影影影影

生菇菇既blog, 繼續生菇菇... 有好多野要寫呀.. 唯有寫summary 啦...
今年多左隻咩, 小豬既每年一影被逼推遲同分散左... 結果今年變影影影影XD

咩咩出世時影既第一輯NB相

本來唔打算影, 因為咩咩係年頭出世, 驚住會好凍, 唔著衫影相就更加凍... 所以完全冇做過research...

到佢差唔多一個月大時, 發覺又唔係好凍喎... 而且D NB相好得意咁...所以又變掛影下啦...

可惜影得靚果D俾人book 晒lu...

呢輯影得普通啦...

小豬都好乖, 雖然自己唔係主角, 但都好興奮咁睇住妹妹影, 冇扭計...

咩咩就... 哄左好耐都唔瞓, 仲要得閒嘔幾啖奶奶 =.="

冇耐之後, 搵到咩咩既同年同月同日既媽媽谷...

組團再影過

己經唔係NB既咩咩 (當時係5個月), 俾媽媽繼續扮NB... :P

當然係影唔到NB既感覺啦...

不過今次咩咩好合作, 笑得好開心... 

笑笑下突然間就瞓著左 (係個攝影師拎住咩咩隻腳影左2張, 再諗住影返個樣時, 己經瞓左)... 

笑C個攝影師...

同一次都有得影家庭照... 

咩咩真係好合作, 識得望住鐘頭笑...

我覺得呢間影得幾好... 

主要係... 影得我唔太肥... 

終於到小豬影返輯自己既相...

見到FACE係中秋做免費promotion, 只係要小朋友身份證中左815其中2個數字就可以免費影一次造型相... C9如我當然唔執輸啦...

最後收到10張相... 都OK啦 (不過之後睇返人地D相, 先見到個好靚既帳篷景, 冇影到

影相果日, 小豬十分hyper... 影到個攝影師哥可想喊咁滯...

最後係10月頭影既室外相

第一次影室外, 再加上第一次同朋友仔一齊影, 小朋友玩得好開心呀...

呢輯相小豬影得好大個啦.... 成個少女咁... (其實我唔想佢大得咁快囉...)

是日咩咩心情唔多靚, 又可能小B真係唔多啱影戶外, 而且佢當時連爬都未識...

雖然係咁... 戀女既媽媽覺得佢既喊相都好可愛... =.="

好啦... 一次過寫晒今年影既4次相... 重點係4次加埋, 只係$2100 (重點要寫低俾老公睇)

下年又會變返每年一影啦... 影邊間好lei...

9個月啦...

嗯... 只可以話, 日子過得好快... 真係話咁快就9個月...

9個月既咩咩, 身高, 體重不詳... (做細果個有時都幾可憐, 媽媽真係放唔到咁多時間同心機俾佢, 當然都有好開心既地方啦)

食野方面, 係為食妹一個, 食緊3.5奶2粥, 奶飲6-8安左右, 粥就可以食8安粥, 仲要食得好快, 好胃口時唔駛10分鐘就清晒.. 不過衰妹妹到依家半夜都會喊肚餓, 起碼要啜一次 (最近我懶到連抱起身都費事, 直接側餵就算... =.=") 除左正餐之外, 見人食野佢就會咀郁郁, 見冇人理佢就會開始喊, 直到你俾D佢試下... 十分鐘意食星星餅, 由7個月多D開始食星星餅, 唔駛2個月己經食左3筒啦(當然小豬都有出力架), 基本野食都試左 (除左橙, 奇異果, 蛋白, 海鮮之外), 樣樣都食 XD

睡覺方面... 唉.... 都係好醒瞓, 小小聲都會詐醒... 如果有人陪係身邊, 可以午睡3個鐘左右, 但冇既話只有30分鐘貨仔... 睡覺得時候勁大汗... 大汗到第2朝個頭仲係濕濕地, 真係超誇張... 不過呢輪可能又大個左, 凍左又好瞓左... 希望咩咩快D一覺瞓天光啦... 話晒都9個月啦... 唉...

