大阪親子遊... D6

終於寫到大結局... yeah~

最後一日, 有隻豬唔肯起身喎(相既右上角), 冇辦法之下,唯有連人帶枕頭帶被一齊抱去食早餐...

一泊兩食既日式早餐... 個樣睇落唔錯, 食落普通啦...

樣樣都係好送飯架, 不過, 我朝早唔多食飯... :P

最搞笑係, 大家食得差唔多既時候, 個上菜既婶婶先話我地知, 隻生雞蛋係撈落D飯度架,大家又試下喎, 結果, 飯太少蛋太多, 變成生蛋粥咁...

食完早餐, 我地仲有50分鐘既私家風呂。原本2家人係同一時間, 一家一個私家池, 點知其中一個壞左, 所以2家人要輪流用, 酒店方面都好好咁俾我地遲一個鐘check-out

咁都好, 可以有多D時間執野

最後走既時候, 酒店仲有人著晒和服咁, 係門口揮手道別... 

為免人地企太耐, 熊熊係未搵到路既情況下, 都係開走架車先... XD

我地最後一日冇咩野行程, 諗住去貴志站睇下小玉站長, 到此一遊 

(俾2位男仕comment 係, lei 個係咩野景點呀... =.=")

我覺得主要係因為我地冇搭果程火車, 所以冇咩野睇掛

然後, 我地係路上經過左好local既超市, 買左D刺身士多啤梨當lunch, 就直去outlet 啦

去到outlet, 熊熊又去搵拉麵, 我地就行左陣

不過, 我覺得唔係特別平, 所以都唔算好有收穫

小豬買左一對波鞋, 一件GAP既衛衣

熊熊買左一對波鞋

我自己冇野買=.="

然後就去機場還車lu...

係大阪租車, 油費其實好平, 但路費就好貴, 所以如果2個人自己去, 都係唔駛租車

不過, 帶住小朋友, 租車就好方便, 一來冬日遊時 車內會暖D, 二來, 小朋友係車上通常都瞓到覺, 結果我地租左4日車, 2個小朋友都係一上車就瞓, 到站就醒, 休憩地好D

去到機場, 班機又係好full , full到安排唔到3個連位俾我地, 好彩上到機時, 都可以搵人換位

2個小朋友係機場又係好hyper 咁玩, 而大人就把握最後機會買手信同埋買酒

上到飛機, 朋友仔好乖咁, 好快瞓左覺啦, 而小豬就依然當飛機係遊樂場 =.="

期待已久既大阪親子遊就咁告一段落, 我地好勁咁基本上行晒所有既行程, 唯一唔多好既係2個小朋友都係中途病病, 不過都冇影響大家玩既心情 (主要係因為2個小朋友依然好精神) 不過, 今次用左好多心機plan 行程, 下次就變返hea 遊布吉啦, 繼續熱切期待...

大阪親子遊... D5

其實今個旅行既全名係大阪親親大自然, 摸摸小動物, 食食食之遊... 所以我地第五日既行程又係去動物園啦...

一朝早, 食個早餐先... (大家琴晚太盡興, 所以個個都起唔到身呀... 最後酒店打來房, 提我地得返半個鐘早餐時間, 然後先拿拿聲沖落去... 因為要服侍小主 (唔係, 應該係小豬先啱)食早餐, 所以冇時間影相... 早餐以自助形式, 不過不失啦... 最正係有牛奶飲, 好濃好好味, 我飲左2杯... 食完早餐, 返房浸左個親子溫泉後, 我地就要check-out 啦...

三樂莊, 整體感覺都好好, D房好大, D 人都好nice, (個serve 我地食晚飯既婶婶見朋友仔發燒, 仲拎左退熱貼同冰枕俾我地), 野食我會覺得係不過不失啦 (亦可能係我地之前果幾餐太正, 所以被比下了), 另外就係, 我地留係酒店既時間太短, 所以冇試佢既大浴場...

今日既主要行程, 就係去白濱既adventure world 啦...

小朋友好開心呀, 一去到就話要同熊貓影相啦

adventure world, 主要分3個部份, 一個係動物園, 有熊貓呀, 企鵝, 北極熊, 等等, 一份部係個機動遊樂場 (要另外收費架), 最後一部份係野生動物園

一入場, 就見到個水池, 入面竟然有幾隻企鵝游緊水喎 (即刻勁開心)

然後, 就有個草地仔, 放左2隻咩咩羊 (相比起六甲牧場既咩咩羊, lei 2隻俾人拴住左好可憐呀)

然後就去左睇熊貓...

lei 度既熊貓好活潑呀, 不斷咁爬呀, 玩水呀, 同係海洋公園見到既完全唔同, 熊熊仲話應該係收左錢, OR係人扮架... XD

不過, 又會覺得懶洋洋咁先似熊貓架

另一重點就企鵝啦...

