2014年11月17日 星期一

31個月...

終於進入3字頭啦~~~ (其實應該上個月寫, 不過上個月冇野得來又好似好忙, 結果就... hehe...)

2歲半既小豬, 身高體重都冇再度啦, 應該繼續係個中碼B啦, 唔係, 應該話中碼小朋友先啱...

脾氣方面, Lei 輪佢D脾氣越來越臭, 不斷咁試緊我地既底線, 所以嬤嬤既地位就越來越高啦 (只限我地見唔到時, 見到既時候就會出聲阻止嬤嬤打救佢)一唔順意就會喊, 仲要喊得勁大聲, 我通常唔理佢 由得佢喊到自己收聲, 而小豬見我唔理佢, 就會走來我身上典來典去咁喊, 我都係唔理佢, 再然後佢就會自己收聲啦...
不過, 我覺得小豬由於平時爺爺嬤嬤湊, 已經寵到壞晒, 嬤嬤帶佢去會所玩, 都仲要抱住去, 話唔捨得佢行喎... (聽到真係想爆粗...)唯有自己執正D, 做下衰人, 希望小豬唔好變成港童啦...


返學方面, 小豬勁鐘意返學, 每日去到校門口, 未落車就已經係咁同門口既老師打招呼, 落左車直頭想自己衝入學校... 當然啦, 返到學校咪又係玩, 仲有人陪玩添... 之前未入LEI間學校時, 以為係勁谷型, 但係返左3個月學又覺得唔係喎 (起碼冇功課), 小豬又玩得好開心, 都唔錯呀...  唯一唔好既係, 返左學真係成日病呀... 3個月病左4,5次啦, 發燒都發左2次, 不過, 可能小豬太鐘意返學, 所以病親都係星期五放學後, 高峰期係星期六日, 星期一通常得返2聲咳, 又可以返返學喎... =.="



講野方面, LEI2個星期講野老積左好多... 例如問佢想唔想瞓, 以前佢係點頭OR搖頭, 琴日佢答, 想瞓呀 (然後繼續玩), 扭抱唔成功時, 又會同我講, 抱一下啦... 最好笑既係, 叔叔作狀想飲小豬既奶奶時, 小豬同叔叔講, 辣辣呀, 唔好呀... (笑死... 可能平時唔俾佢食既野, 都會同佢講辣辣掛, 所以佢又有樣學樣啦~) 小豬30個月去健康院跟進講野, 終於pass啦, 姑娘話佢進步得好快, 追返晒個進度, 下次去健康院就係四歲眼科普查啦

戒片方面 自從9月開始唔著片返學後, 都算戒到片, 只係換過2-3次底底... 依家出街就算著左片片, 就會示意要去廁所, 一條片可以著成日都唔濕架... 瞓覺片就可能10次濕1次啦 (不過濕親就好大包... :P), poo poo 片就係冇進展, 依然係要企係度痾, 小豬有時會同嬤嬤話要著返條片痾poo poo。 我有問過老師可以點樣處理, 老師都係話由得佢, 可以得閒提下佢, poo poo 係要坐係度痾架, 等佢自己ready 就得啦... 連老師都咁講, 我唯有由佢啦~

意外方面, 小豬由於太過好動, 真係意外頻生... 小則俾花生醬樽打到腳指, 俾廁所門既裝飾夾到手指, 俾洗手液打到塊面, 瘀左成個星期, 大至唔知點樣係房跌到個頭, 前額起左個好大個瘤
小豬係果晚(事發時係夜晚9點左右)被嚇親, 唔肯落地, 成晚要抱住同埋唔俾人碰佢個額頭, 我都被嚇親, 因為見到佢個前額起左個大過5蚊銀既瘤... 本來想即刻同佢去醫院照, 不過熊熊又咁啱果晚唔係屋企, 佢又用電話指示再觀察觀察, 我見小豬雖然唔肯落地, 但係抱住睇電視都仲係精靈, 飲水食野都冇嘔, 所以就再睇睇, 到去夜晚瞓左覺再睇, 個瘤已經退左, 只有紅紅青青咁, 但篤落去有D淋淋地... 再過多幾日就散晒lu... 真係嚇C...