poo poo 方面, 又係另一神奇野, 打風果日我係屋企, 同佢換左6條poo poo 片, 但佢又唔係肚痾喎, 都算係靚poo poo, 每次都有成個MJ咁大, 又唔算少...  老公話佢應該係未痾清就換左片, 但有試唔發現佢痾左, 整個pat pat 流血... 肉赤C... 真係換得勤力D好...  不過有時佢D poo poo 又真係好少, 得一小點, 夾住係pat pat 度... 唔發覺時, 又係搞到個pat pat 紅晒, 兼流血... =.="

動作方面, 坐得好好, 識得自己扶住企起身, 識識地爬, 但唔叻...不過整體都係比較懶, 大肌肉既動作比小豬當年慢幾多下... 不過小肌肉就幾好, 拎星星餅放落口係快而準, 仲要左右手都冇問題...仲鐘意met 紙巾, met 到好細, 之後放落口... 99話咩咩識揮手同bye bye , 不過我未見識到...=.="

其他... 講多左好多野, 成日都係bababababa... 有時都會ma 既.... 牙仔就出緊第二隻啦.. 應該好痕, 所以咩野都放落口到... 自家剪左第一次頭髮.劣評如潮... :P 不過做為媽媽依然覺得咩咩好可愛... 只係, 點解剪完頭髮, 隻眼好似細左既.... XD
仲有就係, 7個月幾月既時侯, 咩咩打敗仗... 俾小豬傳染, 要睇醫生... 自此以後, 就係呢個咳完果個咳, 果個咳完個又咳返, 中間仲要加插我同老公都咳埋一份, 真係煩c.... 不過搞笑既係, 為食咩咩應該係太為食, 連藥水都唔放過... 餵藥勁合作, 通常食完都會叫多幾聲睇下有冇得加... XD

希望你可以繼續開開心心, 為為食食, 同家姐相親相愛啦...

不斷迪迪尼

再唔寫, 果3次就來變N次啦... 所以都係寫住先...

N個月前, 迪迪尼搞左第一次跑步活動,仲有親子賽喎, 咁我梗係報來玩下啦, 報完之後, 老公話小豬冇可能跑得完3K, 然後又發現跑步之前果日原來要去飲... =.=" 臨跑前果個星期日日都落雨, 我都打定輸數, 自我安慰, $599既報名費, 當買張入場劵加件T-shirt 都OK啦...

來到跑步果日, 晨早6點幾起身泵奶 (我之前果晚仲飲多左小小:P), 7點就抬住2隻野出門. 將咩咩放低係婆婆度, 接埋朋友仔就出發啦... 由於係去迪迪尼. 雖然好早起身, 小朋友們都好興奮... 連個天都 開始放晴...

結果... 跑既時候係勁勁勁熱架, 又好大太陽,.. 而我冇幫小豬同自己擦防曬 =.="

小豬算係好叻啦, 全程都係自己跑/ 行, 完全冇要抱...

不過我係隔離同佢講加油講左口都乾晒...

係迪迪尼跑真係好開心, 好多野睇, 唔覺唔覺就跑左3K, 我都係生完之後第一次跑返步.. 好彩跑得完... XD

等埋朋友仔跑完, 就返屋企抖抖lu...

張迪迪尼飛, 9月25日前要用左佢, 本來約左朋友仔9月25 一齊去, 點知老公話要練山喎...

於是我地提早係中秋節翌日去玩, 仲約埋小豬D同學仔添...

勁多人.. 所有野都要排好耐隊

我地 (包括埋咩咩)一起玩左buzz lightyear, 之後小豬走去挑戰過山車 (玩完出來話以後都唔玩Star War XD) 又玩左木馬, 有朋友仔幫人拎fast pass 所以可以上台玩小武士, 仲要睇左2個巡遊同煙花先走... 攰到我CC下...