真係超極多企鵝呀, 不過之前睇人地個BLOG話有企鵝出來散步, 去到又唔多覺喎

雖然有咁多真企鵝, 但小朋友始終對可以摸到又自到既假企鵝有興趣D =.="

朋友發現, 海洋劇場就來有得睇(個名係我幫佢改架 :P) 於是我地跑去睇...

好彩有睇咋, 真係好好好精彩, 比以前海洋公園既海洋劇場仲好睇( 即係仲有殺人鯨既時代)

成個表演有好多海豚, 睇到大人小朋友都一齊哇哇聲呀...

原本, 我地諗住去坐火車仔, 去睇長頸鹿, 點知朋友仔瞓左覺, 於是改睇熊貓BB啦...

lei 兩姊妹好可愛呀, 係上年11月尾出世架, 依家啱啱係好得意既年紀 (啱啱出世既熊貓BB好醜怪呀 :P)

然後好無聊既四個大人係度研究左好耐熊貓既家族史, 睇下有冇亂倫.. :P

小豬又有得玩機動遊戲啦...

LEI度玩機動遊戲有D唔抵, 係一個個遊戲計錢架, 大概300-400yen 一個啦

有D遊戲小朋友唔駛錢, 但就要大人陪玩, 大人就要俾錢

可以買任玩, 但我地一開始諗住唔會玩得多, 點知玩下又一個玩下又一個, 玩左5-6個

玩到2點幾, 醒起未食Lunch 喎, 於是搵左food court

我見到個幾靚既熊貓兒童餐, 於是買來同小豬share, 點知喎好食... 連小豬都唔肯食

熊熊話食烏冬 (有片熊貓頭魚蛋), 烏冬勁好味, 小豬自己食左半碗, 我都覺得好好味, 於是encore 多一碗,再俾小豬分走左D... 熊熊最後自己叫左個咖喱... XD

食緊lunch 既時候, 朋友仔瞓醒啦~

於是諗住食完飯可以去睇長頸鹿啦.... 點知搞完一輪, 4 點半既時候, 小火車已經收工啦...

唔緊要啦, 睇唔晒想睇既野, 下次先會再來架MA~ :P

下一站, 就係最後一晚既溫泉酒店, 和歌山既萬波啦 

(本來想book 另一間架, 點知12月book 都已經冇房)

我地book 左最普通既房, 同三樂莊既房相比, 就舊左小小 (不過一分價錢一分貨既)

雖然酒店細細, 但都有好warm 既一面

搭lift 時, 見到酒店寫俾我既welcome note

係餐廳食晚飯 (其實都係包房), 小朋友好開心, 因為每人有杯橙汁

LEI間D野食好味D喎, 杯梅酒又大杯D... XD

我地仲私帶左D酒去, 個上菜婶婶見到叫左一聲, 但又冇阻止我地飲喎...

最後一晚, 於是加餸... 

加既餸又再好味D喎, 特別係個魚頭, 勁得~

另外,仲有新鮮芥末俾我地自己磨, 我玩左2下就交返俾熊熊搞掟啦~

食完飯, 我趁溫泉未收, 就去feel 下露天風呂

冇人同我一齊浸,感覺好正呀(其實係室內有幾個日本妹, 

等緊我走, 我一入室內, 佢地就去左玩lu )

最後一晚, 我地繼續飲下酒, 吹吹水...

3個小朋友冇耐就去左搵周公玩lu...

大阪親子遊... D4

龜速遊記中... =.="

第四日既早餐係... 超好味既一蘭拉麵

我地朝早9點左右去到, 已經有D人排緊隊 (熊熊之前仲話邊有人會早餐食拉麵架...)

前面有10多個人, 排左半個鐘左右, 終於到我地啦(由於我地要3個位X2, 所以排得耐D)

碗麵同隻蛋都勁好味呀...

不過, 由於我碗麵要分俾小豬食, 所以冇得加辣...

小豬就勁鐘意隻蛋, 麵就食得普通啦~

我地好勁, 分開左2個3人位來排, 結果都係坐係隔離...