再仲有就係, K1 面試啦 (8日in 左6間都幾誇張), 不過小豬都係當去玩者, 玩完又有糖食
同埋, 返左1年10個半月既PG終於唔返啦... 小豬有D唔捨得, 仲成日問起係唔係返PG呀... 好啦, 遲D有機會再去玩啦~

最後po 相... 原來越大影到既相就越少... =.="
lei 個look 唔錯, 可惜又係冇張望鏡頭...

去到太婆屋企玩, 勁多小朋友, 勁多玩具呀...

同朋友仔玩, 好開心...

開始有聖誕燈飾啦, 可惜又係唔望鏡頭

前幾日返學, 凍左好多呀, 但仲未轉冬季校服, 唯有著住私家褸先啦~











2014年11月13日 星期四

繼續K1面試... 567 ... Part 3

星期六係567既最後一間, 面試前2日上網睇面試時間, in 朝早11點...

星期六朝早好凍, 好彩之前果日啱啱執左冬天衫... 小豬有件乾濕褸...

本來出門時著得好開心架, 不過上左車就除左, 落車叫佢著就唔肯啦... =.="
最後要出動糖先肯著返...

我地in 11點, 10點就出左門, 點知塞車塞到爆, 差DD就遲到... 然後, 我又勁大頭蝦, 交信封時唔記得貼郵票... =.="  好彩學校可以即場買... 

係等候室玩左陣玩具就去課室出面等面試 (唔知點解, 星期五同星期六既面試, 小豬都有同其他小朋友搶玩具... =.="  之後問學校老師, 老師又話係學校冇咁既事喎... )係課室外面等左陣, 小豬有D扭, 所以我就拎左貼紙出來俾佢玩, 然後一個外籍老師出來叫小豬去interview, 小豬就俾左張熊貓貼紙老師, 仲要問人"what's this?" =.=", 不過老師都好配合咁講... O.. it's panda...

入到interview, 首先係問字母 (小豬識晒), 然後係數字 (小豬將5講成左S,. 要老師提水先答返啱)
第三題, 係圖片題, 一家三口飲茶... 主要係問顏色 (識), 然後指住個男人問係邊個, 指住個女人問係邊個 (答左daddy 同 mummy), 最後問個女仔做緊咩野 (識答 eating)
咁就完成

中間既插曲係, 小豬in in 下突然指住自己隻錶同老師講 Minnie... 老師都有應下佢 (希望唔會覺得佢唔專心而扣分啦...)

雖然小豬lei 個interview 都表現得唔錯, 不過間學校係龍校, 勁多人爭, 而題目又好淺,  所以應該都係等抽獎架咋...

--------

in 左7間後, 仲有2個龍校未in... 然後就等六合彩開獎啦...
雖然好大機會最後讀返依家讀緊既果間, 不過, 成個面試既過程都令我覺得小豬大個左好多, 亦好有進步, 所以要掌聲鼓勵~ yeah~  (不過隻豬都衰左好多, 成日都趁機要求食糖食雪糕... =.=")






2014年11月11日 星期二

繼續K1面試... 567 ... Part 2

面試567係由星期四開始, 連續3日每日一間... 好過234小小啦~

第6間係屋企樓下既幼稚園, 好近, 但都好難入, 上年我覺得考得幾好, 但都冇offer... 今年就... 註定小豬係要搭車返學...

考1500, 我去左另一間幼稚園交form 再帶小豬去面試, 點知交完form俾人點左行好耐先到港鐵站, 所以最後係要跑返屋企架... 一早見時間唔夠, 就已經叫99帶小豬落樓等我... 見到小豬... 嗯... 好似啱啱喊完, 因為瞓左一個鐘晏覺就被叫醒所以發脾四...