不過, 小豬玩得最開心既, 應該係灰熊山果邊既噴水野... 老公去左玩過山車, 我一個睇2個...

見熱到爆, 小豬又好想玩水, 於是我就叫左佢除鞋玩, 玩左成半個鐘, 等老公玩埋返來先肯走 (當然係換過晒D衫啦 XD)

至於咩咩, 都算玩過下既... 有buzz lightyear, 小小世界同木馬... 以唔到8個月既小B來講算唔錯啦... 仲有得去first aid 果邊嘆冷氣 (同我一齊去左泵奶)

玩好晒, 去左問下張飛可唔可以Upgrade 做年票... 交低左3千幾錢 (慳返千四)換左3張金卡, 來緊就會不斷去迪迪尼lu...

話咁快就開始第一個不斷迪迪尼之行... 

我地已經好hea 咁食埋早餐先出發, 1點先入場... 一開始都仲OK, 慢慢又係熱爆左... 咩咩個頭由落車一路濕到落上返車

今次小豬話要玩buzz lightyear... 結果,一共玩左4次...

咩咩玩到第二次既時候, 已經中彈瞓左 (黑麻麻又幾眼瞓既...)

本來話唔玩star war過山車既小豬, 但見老公拎住fast pass 諗住入去時, 又話要玩喎, 結果玩完又係話唔好玩 , 下次唔玩 XD (睇下下次點...)

之後俾我趕左佢地去玩迷離山莊 (老公未玩過), 都係話唔好玩... 但公主花園就玩左好耐

原本小豬話要睇巫婆巡遊, 但阿爸阿媽太唔想等,小豬自己等左陣都放棄左, 改係食完野睇煙花

咩咩都係第一次睇煙花咋... (不過冇咩野反應... =.=")

一睇完煙花即刻走人... 年票既好處係free parking, 玩完唔駛的住2隻野轉車又轉車真係舒服好多呀...

睇來好快又會不斷迪迪尼啦.... XD

七個月

7個月7個月7個月啦... 我個小粉團已經7個月啦... 唉... 時間真係快到呢... 都仲未粉團夠都冇得再粉團啦...鳴鳴鳴...

呢個7個月大既小咩咩, 係6個月時重7.62KG (因為6個月大時冇寫), 終於重到小豬當年啦, 亦都終於超過左50線啦 (我成日覺得咩咩好肉D架), 6個月時身長68CM掛, 都係算長長地既...

食野方面, 4餐奶, 1餐糊仔... 啱啱轉左1個星期既粥仔, so far 都係為食妹, 餵糊仔容易過餵奶...試左菜芯, 菠菜, 胡蘿卜, 豆腐, 節瓜, 蘋果, 南瓜... 麻麻地南瓜之外, 其他都鐘意 (但南瓜好有益喎), 今日試蛋黃, 之後就會開始試肉啦... 飲奶方面, 冇小豬當年咁誇張, 小豬當年好似係飲爆樽270-300架, 咩咩仲係六安童同八安童之間游走... 所以我D媽媽奶滯銷 (係度諗, 唔知小豬仲肯唔肯飲媽媽奶lei? 不過冰奶都幾鯹下=.=")

瞓覺方面, 咩咩真係一個極之醒瞓既小朋友, 小小聲都可以吵醒佢... 應該話係小小聲音方面既變化都可以吵醒佢, 一晚起碼要醒一次... 6個月時係健康院打針, 結果佢瞓左咁打左一針, 爆喊完, 之後有成個星期晚晚起碼醒3次 (應該係嚇親... =.=")真係自食其果, 第二次做媽媽.. 真係太hea啦...  整體來講, 日頭夜晚都唔係瞓好多.. 希望大大下會瞓多D啦... (plz....)

poo poo 方面, 未轉糊仔前, 可以成個星期先一次, 開始轉固體後, 通常都可以一日有一次, 冇出現小豬當年既便秘情況... 真係太好啦...