有隻熊想自拍, 但冇人理佢... XD

到我地食完走人既時候, 間舖出面條龍已經好長啦.. 我估起碼要排2個鐘=.="

食完早餐, 就check-out 啦~

Cross hotel 整體來講都幾好, 位置非常方便, 我地又被免費(加冇通知地)upgrade,所以覺得非常正, 個人最鐘意佢個廁所+浴室 :P

之後就離開左大阪市, 向和歌山出發

中途搵左間採士多啤梨既地方(農園紀の国), 小休一陣

果度可以放題, (1600 yer /40 min)或者採完磅重, 而我地揀左放題...

D士多啤梨好味呀, 同埋原來唔同品種D味會好唔同架...

食左半個鐘左右, 就已經食到一肚水, 要放棄啦...

唯一唔好既係, D士多啤梨係種係架上既, 所以2個小朋友都唔夠高自己採呀, 只可以負責食...

我記得係韓國, D士多啤梨係種地下架...

離開左士多啤梨園, 我地既下一站係... 繼續食...

來到超正既白濱市場啦... 不過我地有D趕時間 (未食lunch), 所以只係行左陣, 仲要分頭買酒+看住小朋友(1 group) 同埋買海鮮同魚生(另一group)

買左幾款魚生, 以海膽最最最好味 (不過唔記得影相...)

海鮮方面, 就有大蝦, 大蜆, 唔知咩野螺, 珍寶帶子, 再買左pack 和牛... 樣樣都好好味

以珍寶帶子最正, 同香港街市買既完全唔同級數, 好彈牙

原本諗住買個飯俾2個小朋友share, 點知D飯只可以堂食, 唔可以拎走喎...

再加上好多覺得佢地食得既野都賣晒 (當時大概4點左右啦), 結果買左一條魚蛋條, 同埋年輪蛋糕俾佢地. 點知, 佢地都唔係好食, 反而每人隊左4-5舊壽司白飯...

有D趕, 係因為我地趕住去酒店check-in (原本說4點架, 結果5點半先去到 XD)

我地住白濱既三樂莊, 頂樓, 所以有私人風呂, 一泊兩食, 差唔多46,000 yen /room, 係我地今次住得最貴既一晚 (其實, 包埋兩餐, 都唔算太貴)

第一次住和式房, 好正呀... 果日又幾好天, 上到房差唔多6點, 仲可以見到個海

酒店介紹, 有playhouse, 所以一放低D野就去睇下... 不過冇咩野玩... 玩左2玩, 就走lu...

因為... 係時候食晚飯啦~~~~ XD

我地係房食... 哇哇哇, 真係好大陣張呀...

4個人既份量, 放到成枱都係, 之後仲有幾個餸係等我地食完先上架

味道來講, OK啦, 又唔算非常之好味, 朋友話之前去箱根同有馬時, D野好味D喎...

哈哈, 小豬又幾襯和服喎 :P

食完野, 移師去我地間房飲酒, 吹水... 

2個小朋友都病病呀 (雖然玩埋一齊既時候, 2個都好精神)

我估冬天既室內外溫差太勁啦...

玩到12點幾, 休息瞓覺啦 (其實熊熊一早就瞓著左) 小豬就一熄燈就瞓左...

而我, 就浸左陣溫泉先瞓, 好爽呀...

大阪親子遊... D3

雖然係話大阪遊, 其實留係大阪既時間真係好少, 第三日, 已經出發去神戶lu...

一朝早, 搭地鐵去拎車, 唔記得係邊個站lu, 我同朋友就推住小朋友去左便利店買早餐 (太混亂, 一張相都冇影), 2個老公就去搞租車既野... 大阪去神戶其實搭火車都好方便, 不過我地既第1站係交通幾唔方便既六甲山牧場, 所以都係租多日車好D...

  lei 日又係好凍, 小豬被包到成隻粽咁

其實六甲山牧場唔算好好好大, 不過, 就通山都係綿羊 (同埋佢地D C........)

2個小朋友一見到D綿羊就自動波咁走左過去, D羊又唔驚人喎, 一於你由你摸, 我由我呆...

再向前行, 就見到好多山羊 (可能山羊知道D人會餵佢食野, 所以係咁堆埋來)

我地買左D飼料餵山羊, 小豬聽完熊熊講解點餵之後, 玩左好耐, 勁開心

原來山羊係唔食草架喎, 佢地只對我地手上既飼料有興趣

不過, 我就有D驚, 都係負責影相啦... XD

除左羊之後, 仲有馬呀, 牛呀, 兔仔呀.. 不過, 冇影相... (得綿羊可以通山跑架咋)

誤打誤撞之下 去左人地教整雪糕既地方, 不過要識日文先可以join 果D班...唯有走人

走之前, 見到隻大bear bear , 2個小朋友又走去玩一餐

來到牧場, 當然要試下出名既雪糕啦...