係樓下in既好處係超近, 但永遠越近既地方越容易遲到... 我地真係差D遲到 :P
係門口玩左陣就開始interview... 首先係group in... 6個小朋友, 分左2間房... 我地果間第3個小朋友未入房就開始喊, 老師話可以坐係爸爸既大脾, 佢都唔肯, 最後得2個小朋友in group in... Group interview 由外籍老師帶, 幾簡單又好短(可能得2個小朋友), 唱hello song (冇反應), 之後就假裝係花店, 問小朋友花既顏色, 然後叫小朋友拎2枝指定顏色既花, 阿囡要拎2枝粉紅色, 不過佢拎左一枝粉紅一枝紫 (我覺得枝紫色真係唔太紫, 最多叫桃紅) 然後唱goodbye song (有唱有做動作...)

然後就individual interview, 好難...
一開始拎左4個人樣出來, 2個開心2個唔開心, 2個長頭髮2個短頭髮, 2個戴眼鏡2個冇戴, 老師要求小豬指出邊個係短頭髮開心既... (個心寒一寒... 唔係呀...) 小豬一指竟然指中喎 (應該係撞手神), 然後老師可能都咁覺得, 竟然問多一次喎, 結果小豬即刻好confuse, 之後搞左一大輪都指唔到... =.="
然後, 繼續同果4個人樣玩, 要揀個戴眼鏡唔開心既 (又係搞一輪), 然後, 將個公仔頭放上一個公園既map上面(個map 係得幾條路, 好簡單既果種), 要小豬帶個公仔去有紅色細杯既終點 (有4個終點, 分別係紅色既大杯細杯, 綠色既大杯細杯) 小豬指到邊度係紅色既細杯, 但要佢拎住個公仔係個map上放到終點, 真係太難啦掛 (可能我太hea, 從來都冇諗過要教lei D)
之後, 老師拎左2本書出來, 要小豬揀一本, 同媽媽一齊睇書 (由於知道衰硬, 就疊埋心水同小豬睇書啦) 小豬講得晒書上所有既動物出來, 老師都有問幾句.. 
咁就考完啦...

第三part ,同上年一樣, 小朋友玩玩具, 家長填問卷 (問卷內容好似都同上年一樣)然後見校長拎禮物走人...今次校長係同小朋友傾計... 我覺得作為校長應該一視同仁, 唔應該見到有興趣既小朋友就問到好多問題, 冇興趣就叫問名同bye bye... 我地果group有5組, 第1組校長問左起碼有6-7條問題, 第2個小朋友,答問題時要攬住公仔, 校長只係問左名, 就俾左份禮物佢, 小豬係第3個, 交問卷俾校長時有小小拋俾校長既感覺, 但係真係小小... 校長說要重俾, 小豬又企左係度好confuse, 然後校長就問名俾禮物就走得... In完之後, 我同小豬去左vv, 去完vv經過見校長既課室, 見佢仲問緊我果group 既最後一組小朋友...

---

可能覺得小豬冇機會入lei 間, 所以對lei間既印象真係麻麻... 第一佢D題目太難, 可能佢自己PN班既小朋友係答到,但我諗大部份學校都會覺得一個唔夠3歲既小朋友係唔駛識lei D既 (因為冇其他學校考過) 第二就係做為校長應該要公平, 如果連見夠幾分鐘都俾家長覺得偏心既話, 家長又點會放心將小朋友交俾你呀 (well, 同lei 間學校只可以話大家睇唔順眼大家啦~ :P)

2014年11月10日 星期一

繼續K1面試... 567 ... Part 1

Lei 期都係講面試, 原來K1既面試schedule真係密過PN好多呀... 我到左上個星期六已經好hea啦, 一心只希望快D完 (好彩星期六既interview 好短, 遲D先講)

面試5係全城大熱既幼稚園, 係好好好多人in呀... 我地in845, 第一日既第二個時段... 其實果日係早到左半個鐘架, 不過好白痴咁係隔離街既車度等, 冇走去望下... 如果見到果條見唔到尾既蛇餅就一定會早D去排... 最後8點半先去排隊... 雖然係校外排左唔係好耐, 但係校內既唔同位置都排左輪, 結果要到差唔多10點先出得返來 (熊熊係校外呆等成個鐘, 見我地出來就走去返工啦... 早知就直接去返工啦~~~)

等緊冇野做, 當然係影相啦...