動作方面, 坐得越來越好, 不過相比起小豬當年仲係有D距離, 不過唔緊要啦, 有進步就得啦... 6個月時姑娘話要訓練佢企下啦... 雖然我地都有做, 不過咩咩仲係唔會主動想企, 抱住佢企有時又會縮起對腳, 我帶咩咩去打HIB時, 有順便問下醫生, 答案當然係每個BB既發展都各有唔同既... 雖然唔多鐘意企, 但雙腳其實都好靈活, 可以用腳拎野, 又會用腳同人打招呼喎... 簡直用腳來代替左手咁... =.="  手都運用既幾好, 可以拎到D幾幼細既野 (例如我奶泵條喉)

依然係個好鐘意笑既小BB,不過就壞左好多, 成日要抱, 一離手(或者準備離手)就叫定先, 不過湊住2個真係冇可能成日都抱住, 所以有時唯有由得佢喊, 呢個咩咩又真係會不斷咁喊, 喊到你抱返佢為止 (我試過洗晒D1X個奶樽, 佢都仲喊緊...) 呢個時候通常係抵錫既小豬出場既時候, 佢會又唱歌又搵野吸引咩咩注意咁, 直到咩咩唔喊, 小豬就會同我講" 好啦, 佢唔喊啦.." 之後就走左去玩, 家姐一走, 咩咩又喊過 =.=" (雖然係咁, 我都覺得佢地2個好sweet 架)

媽媽希望你繼續咁可愛, 開開心心健健康康, 繼續好鐘意家姐, 同家姐相親相愛...  最好... 唔好咁醒瞓, 快D一覺瞓天光啦~~~ XD

一波N折既郵輪假期

今年... 真係樣樣都有幾折... 連去旅行都係一波N折喎, 不過, 好彩雖然樣樣都有D阻滯, 但折完之後都順利完成...

早係今年4月, 我就去左專業旅運度報左個7月31日出發, 去沖繩一日游既海洋航行者號... 心諗搭郵輪應該幾啱仲餵緊母乳既咩咩既 (成個trip 唔包小費, 一家四口已經要22K左右, 都幾貴架, 我覺得) 於是就满心期待咁等緊上郵輪, 仲一直到最後一個星期先開始話俾小豬聽我地會去郵輪玩... 點知31號要上船, 旅行社27號下午先話我知我地上唔到船喎... 因為咩咩未夠180日大(上船果日計, 咩咩係177日大)... =.=" 心中爆完一輪粗之後就開始諗解決方法... 

有諗住搭下一班船(8月9日出發), 但船公司冇晒四人房... 俾2間2人房... 老公唔肯, 到老公肯, 又話冇晒露台房, 得觀景房, 到我唔肯

唯有退錢, 搭飛機去沖繩,(8月3日出發) 老公又話佢其實好想搭郵輪, 下年再搭既話咪又係去沖繩... 咁去大阪啦... 老公又話我仲要泵奶, 去大阪有行程會好辛苦, 一D都唔hea ... 咁又睇返沖繩.. 發覺機票雖然唔貴, 但酒店好貴... 於是又諗住揀返郵輪 (但果時已經係7月30號), 但由於我地之前話退左錢, 所以旅行社冇再幫我地hold 住D房, 星期六船公司又冇人... 結果又要等... 8月1日等消息時, 又話8月2日要打風,唔會有8月3日既機票啦... 總之搞到我頭都大埋... 

好彩最後都搞得到, 船公司俾左3間全海景既觀景房 (公公婆婆都同我地一起去既), 仲要係隔離, 旅行社退返4K差額俾我地, 仲俾多400美金既船上消費以示心意... 終於8月9日出發既郵輪之旅係8月7日settle 晒所有野啦... (真係一額汗...=.=")

終於可以上船啦... 但係黃雨喎...=.="

不過小豬仲係好興奮...

