾就自動補眠左成個鐘, 1點幾又夾硬被我拉住瞓覺, 瞓左一個晏晝

小朋友既重頭節日, 聖誕節

同上年一樣, 小豬超極期待

今年學校有4日便服日, 日日都著到紅噹噹咁返學...好開心

聖誕假期最後一擊

採士多啤梨, 餵小動物同BBQ

可能天氣太熱, D士多啤梨已經爛左好多, 好少收穫 (雖然都好好味)

至於餵小動物, 小豬已經好熟手, 知道要met 開D菜, 慢慢餵, 所以買左一包菜餵左好耐

夜晚去左另一個場, 釣蝦釣魚同BBQ, 朋友好勁, 釣左6條魚, 即刻燒來食好好味呀...

勁開心既一日, 玩到11點幾, 一次過满足晒大人同小朋友

超極濃縮咁寫左小豬2015年既下半年... 希望2016年可以寫多D啦...

2016年希望小豬繼續健健康康, 開開心心啦... 

(就來做家姐, 唔好呷醋呀, 要鍚住咩咩呀 XD)

每年一影...

每年都會幫小豬影次相 (其實我想影多幾次, 可惜我家大少一年只俾一次quota...), 每年都買個groupon, 不過今年係第一次試小型既studio...

去到... ops... 細到lei..我諗得200呎左右掛, 同埋間studio應該唔係專影小朋友, 所以好少玩具... 小豬又超hyper咁走來走去, 個摄影師哥哥一開始都有逗下小豬既 (第一個景時), 之後屬於半放棄... 前果晚又同我家大少吵架了, 所以, 大少又係放棄狀態, 我就真係冇眼睇... 個攝影師哥哥竟然叫大少影左一個景之後就冇再叫佢影喎... 唉, 算...

個package 係300左右, 再加左$1200 買晒D相... 都OK啦

D相既效果都OK, 睇相真係睇唔出個studio 咁細喎..

今次只可以當係個教訓啦, 下次買groupon 前真係要上網睇睇先...

影完相第2日就帶左小豬去剪左冬菇頭, 咁樣游水就方便好多啦~

不過, 我都唔多睇得慣, 用左幾日先認到小豬既背影... XD

第一次學校親子旅行

第一次親子旅行呀... 所以我強逼熊熊要一齊出席 (好彩好多家長都相當重視今次既活動, 都係2拖1咁出現, 唔返肯定俾熊熊哦... :P)

大致既活動係, 返學校點名, 上巴士, 去西貢獅子會, 參觀, 玩遊戲, 去全記食飯, 落巴士返學校, 解散... (我估間間學校都應該係咁上下掛), 不過學校都總會做D满足下家長既野...

例如, 係學校點名時, 老師又會安排D小朋友出來一齊唱下旅行歌, 早操歌, 然後, 一大堆家長就勁開心咁係咁影住D小朋友。上到巴士, 老師又同小朋友一齊唱歌玩遊戲, 完全冇悶場

去到獅子會, 老師帶住D小朋友睇下D植物, 影下相, 然後就放自由活動, 參觀下D展館 (D小朋友係搭住膊頭咁行架, 好得意呀...) 然後見到D其他幼稚園既小朋友, 佢地應該唔係親子遊, 冇家長同行, 我覺得D老師真係好堅, 俾我帶住一個都覺得辛苦呀...

自由活動完一輪, 又gather 一齊玩遊戲, 影班相, 之後就走人去食lunch啦 ( 果日好熱下, 班主任又好醒咁提D家長帶埋夏季運動衫去替換)

係全記既lunch, 雖然唔係海鮮餐, 不過都算唔錯呀, 有魚有雞有蝦仁, 好似都有成8-10個餸架... 其實原本係去唔知邊間食自助餐, 不過果間突然結業, 所以臨時轉左全記。聽同班既媽媽講(佢個大仔都係讀LEI間), 全記好食過果間自助餐好多呀... 聽完勁開心... XD 不過一班小朋友係一齊又點會乖乖食飯 (起碼小豬一D都唔乖,. 食左幾啖就不斷要去洗手間, 然後就直頭同D同學仔一齊跑來跑去lu.. =.=")

食完lunch, 係西貢有小小自由活動時間, 我地去左橫街行左陣, 不過買芝士買得太開心, 結果班主任打俾我話, 得返我地未到咋... =.="

回程時, 又玩左遊戲, 仲有抽獎活動添... 小豬都有份中獎.. yeah... 最後3點準時返到學校... 