入到去, 係門口又排左輪, 交完資料又等左輪, 上到課室門口又等左輪之後, 終於係group interveiw 啦... 所謂既group interview, 係5個小朋友坐埋一齊玩lego, 然後就會有個老師行埋去同小朋友傾下計,而家長就坐埋一邊望住小朋友 (well, 我寧願家長係出面等, 起碼小朋友唔會玩玩下行埋家長度)

老師同小豬傾計時, 小豬好似冇理佢, 一味係度砌高 (對小豬來講, lego 係用來砌高架咋... =.=")佢一直砌一直砌, 直到對面個小朋友話"哇...好高呀..." 然後伸手去拎...  well... 真係冇眼睇... 小豬當然唔肯,想拎返, 然後, 對面個小朋友就掃左幾舊lego 落地, 小豬就扮晒野咁喊左一下... 再然後, 2個小朋友就好似冇事發生咁繼續玩面前D lego喎... well , 我其實覺得2個小朋友都好得喎, (雖然老師都有問小豬發生咩野事, 小豬好似繼續唔理老師), 咁樣都可以唔打交又唔喊既情況下完成左個group interview, 然後各自拖住媽咪去下一個課室... (希望老師都係咁樣認為啦~)

去到下一個課室又係等, 有2張枱interview 緊, 其他人就坐係後面等... 我其實應該係果一組既第一個, 不過唔知點解搞搞下搞到差唔多最後一個in... 不過係小豬仲肯等既情況下, 最後一個都幾好, 我可以係人地In 緊既時候, 盡下人事教下小豬... XD

終於有得in既時候, 已經係950lu..., 家長係要填份問卷既 (D題目都幾難), 不過我見D老師對之前D家長講, 填唔晒唔緊要架..所以我係HEA填 (4條問題只寫左2條), 主要睇下小豬搞成點...
首先問名同年紀, 小豬話自己1歲, 老師問左幾次先講返係2歲... =.="
第一題, 老師拎左個冇五官既人樣出來, 要小豬痴眼睛同嘴巴 (做到) 指人樣同自己既耳仔(做到),問耳仔用來做咩野 (唔答, 只係重覆耳仔... 唉..係屋企問10次, 10次都識架... )
第二題, 睇圖片, 搵3隻lei埋既小動物, 小豬一見到就搵晒出來 (不過,小豬搵到既時候, 咁啱有工作人搵果個老師, 好似俾野佢, 所以係睇唔到小豬做緊咩野... ) 幸好, 老師再問小豬, 小豬都係搵得到既...
第三題, 老師示範推住架車, 然後講bubu, 就"禁"住架車... 老師示範左2次小豬都係唔識... (不過都預左, 諗唔到可以點樣提水..)
第四題, 打開個膠盒, 用匙"不"2粒紅色既珠仔落個碗度 (lei 題有D擔心, 因為小豬平時係要不晒所有野去第2度先會停手架, 而且, 佢仲係唔多識數數... ) 不過lei 題有驚喜, 做到...
第五題, 俾左2個檸檬茶盒, 一個係吉既, 一個係有野既, 要將有野果盒俾媽媽... ( 我覺得lei 題難, 係等緊既時候, 有解過俾小豬聽) 小豬拎起一盒, 話"冇野既..." 拎起另一盒話有喎, 就俾左我...
第六題, 老師拎左張印左6個生果既圖片同一張得6個格個紙, 要小豬照住印左生果的圖片, 將生果圖片放返係張空白紙 (lei 題冇睇, 因為張問題實在填得太慢 :P) 好似都OK既...
最後一題, 又係唱歌題, 小豬自己揀左唱太陽伯伯, 第一句唱得好大聲, 之後就越來越細聲... 不過都算唱晒既... 
最後收禮物, 有講多謝, bye bye 同推返好張櫈

in 完之後, 即刻走去隔離街, 換衫返學 (不過都遲左9個字 :P)