一開船, 就沖左落去游水

房都OK...有個大既落地玻璃, 感覺都幾好...

最緊要係有間吉房係隔離, 我地將D行李放晒係隔離, 所以4人住2人房都OK

公公婆婆間房同我地都好近, 方便佢地過來幫我湊囡 XD

郵輪上既節目都好豐富, 不過小豬主要都係痴住左係個泳池度

泳池唔係好大... 大小小既池係海水, 小豬有傷口所以覺得痛, 唔肯落

有4個按摩池, 長期都好多人浸左係度睇戲... 所以有D似泡澡...

雖然游水為主, 小豬都試左船上既playgroup, 溜冰, 打機, 玩golf等... 仲同左夢工場既主角影左相

至於咩咩... 佢都好開心.. 因為佢係全船最細果個, 所以有好多人 (包括船員同遊客)走來撩佢玩

咩咩最最最鐘意同人玩... 另外我係船借左D玩具俾佢玩, 佢都好開心

而佢一落水就瞓覺既習慣已經變左一換泳衣就瞓覺啦=.=" 每日都係泳池邊, 我大脾上好開心咁瞓返個幾2個鐘...

至於玩得最開心既, 要算係公公, 佢基本上咩野節目都唔會錯過, 由朝6點幾起身開始玩, 玩到夜晚11點幾... 玩完返屋企, 佢話好攰...XD

船上既大部份野食都係包既, 酒精唔包, 亦有幾間要另外俾錢既餐廳 (不過我地冇去試)

除左buffet 外, 我地每晚都去主餐廳用餐, 相當靠得住

小豬每晚都食池記出品既中餐, 基本上自己可以食晒個餐 (一個中湯加一個飯)

出來玩, 最緊要小豬肯食野, 咁我就好满意啦

食食下飯, D waiter 仲會有一個唱歌跳舞類既表演, 有一晚小豬仲跟埋一齊出左去玩

左上角... 有個傻佬每日都要咁樣望住個海...=.="

至於沖繩果一日, 返來先發現掛住食野同shopping ... 冇影相...

我地係第3日12點到沖繩... 一輪入境排隊後, 出得去拎埋車已經2點半

由於公公婆婆第一日係跟local tour, 所以我地租左架最平既5人車, 租一日先HKD400左右

拎完車, 我地向蒲添市出發, 去玩公園, 途中首先去左family mart 買冰雪住D奶 (呢個方法幾好)

之後去左食沾面.. 去到先發覺原來香港都有果間舖 XD, D面好食...

小豬都食左一碗仔

食完3點幾既lunch, 就去100 yen 店買pat pat 墊, 5點幾去到蒲添公園, 老公陪小豬去玩, 咩咩就陪我係車度泵奶, 泵完奶再去會合返佢地

蒲添條長滑梯真係好長, 不過太多人慕名而來, 所以玩一次就要排好長隊 (15-20分鐘左右), 所以小豬玩左2次後就冇心機排, 走去玩其他公園野 ... 不過其他就唔係好多野玩

加埋雪糕攻勢, 我地好成功咁玩左個幾鐘就叫走左小豬啦

shopping 時間太短, 但我地都要成10點幾先去返國際通 (小豬已經瞓到成隻豬咁)

好彩仲有燒肉舖開緊, 食左餐靚牛 (小豬又好啱時間咁係我地開始燒既時候瞓醒, 食左半碗飯同好幾舊牛)本來約左公公婆婆一起食架, 點知婆婆返到船, 個wifi login 唔到, 所以連絡唔到...

食完野沖返上船, 已經係1點啦... 老人家以為我地出左事=.="

第二朝晨咁早沖返出去, 諗住食牧志市場, 原來食開果間要10點先開, 好彩隔離有間開9點

於是我地有龍蝦做早餐啦... 不過條魚冇上次咁好食

食完早餐, 老公同阿囡去還車, 我地又去左shopping , 12點搭返的士返船lu...