就咁樣, 有D貴但又好愉快既親子旅行就完成啦... 期待下一次, 聽講K1既係秋季旅行...

回到過年時

過埋復活節都未寫過年野, 睇來個blog 好快要生菇菇lu... =.="

其實年年過年都係差唔多...

年初一, 去99度拜年

然後一齊出去郊遊, 去車公廟同林村許願樹

人大左, 連願望都年年一樣lu...

唯一唔同既係, 今年既開年飯好搶手, 最後要返屋企附近先有得食...

去到屋企附近既酒樓, 又得返張對住神枱既位, 99唔鐘意, 又等左一大輪

最開心既當然係小豬啦,.. 等緊都有好多野玩...

初二, 走兩場...

先去熊熊婆婆度拜年, 小豬最開心, 因為又有得玩

著住唐裝玩滑板車都幾型呀... XD

玩左幾個月滑板車, 已經好純熟下, 可以係斜路沖過來, 轉個靚彎再剎停

媽媽我係隔離見都真係心都離一離...

下半場就係娘家拜年, 婆婆煮左好多餸呀...

可惜冇影相

初三, 初四返大陸

探完熊熊嬤嬤之後再去探契公公...

去到邊度都搵到野玩...

坐係琴前面都好似模似樣呀, 可以對手出賣左你喎... :P

之後果幾日, 熊熊返工, 我就帶住小豬去我媽度hea...

有人幫手睇下小豬, 幾好 XD

過年就好似lei 篇流水blog咁, 勁快就過完lu...

下篇寫小豬第一次既學校親子遊(流水篇)啦... XD

3歲快樂~

話咁快就3歲啦...

媽媽好唔捨得你大得咁快呀, 因為大左就等於曳左, 有主見左, 我又勞氣左...

不過望住你健康快樂咁成長, 只可以話勞氣就勞氣D啦... 

希望你繼續開心愉快咁玩玩玩, 食食食, 瞓瞓瞓啦...

如果可以聽聽話話, 坐定定就更加好啦...

多謝你俾我同一齊成長...

K1大作戰之總結 + PN上學期發展評估

K1同PN大作戰都係草草結尾... 係我太懶...

K1既最後一場係14年12月頭架 (實在係好耐之前)... 又係勁多人報既龍校, 培正...
學校講到明係小朋友自己去考, 所以我都唔知佢考咩野... :P
小豬只係冇喊咁入左去 (其實讀左幾個月既PN班, 唔喊都好應該既), 過左陣就好開心咁拎住張貼紙走出來... 當然, 問佢考過D咩野, 小豬只係答瑤瑤... =.="
結果當然後冇收啦...

K1大作戰既結果係, 9間學校, 有2個offer, 7個waiting / reject. 由於有offer 果2間我都冇留位, 所以最後就原校升K1

總結來講, 我對於LEI個結果, 多少都有D失望, 因為有好幾個面試,  做媽媽既係覺得小豬做得好好 (起碼相比起自己係好有進步). 可惜最後都冇收。可能龍年效應實在太強掛, 咁另一方面, 今次冇offer 既7間學校, 有4間既龍校, 另3間都係勁出名既學校, 係我要求得太高掛... 所以, 希望通過今次既K1大作戰後, 我可以係考小學時, 為自己做好心理準備, 搵D適合小豬既學校啦~

講返轉頭, 好彩小豬都好鐘意依家 返緊既學校, 而我都覺得間學校唔錯 (雖然學費幾貴, 返學時間又短, 又多假期, 又被坊間講為非常之commercial), 老師好有經驗同愛心, 學校本住收得你錢就做得好好睇睇既想法 (個想法係我自己安架 :P) 逢年過節都令到小朋友開開心心, 每份過節既禮物都唔求其, 對家長參與度既要求又唔高, 好啱我地D要返工既媽媽

---

講完報學校, 就講返小豬PN上學期既評估啦... 由於我日日去接放學, 所以班主任話唔好係家長日特登返學校啦, 搵日放學傾就OK啦, 當時, 我都覺得OK架, 不過原來家長日會播片, 我就miss 左啦=.=" 唯有等學期尾既DVD啦...