小豬期待左好耐呀.. (不過掛住食, 冇影低佢個為食樣)

雪糕好味, 但凍櫃入面既即食芝士仲好味呀, 可惜要雪住, 所以只係買左一盒咋...

食完雪糕就走人lu (其實果度有個室外playground, 全木製, 本來都想俾小豬玩下, 不過天氣太凍, 驚佢玩完返車都會冷親, 所以唔俾小朋友見到 XD)

之後去左Umie 果邊食lunch (2個小朋友係車上就睡魔急call啦)

本來想食大阪燒, 點知裝修冇開

我見到有得食串炸, 就提議去睇下, 熊熊話唔食喎... 結果都係俾我的左去睇...

原來果間都幾出名, 旅行書都有介紹,自己炸仲要係放題 而且全場得LEI間係排緊隊, 所以我

地就排隊啦~

小豬瞓醒就啱啱好有位, 正~

試完覺得都幾好味架, 串炸都算係大阪名物, 可惜就安排唔到再食大阪燒lu...

下一站, 麵包超人館....

其實來神戶本來係因為麵包超人館架, 可以我地食埋個lunch 已經4點幾啦...

最後決定唔入館, 只係一樓行下, 其實都幾好玩架, 好啱我地LEI D咁趕時間既人來影張相

麵包超人係日本真係好受歡迎呀, 個個小朋友都識跟住唱果D歌架...

咁啱有場歌舞可以睇 (不過我冇睇, 我去左shopping... :P)

小豬雖然聽唔明, 不過都好enjoy...

從此,小豬又識多左個朋友, 叫麵包超人啦...

搭個摩天輪 (不過lei個細好多), 欣賞下神戶夜景... 然後去左toy's R us shopping..

間toy's R us 好大呀, 但我地得半個鐘shopping lor 

好趕咁買左D玩具呀, 書呀, 野飲就走啦... 

咁趕, 係因為book 左食神戶牛呀...

本來打算食lunch架, 不過咁啱果排間舖做promotion, 所以早左2個星期都book 唔到果日既lunch 呀,不過就俾我book 到晚餐 。都好啦, 註定情人節係要食好D架啦~ XD

唔好彩地, 果日D數據係唔知幾時就用晒, 我地又搵唔到路, 搞左好好好耐之後, 先搵到間舖, 果時已經差唔多8點半啦 (我book 左7點半) 大廚說我地遲左咁多, 俾唔到位我地呀.. (ops...), 一係就去隔離唔太遠既分店啦...

老公們去左泊車, 我地就坐係舖頭度等, 一邊商量下仲食唔食, 因為去左分店, 我地覺得book 左既package (7000 yen per head) 就應該冇左啦, 食正價就要16000 yen per head 起喎... 但熊熊話一場來到, 就食啦... 於是我地懷住要用8萬yen 買單既心情去食LEI餐情人節晚餐啦~

個餐除左牛之外, 仲有沙律, 蒸蛋, 鐵板雜菜 同埋甜品

D牛真係好正呀, 入口即溶, 而且分量都好夠, 我估我食左7-8舊呀, 最後仲分左舊俾熊熊

個廚師仲好細心咁整左D熟小小, 細粒D既牛肉俾2個小朋友

而最正既係, 佢都係收返我地7000yen per head 呀

小豬都好欣賞D牛肉, 雖然佢都係鐘意個蒸蛋多D (一隻豬食左差唔多2個蒸蛋)

食完lei 餐就要返去執行李啦, 因為第二日要搬酒店啦~

大阪親子遊... D2

第二日, 都唔算好早起身, 由於之前果晚唔太凍, 熊熊好勇咁話唔著羽絨, 不過我都係叫佢拎住先... 果然, 一出門就勁勁勁凍呀...

第一站, 黑門市場, 食早餐...

黑門市場跟酒店都唔遠, 推住BB車行10分鐘左右...

講真, 帶住小朋友出去玩, 除非影個小朋友, 其他相真係影得好少...

個關東煮真係要PO下 (雖然冇食LEI個 :P)

大阪既關東煮真好好好食呀 (成日俾熊熊笑, 話係關西先來食關東煮), 只係食便利店果D, 都好味到我encore左3次 (即係晚晚關東煮做宵夜) 都唔明香港果D點解可以咁難食...