(真係一張相都冇影到=.=")

回程果日有小小落雨, 但冇損小豬繼續游水既雅興...

第二朝8點就落船lu...

郵輪有度好, 落左船仲有全日可以返屋企抖下...

well , 係佢地抖...

我要執返晒D野出來...

不過都好, 下畫去左, 夜晚就可以早D抖啦...

遊記寫完.. yeah~ :P

失驚無神食糊仔

做為一個hea 媽, 咩咩既各樣野都最好係跟足小豬架啦... 例如打針又會去返果間診所, 奶樽又會用返同一個牌子... 總之之前試過好地地既都會想咩咩跟返, 咁就唔駛諗... XD
於是, 轉固體呢D重要既里程碑當然係跟小豬, 到6個月先開始架啦 (由於咁諗, 所以到依家咩野都冇準備, 餐具諗住去沖繩買, 米粉諗住食返雀巢牌...)

但係咩咩總會話俾我知, 每個BB都係唔同架, 雖然佢冇家姐仔咁早翻身, 但一翻就可以左翻右翻; 雖然佢飲奶奶冇家姐仔咁多, 但就冇明顯既厭奶期... 至於轉固體方面, 雖然仲未坐得好好, 但就已經準備好食固體啦... (我老公見咩咩好似想食大人野, 就拎左D面包俾佢舔, 呢個小朋友舔到勁開心... 仲想伸手去拎住D包放落口...) 我見咩咩咁樣, 決定早D (早左半個月)俾佢試下食糊仔...  但係星期六日都好忙, D schedule 排到满晒... 結果我係去酒樓食飯前果小小時間, 買左碗仔同糊仔, 係酒樓俾咩咩試食奶奶以外既第1樣野...

用左1安媽媽奶開糊仔... 然後先發覺買左果個米糊仔,冇匙架喎... 唯有求其倒=.="

不過溝出來既糊仔都算適中 (其實如果太稀可以再加D米粉, 太杰既話, 放一陣就會稀返啦)

咩咩一見有野食, 即刻伸脷... 又唔算係吞落去, 但又食到喎...

唔到10分鐘就KO左果1安糊仔啦.. 食完仲要覺得唔夠係度er er 叫

老公話第一次試唔好俾太多啦... 所以冇得添食XD

咩咩第一次食糊仔食得好乾淨... (小豬第一次食完好似做左糊仔mask 咁)

我諗一來媽媽我既餵糊仔手勢純熟左好多, 二來咩咩真係準備好啦 

(不過佢飲夜晚果餐奶時, 又好似扭肚痛... 唔知係唔係腸胃未適應lei)

小豬見到妹妹有新碗, 佢又要... =.=" 結果個碗仔餵完咩咩後俾佢用左來食飯

不過今次小豬又好乖咁自己食飯飲湯, 食晒成碗飯... 咁我係咪要買多個俾佢呢:P

食完飯, 食蛋糕時, 大仔話要請咩咩食cheese cake 喎... =.=" 

咩咩下水禮

5個月大既咩咩其實已經落左水一輪啦... 趁記得, 要快D寫低...

首次落水... 係屋企浴缸... 試下水溫先...

咩咩同小豬一樣好鐘意水... 所以落水一D都唔驚, 仲好開心添

當時係4個月10日

(小豬當年第一次落浴缸係5個月... 之後就病左... 再之後就已經係10月, 所以冇得再玩水)

係屋企玩左幾次後, 就去泳池游水啦...