班主任說小豬主要既問題係坐唔定, 係完成動態既活動時, 一D問題都冇, 但完成靜態既活動時, 就梗係要郁來郁去先完成到, 形容為個pat pat 裝左彈弓... =.=", 建議可以係屋企玩下D遊戲, 提升小豬既專注力, 又可以參加下D畫畫班同Drama 班...

至於其他方面, 基本上都冇問題, 社交計能OK, 容易同老師同學做朋友, 大部份時間識得分享, 學野都冇問題(不過再四圍彈彈下, 就好難講啦=.=") 整體來講係一個happy girl, 就算俾老師話, 轉個頭就會唔記得左(都唔知係咪好事)成日都好開心

講完一輪, 就派返份評估表... 都OK啦, 大部都係4個手指公 (最多係4個手指公), 係紀律相關既就3個手指公, 雖然我好想講, 希望下學期會有進步啦, 不過, 望住成日周圍跑既小豬, 我覺得短期內都係咁上下啦, 其實老師3個手指公已經好厚道架啦

話咁快, PN學年剩下唔到3個月啦 (因為依家放緊假), 希望小豬可以繼續enjoy 啦 (放左假幾日,每朝都話要返學 )

大阪親子遊... D6

終於寫到大結局... yeah~

最後一日, 有隻豬唔肯起身喎(相既右上角), 冇辦法之下,唯有連人帶枕頭帶被一齊抱去食早餐...

一泊兩食既日式早餐... 個樣睇落唔錯, 食落普通啦...

樣樣都係好送飯架, 不過, 我朝早唔多食飯... :P

最搞笑係, 大家食得差唔多既時候, 個上菜既婶婶先話我地知, 隻生雞蛋係撈落D飯度架,大家又試下喎, 結果, 飯太少蛋太多, 變成生蛋粥咁...

食完早餐, 我地仲有50分鐘既私家風呂。原本2家人係同一時間, 一家一個私家池, 點知其中一個壞左, 所以2家人要輪流用, 酒店方面都好好咁俾我地遲一個鐘check-out

咁都好, 可以有多D時間執野

最後走既時候, 酒店仲有人著晒和服咁, 係門口揮手道別... 

為免人地企太耐, 熊熊係未搵到路既情況下, 都係開走架車先... XD

我地最後一日冇咩野行程, 諗住去貴志站睇下小玉站長, 到此一遊 

(俾2位男仕comment 係, lei 個係咩野景點呀... =.=")

我覺得主要係因為我地冇搭果程火車, 所以冇咩野睇掛

然後, 我地係路上經過左好local既超市, 買左D刺身士多啤梨當lunch, 就直去outlet 啦

去到outlet, 熊熊又去搵拉麵, 我地就行左陣

不過, 我覺得唔係特別平, 所以都唔算好有收穫

小豬買左一對波鞋, 一件GAP既衛衣

熊熊買左一對波鞋

我自己冇野買=.="

然後就去機場還車lu...

係大阪租車, 油費其實好平, 但路費就好貴, 所以如果2個人自己去, 都係唔駛租車

不過, 帶住小朋友, 租車就好方便, 一來冬日遊時 車內會暖D, 二來, 小朋友係車上通常都瞓到覺, 結果我地租左4日車, 2個小朋友都係一上車就瞓, 到站就醒, 休憩地好D

去到機場, 班機又係好full , full到安排唔到3個連位俾我地, 好彩上到機時, 都可以搵人換位

2個小朋友係機場又係好hyper 咁玩, 而大人就把握最後機會買手信同埋買酒

上到飛機, 朋友仔好乖咁, 好快瞓左覺啦, 而小豬就依然當飛機係遊樂場 =.="

期待已久既大阪親子遊就咁告一段落, 我地好勁咁基本上行晒所有既行程, 唯一唔多好既係2個小朋友都係中途病病, 不過都冇影響大家玩既心情 (主要係因為2個小朋友依然好精神) 不過, 今次用左好多心機plan 行程, 下次就變返hea 遊布吉啦, 繼續熱切期待...

大阪親子遊... D5

其實今個旅行既全名係大阪親親大自然, 摸摸小動物, 食食食之遊... 所以我地第五日既行程又係去動物園啦...

一朝早, 食個早餐先... (大家琴晚太盡興, 所以個個都起唔到身呀... 最後酒店打來房, 提我地得返半個鐘早餐時間, 然後先拿拿聲沖落去... 因為要服侍小主 (唔係, 應該係小豬先啱)食早餐, 所以冇時間影相... 早餐以自助形式, 不過不失啦... 最正係有牛奶飲, 好濃好好味, 我飲左2杯... 食完早餐, 返房浸左個親子溫泉後, 我地就要check-out 啦...