帶住小朋友行黑門市場有D辛苦, 主要係大人有太多野想食, 小朋友又唔太啱食

又唔算有太多野俾小朋友睇, 結果一陣又要扭坐車, 一陣又要抱, 一陣又要自己行, 一陣又要騎馬馬, 再加上2個小朋友互相影響, 效果X10... 

其實我地都食左唔少野架, 不過最正係上面果份三色吞拿魚... 件大拖羅真係正到lei...仲要只賣2000 yen, 依家後悔緊點解食咁少...

另外, 見到好大粒既士多啤梨, 300yen /粒, 又每家買左粒試下...

依家既小朋友真係好識食, 朋友一開始買左1000yen 2盒既, 2個人仔真係各咬左啖就唔食 (其實都唔差架) lei 粒野,小豬係咁追住食, 結果 我同熊熊各咬左一啖仔咋

食完早餐後, 我地就去左食lunch 啦 :P

lunch 食河豚... lei 間真係黑門市場架, 睇旅行書介紹, lei 間用既品種高級D, 所以會貴D

5000yen 既餐, 包左2個小前菜, 刺身, 炸物同火鍋...

由於食完早餐冇耐(10分鐘左右啦), 所以我地叫左2 set share

其實都夠, 因為最後果個用來吸精華既飯都好大碗下...

lei 間俾上次係東京食果間好味D, 魚肉鮮甜, 但河豚來講我都係鐘意熟食多過刺身...

(小豬係咁E, 都叫食左DD魚肉同2啖飯... =.=")

食飽飽之後, 做下運動... 然後話咁快就到下一站啦~

我地買左套票, 海遊館入場券加大阪地鐵一日票, 共2550 yen....都幾抵... 

(雖然我地最後只搭左2程地鐵... :P )

海遊館真係好啱小朋友架 (其實我都睇得好開心)

好多好多野睇, 如果慢慢睇可以睇一整日

(lei 隻海獅好似一舊飯團呀...)

不過, 有隻衰豬好曳, 一條友係度勁跑, 我係後面追到氣咳...

結果lei隻衰豬就即場俾我片左鍋甘既, 話佢再唔拖住行就即刻返屋企

之後雖然佢都有繼續跑, 不過跑一段仔後就會跑返來話要拖手...

就係咁, 我miss左好多好睇既野呀... 包括海豚呀...:(

唔理隻衰豬, 自己影張相先...

知道海遊館可以儲印仔, 所以事先買左簿仔俾小豬...

結果小豬全程主要係搵印仔, 得閒先望幾眼D海洋生物...

海游館仲有一part 係俾人去摸摸海洋生物架...

海洋公園俾人摸既係鯊魚蛋殼, 

lei 度俾人摸鯊魚同魔鬼魚呀...

小豬一D都唔驚, 摸左好多次...

玩左一大輪之後, 就走lu...

原本諗住去天保山搭摩天輪喎 (係海游館隔離咋)

路經商場, 見到有條古玩食街就走左入去8下, 順便睇下有咩野食...

又見到個食街入內有座廟喎, 於是又影下相啦...

點知, 小豬就係LEI個過程中去左搵周公lu... =.="

由於唔想嘈醒佢, 最後就放棄左上摩天輪lu...

下一站係shopping 時段, 去左位於本町既Arachan... 據聞係一幢5層高, 全賣小朋友野既地方...點知去到, 真係好好好細呀, 行左半個鐘就收隊... 朋友仔就好醒咁自己揀左份lego 玩具, 然後就去食飯啦... 熊熊話行去都唔太遠, 可以20-25分鐘啦, 然後我地就路經左藥房同daiso, 放完一輪血之後, 就去到晚餐左地方, 燒肉力丸放題...

好好彩咁, 有間房仔俾我地, 小朋友又可以走來走去玩...

D野食好OK呀... D和牛好正

放題120分鐘, 每人5000yen 有找...

可惜, 一張見得人既相都冇影過呀... =.="

(記事, 小豬去到食飯既時候就醒左啦, 見到朋友仔拎住份玩具, 就同我講, 

豬: 媽咪, XX有新玩具呀...

我: 係喎...

豬: 媽咪, 咁瑤瑤既玩具lei?

我: ...........

點解突然醒左既?)

唔好以為咁就完成一日啦, 最後, 我地仲買左個Pablo半熟芝士蛋糕返去做宵夜...

正, 好似一個好大好味既芝士味蛋撻, 4個大人食都有小小吃力 (可能主因係啱啱食完放題XD)

繼續冇野食既相, 只得2個小朋友堆埋一堆堆既相... XD