啱啱果7.1 去左佛山既某渡假村 (地方普通啦)但勝在人唔多

去左3日2夜, 小豬同咩咩就玩水玩足咁多日

咩咩一開始落水, 可能D水有小小凍, 所以有D驚, 不過好快適應, 玩得好開心

第二日落水時, 玩左陣, 仲爽到瞓著左 XD 

(不過可能因為咁而凍親個肚仔, 返到香港肚仔痛左幾日=.=")

當時係4個月27日

去完泳池, 就去沙灘玩啦...

咩咩又冇咩野喎...係海度浮下浮下好舒服呀...

結果... 當然係又瞓左啦... XD

今次見佢瞓左就啦啦聲抱佢上水啦...

lei 個係5個月3日...

好啦... 人仔細細既咩咩就咁樣完成左佢人生既第一個下水禮啦... 

過多2年就可以正式學游水啦... XD

P.S. 小豬係沙灘玩得勁開心... 完全影唔到相=.="

未走就已經開始問下次幾時再去玩啦...

童夢城

早係我大肚時, 朋友仔就話要去童夢城玩, 不過當時我大住個肚, 覺得好遠呀...
話咁快就生完, 又可以出來玩, 又見童夢城有promotion, 就買左來玩...

星期六學完游水, 啦啦聲出發... 差小小遲到...

小豬一共打左5份工, 包括左機場特警, 消防員, model, 小廚師同埋太空人...

有制服既, 影相就靚D, 所以model 麻麻地啦

另外, 小廚師咁啱遇到親子班... 唔抵... 

一親子, 小豬就變左BB, 得自己一個時, 其實識做好多野架...

其他都唔錯.. 可惜小豬大個左, 影相時開始笑容僵硬, 冇以前咁可愛lu...

由朝做到晚, ,打左5份工, 做足4個鐘, 賺左100個童夢錢... 可以換一包野飲... XD

小朋友玩緊既時候, 大人就係度行行企企, 幫佢地排下場工...咁都要收$170.00 per head 喎

好彩今次個Promotion, 1個小童價包左2個成人既入場咋...

今次未玩晒D職業呀, 下次可以再去過... 小豬玩得好開心呀...

P.S. 由於時間上有D趕, 所以咩咩留左係婆婆屋企, 冇份去... 

不過咩咩係婆婆度, 有公公婆婆既全天候服侍都不知幾爽 :P

咩咩四個月

時光飛逝... 湊住2件, 飛得仲快D... 咁就4個月啦...  可能望住小豬, 總係覺得咩咩好好好好細個...  (其實同佢D發展都有D關係)

琴日去左健康院... 體重係6.215KG (即係13.6磅左右), 身高65-66 cm (嗯, 自己用健康院既尺度, 唔係好識, 應該唔多準掛), 頭圍, 姑娘度完有講過, 不過唔記得左, 總之係大頭啦...

飲奶方面, 1日5餐, 每餐160-200 左右, 最夜果餐要210左右。 自從轉左5餐後, 飲奶方面有好大既進步, 大概15-20分鐘就可以食完, 真係慳返唔少時間。媽媽我今胎真係hea, 連泵奶都hea 左D, 為左唔俾自己太大壓力, 呢幾日開始每日解凍2包冰奶就儲返2包lu ...  雖然今次既奶量好似冇上次咁多, 不過我相信只要繼續泵, 要餵到1歲應該係可以既...

瞓覺方面, 自從搬左屋, 小豬同我地分房瞓之後, 咩咩就順理成章咁瞓左係窗台同我地一起瞓 (主要係我半夜唔想成日都要起身), 咩咩依家半夜都會叫幾聲, 塞返個奶咀俾佢又可以繼續瞓返... 有時到左朝早6點左右叫既話, 我都會埋身餵佢, 然後再瞓多陣先齊齊起身既...  so far 都OK, 最長既瞓覺時間係琴晚, 由唔夠10點半一直瞓到今朝7點...  (正 XD) 不過咩咩算係比較醒瞓, 小豬又會得閒冇事大聲講野/笑.. 好多時都係被嚇醒=.="

poo poo 方面... 勁lor... 成日都7-8日先一次, 我返工返左個半月, 今朝先係我返工以來第一次幫佢換poo poo 片...不過作為一個人奶B, 應該都算正常掛 (琴日去健康院時唔記得問下姑娘添...)