對於今次既interview, 我覺得幾满意, 雖然都知道咁既水準應該都係唔會收架, 不過, 我見到小豬既進步, 所以要掌聲鼓勵~ 小豬對於自己既表現都好满意, 一返到學校就話俾老師知佢今日好乖好合作... =.="

--- 
另外, 仲有件趣事, 係幼稚園中移動排隊時, 見到有個家長係門口同人講緊... 類似"我知道你都唔會收我個仔架啦, 但唔可以唔俾我In" 咁上下啦... 前幾日同個frd 既frd 講起幼稚園既interview,先知原來果個家長就係佢, 佢唔記得寄返份form俾學校 (去到Interview時先發覺), 但又想個仔失望, 所以唯有硬住頭皮力爭... 最後學校都有俾佢地in... 呢個世界真係細呀...同埋媽媽真偉大, LEI D野都只有媽媽為左仔囡先肯做

---
係8日內in左6間, 真係好辛苦 (因為大部份都會要求交問卷, 所以我已經作左N次文啦)
仲有2間龍校未in, 估計都要到11月尾先再in啦 (等我可以抖下...)
暫時in左7間, 有兩間出左成績, 小豬有2個am offer...
不過我都冇留到位 (今年既留位費好貴呀, 所以要諗清楚先留) 
希望繼續有好消息啦~ 但之後果D既競爭實在太大啦, 應該好難再有offer lu...








2014年11月3日 星期一

K1面試... 234

剛過既週末, 係面試高峰期, 小豬2日共有4個面試, 其中3個仲係同一日...
1日3個面試太多啦, 所以最後取捨左一個 (果個上年都有去in, 雖然熊熊都幾鐘意果間, 但位得1X個, 又多人爭, 所以就放棄左)

星期六既第一站, 全城出名既一條龍女校, 歷史悠久, 一條龍得來仲要收學券, 真係超正架 (雖然我唔太想小豬從幼稚園就開始讀女校, 不過收既機會仲細過中六合彩) 學校又係收好少人, 又係勁勁勁多人報名, 所以我地都係參與下啦~
由於當日四圍都好塞車, 我地預早左好多去, 但都剛剛好趕到, 再加上學校說影相會DQ, 所以真係一張相都冇影

去到排隊登記時, 有D小朋友喊緊唔肯落地 (係小豬後面果2個都勁喊), 我果下有D擔心小豬係跟埋一齊喊, 不過返學既日子有功, 小豬已經唔會俾其他小朋友影響lu... (叻叻~)雖然小豬都有示意要我抱, 不過俾我用唔知咩野理由打發左, 而後面喊緊既2個小朋友, 一個喊左陣冇喊啦, 而另一個就被請左入喊喊休息區
排左一陣, 就被請去課室門口繼續排, 有義工家長帶住小朋友唱歌 (小豬繼續冇反應) 唱完2首就要入課室啦, 仲要係小朋友自己入, 家長係出面等(lei 下幾堅, 好彩我睇左張面試通知書, 有提過, 所以一早就同小豬講定) 有D家長真係去到要放小朋友入課室果下先知係小朋友自己interview... 家長係課室門口等30秒, 如果小朋友冇爆喊, 就可以出去另一邊等啦 (排小豬後面果個小朋友又變樹熊呀, 不過我冇留意佢最後有冇被請入喊喊休息區)
我係出面等左陣, 小豬就出來啦, 以我觀察大部份小朋友都好開心咁出來... 我有試過問下小豬同老師玩咩野, 佢當然後唔答我啦~ 都好啦, 眼不見為淨 XD

---
星期六第二站, 新校一間, 新到連校舍都未裝修好, 所以借左澳洲國際學校來面試... 報LEI間係因為PG強力推介 (PG既founder 將會係lei 間既其中一個consultant), 應該唔會讀LEI間, 但會有興趣上下佢D興趣班...