三樂莊, 整體感覺都好好, D房好大, D 人都好nice, (個serve 我地食晚飯既婶婶見朋友仔發燒, 仲拎左退熱貼同冰枕俾我地), 野食我會覺得係不過不失啦 (亦可能係我地之前果幾餐太正, 所以被比下了), 另外就係, 我地留係酒店既時間太短, 所以冇試佢既大浴場...

今日既主要行程, 就係去白濱既adventure world 啦...

小朋友好開心呀, 一去到就話要同熊貓影相啦

adventure world, 主要分3個部份, 一個係動物園, 有熊貓呀, 企鵝, 北極熊, 等等, 一份部係個機動遊樂場 (要另外收費架), 最後一部份係野生動物園

一入場, 就見到個水池, 入面竟然有幾隻企鵝游緊水喎 (即刻勁開心)

然後, 就有個草地仔, 放左2隻咩咩羊 (相比起六甲牧場既咩咩羊, lei 2隻俾人拴住左好可憐呀)

然後就去左睇熊貓...

lei 度既熊貓好活潑呀, 不斷咁爬呀, 玩水呀, 同係海洋公園見到既完全唔同, 熊熊仲話應該係收左錢, OR係人扮架... XD

不過, 又會覺得懶洋洋咁先似熊貓架

另一重點就企鵝啦...

真係超極多企鵝呀, 不過之前睇人地個BLOG話有企鵝出來散步, 去到又唔多覺喎

雖然有咁多真企鵝, 但小朋友始終對可以摸到又自到既假企鵝有興趣D =.="

朋友發現, 海洋劇場就來有得睇(個名係我幫佢改架 :P) 於是我地跑去睇...

好彩有睇咋, 真係好好好精彩, 比以前海洋公園既海洋劇場仲好睇( 即係仲有殺人鯨既時代)

成個表演有好多海豚, 睇到大人小朋友都一齊哇哇聲呀...

原本, 我地諗住去坐火車仔, 去睇長頸鹿, 點知朋友仔瞓左覺, 於是改睇熊貓BB啦...

lei 兩姊妹好可愛呀, 係上年11月尾出世架, 依家啱啱係好得意既年紀 (啱啱出世既熊貓BB好醜怪呀 :P)

然後好無聊既四個大人係度研究左好耐熊貓既家族史, 睇下有冇亂倫.. :P

小豬又有得玩機動遊戲啦...

LEI度玩機動遊戲有D唔抵, 係一個個遊戲計錢架, 大概300-400yen 一個啦

有D遊戲小朋友唔駛錢, 但就要大人陪玩, 大人就要俾錢

可以買任玩, 但我地一開始諗住唔會玩得多, 點知玩下又一個玩下又一個, 玩左5-6個

玩到2點幾, 醒起未食Lunch 喎, 於是搵左food court

我見到個幾靚既熊貓兒童餐, 於是買來同小豬share, 點知喎好食... 連小豬都唔肯食

熊熊話食烏冬 (有片熊貓頭魚蛋), 烏冬勁好味, 小豬自己食左半碗, 我都覺得好好味, 於是encore 多一碗,再俾小豬分走左D... 熊熊最後自己叫左個咖喱... XD

食緊lunch 既時候, 朋友仔瞓醒啦~

於是諗住食完飯可以去睇長頸鹿啦.... 點知搞完一輪, 4 點半既時候, 小火車已經收工啦...

唔緊要啦, 睇唔晒想睇既野, 下次先會再來架MA~ :P

下一站, 就係最後一晚既溫泉酒店, 和歌山既萬波啦 

(本來想book 另一間架, 點知12月book 都已經冇房)

我地book 左最普通既房, 同三樂莊既房相比, 就舊左小小 (不過一分價錢一分貨既)

雖然酒店細細, 但都有好warm 既一面

搭lift 時, 見到酒店寫俾我既welcome note

係餐廳食晚飯 (其實都係包房), 小朋友好開心, 因為每人有杯橙汁

LEI間D野食好味D喎, 杯梅酒又大杯D... XD

我地仲私帶左D酒去, 個上菜婶婶見到叫左一聲, 但又冇阻止我地飲喎...

最後一晚, 於是加餸... 