一去到, 先被請入遊戲室玩, 小豬一去到見到有波波池就兩眼發光, 第一時間除鞋跳左入去(屋企個波波池又唔見佢去玩, 正一隔離飯香...) 玩左陣, 老師就要求大家移去隔離音樂室 (好彩小豬都肯乖乖走人, 我真係有D驚佢唔肯走, 然後發脾四...) 去到音樂室, 有大中細B一齊跳舞(小豬係中B, 有個再大一年, 考K1插班既, 同埋有幾個細一年, 考PN既) 唱左1X首歌, 小豬終於warm-up完, 開始跟住一起跳既時候, 就已經跳完啦, 又被要求再去遊戲室玩多陣... =.="

又玩左陣之後, 就去面試啦, 面試係以玩玩具方式進行, 考下顏色, 數數字, 生果等... 小豬仲唔係好識數數字(即係老師話要3個蘋果, 小豬要識得係一堆蘋果中拎3個出來), 我覺得lei part幾難, 其他都OK, 雖然有一堆玩具搞到小豬唔多專心, 不過都預左係咁上下架啦~ 臨走時, 老師送左個貓咪公仔俾小豬, 小豬勁開心... 咁就考完...

---
星期日, 另一傳統名校, 歷史悠久 (雖然明知買左六合彩係唔會中既, 但都會去買下... 同一心理)
原本俾小豬著第二套戰衣... 但係... 總覺得好奇怪 (應該同個髮型冇關既............. XD)
最後忍唔住係搭地鐵時同佢換左 (LEI輪小豬成日都話要搭地鐵, 知道有得搭時就超開心...)
好彩係求其拎左條裙出來, 上年都有著來面試架, 不過今年就變左超短裙 XD
排隊入學校時, 無野做, 影下相... 
well... 係角度問題, 唔關個髮型事架~ :P

排左陣隊, 然後學校好奇怪咁分左男女隊, 分開入去面試 (真係唔知點解)
LEI個面試, 有D難度, 雖然家長係同小朋友一齊去面試, 但學校都安排左2個老師, 一個主力問家長, 一個就考小朋友, 家長好難又要答好D問題, 又要望下可以點樣幫下個小朋友... 雖然之前已經mock 過一次, 但係我自己依然答得唔多好得來, 又基本上理唔到小豬D野...

我見得到既考題係, 首先玩形狀配對, 係蜜蜂, 蘋果, 蝸牛同樹, 小豬雖然唔係一下就放得到入去, 但佢就用左我教佢個轉轉法, 轉下轉下就4個圖案都放晒入去

之後係考立體拼圖 (我覺得都有D難, 因為正反面既圖案係唔同架), 我諗老師有幫下小豬既, 聽到老師話俾小豬聽反轉左, 之後應該完成掛...

第三樣, 係看圖題, 老師指住一張圖, 要小豬指出各種物件係邊度, 然後, 再難D既係, 指住個人問小朋友佢做緊咩野 (小豬有答到沖涼涼... 不過唔知啱唔啱)

最後, 係最易亦係最難既唱歌啦, 小朋友要任唱一首歌... well, 要小豬自己唱歌, 佢可以一口氣唱10首8首, 但係前題係冇人既時候呀, 臨瞓前呀, 總之係佢想唱既時候, 唱歌真係好易... 但要佢係老師面前唱就好好好難呀... 老師一開始揀左ABC song , 小豬識唱左成年有多, 聽佢唱左幾百次都有呀, 但係老師面前就係唔肯唱, 然後老師叫我幫小豬揀一首, 我揀左ten little witches (今期大熱), 再加上我提返佢, 係老師面前唱左歌, 我就應承做D野 (由之前果晚瞓覺前, 我就話俾佢知, 如果肯係老師面前唱歌, 我就請佢食雪糕), 終於小豬用從來都冇咁細既蚊滋聲唱完首歌啦... (掌聲鼓勵~~~)

唱完歌, 就走得啦~ 一出課室, 小豬就同我講雪糕呀... =.="

--------
咁就完成左差唔多一半既面試啦~
暫時in左4間, 有一間出左成績, 小豬有am offer... 
希望繼續有好消息啦~