加既餸又再好味D喎, 特別係個魚頭, 勁得~

另外,仲有新鮮芥末俾我地自己磨, 我玩左2下就交返俾熊熊搞掟啦~

食完飯, 我趁溫泉未收, 就去feel 下露天風呂

冇人同我一齊浸,感覺好正呀(其實係室內有幾個日本妹, 

等緊我走, 我一入室內, 佢地就去左玩lu )

最後一晚, 我地繼續飲下酒, 吹吹水...

3個小朋友冇耐就去左搵周公玩lu...

大阪親子遊... D4

龜速遊記中... =.="

第四日既早餐係... 超好味既一蘭拉麵

我地朝早9點左右去到, 已經有D人排緊隊 (熊熊之前仲話邊有人會早餐食拉麵架...)

前面有10多個人, 排左半個鐘左右, 終於到我地啦(由於我地要3個位X2, 所以排得耐D)

碗麵同隻蛋都勁好味呀...

不過, 由於我碗麵要分俾小豬食, 所以冇得加辣...

小豬就勁鐘意隻蛋, 麵就食得普通啦~

我地好勁, 分開左2個3人位來排, 結果都係坐係隔離...

有隻熊想自拍, 但冇人理佢... XD

到我地食完走人既時候, 間舖出面條龍已經好長啦.. 我估起碼要排2個鐘=.="

食完早餐, 就check-out 啦~

Cross hotel 整體來講都幾好, 位置非常方便, 我地又被免費(加冇通知地)upgrade,所以覺得非常正, 個人最鐘意佢個廁所+浴室 :P

之後就離開左大阪市, 向和歌山出發

中途搵左間採士多啤梨既地方(農園紀の国), 小休一陣

果度可以放題, (1600 yer /40 min)或者採完磅重, 而我地揀左放題...

D士多啤梨好味呀, 同埋原來唔同品種D味會好唔同架...

食左半個鐘左右, 就已經食到一肚水, 要放棄啦...

唯一唔好既係, D士多啤梨係種係架上既, 所以2個小朋友都唔夠高自己採呀, 只可以負責食...

我記得係韓國, D士多啤梨係種地下架...

離開左士多啤梨園, 我地既下一站係... 繼續食...

來到超正既白濱市場啦... 不過我地有D趕時間 (未食lunch), 所以只係行左陣, 仲要分頭買酒+看住小朋友(1 group) 同埋買海鮮同魚生(另一group)

買左幾款魚生, 以海膽最最最好味 (不過唔記得影相...)

海鮮方面, 就有大蝦, 大蜆, 唔知咩野螺, 珍寶帶子, 再買左pack 和牛... 樣樣都好好味

以珍寶帶子最正, 同香港街市買既完全唔同級數, 好彈牙

原本諗住買個飯俾2個小朋友share, 點知D飯只可以堂食, 唔可以拎走喎...

再加上好多覺得佢地食得既野都賣晒 (當時大概4點左右啦), 結果買左一條魚蛋條, 同埋年輪蛋糕俾佢地. 點知, 佢地都唔係好食, 反而每人隊左4-5舊壽司白飯...

有D趕, 係因為我地趕住去酒店check-in (原本說4點架, 結果5點半先去到 XD)

我地住白濱既三樂莊, 頂樓, 所以有私人風呂, 一泊兩食, 差唔多46,000 yen /room, 係我地今次住得最貴既一晚 (其實, 包埋兩餐, 都唔算太貴)

第一次住和式房, 好正呀... 果日又幾好天, 上到房差唔多6點, 仲可以見到個海

酒店介紹, 有playhouse, 所以一放低D野就去睇下... 不過冇咩野玩... 玩左2玩, 就走lu...

因為... 係時候食晚飯啦~~~~ XD

我地係房食... 哇哇哇, 真係好大陣張呀...

4個人既份量, 放到成枱都係, 之後仲有幾個餸係等我地食完先上架

味道來講, OK啦, 又唔算非常之好味, 朋友話之前去箱根同有馬時, D野好味D喎...

哈哈, 小豬又幾襯和服喎 :P

食完野, 移師去我地間房飲酒, 吹水... 

2個小朋友都病病呀 (雖然玩埋一齊既時候, 2個都好精神)

我估冬天既室內外溫差太勁啦...

玩到12點幾, 休息瞓覺啦 (其實熊熊一早就瞓著左) 小豬就一熄燈就瞓左...

而我, 就浸左陣溫泉先瞓, 好爽呀...