動作方面, 對人好有反應, 成日撩人玩, 一有人理她就笑, 冇人理就叫, 非常鐘意家姐, 小豬一係身邊就望到實... 對手好有力, 成日都抓住我D頭髮, 生完已經係甩頭髮, 呢隻咩咩仲要落井下石...  上個星期識得反身啦, 不過就冇小豬果時反得咁起勁, 主要係因為她未抬到頭呀... =.="
琴日去健康院時同姑娘提起, 姑娘同佢check 下 (拉佢起身, 同埋將佢擺成趴既姿式, 睇下佢可唔可以hold住個頭)話佢條頸真係唔太夠力, 要去見醫生 (當場嚇左嚇) 見到醫生時, 醫生又同咩咩做返同樣既checking ... 點知今次咩咩交足功課, 醫生話佢拉拉下咩咩自己坐左起身, 趴係度時, 又可以hold 到一陣, 仲要左望望右望望咁... 結果醫生話佢冇事...  可能只係個頭大左D, 所以重左D, 要多D力先可以hold 得住... :P

雖然好想咩咩可以快D同小豬有互動, 可以一齊玩, 但又唔想佢地大得咁快喎...  anyway... 希望2個小寶貝都健健康康, 快樂成長啦...

P.S., 今次係健康院打左2針, 打第一針時, 咩咩喊都唔喊下, 第二針先開始喊 (睇返小豬既成長日記, 原來2姊妹既反應係一模一樣架... XD)

復活節 2016

回帶到今年復活節... 咩咩當時得個半月大, 但唔想小豬因為啱啱出世既妹妹而成個復活節係屋企無所事事, 結果安排左個超豐富復活節 (攰C我...)

見到element 個冰場有Easter course, 所以就幫小豬報左, 連續4日, 每堂半個鐘。

每日咩咩都(瞓住)陪家姐一齊學溜冰...

跟教練學真係唔同D架, 第一堂已經可以係冰上行到啦

溜完冰後, 第一日, 我地係書店玩左陣, 食埋晏, 就返屋企... 小豬瞓左陣, 夜晚出去食buffet

小豬勁鐘意buffet , 因為可以不斷食糖...

果晚, 小豬食左5枝棉花糖... =.="

果晚唔知點解, 咩咩唔肯瞓, 由半夜1點幾開始, er er 到4點半食第2餐奶之後先瞓...

果晚真係勁辛苦, 第2朝又係唔夠8點就要起身

第二日, 學完溜冰, 上左element 既playground 放電... 

果個playground 都幾好玩, 又勁好天, 小豬玩得好開心

咩咩就曬住太陽嘆奶... 爽...

玩完返屋企, 老公買左細既象拔, 話要學整刺身 (果日咁啱街市冇大象拔)

結果瀨野, 唔知係關象拔既事定係之前果晚食buffet時食太多生蠔, 老公果晚唔舒服, 仲嘔左幾次...

而同一時間, 小豬由於個晏覺太遲開始瞓 (差唔多5點), 結果好遲先起身 (差唔多8點), 結果當晚佢到左12點半都仲未捨得瞓... =.="

唉... 第三日都仲係要起身溜冰架...

第三日去完溜冰, 又再戰東華嘉年華 (小豬一共去左3次)

趁佢收之前去多次... 點知多人到lei...

由於老公仲係唔舒服, 再加上小豬要求, 今次由我陪玩...

sir 左2次果個6層樓高既滑梯, 同埋玩左N個小朋友機動遊戲, 小豬先好满足咁返屋企

(由於我陪玩, 我就成日的小豬去玩佢唔肯玩, 但玩左又要玩多N次既遊戲, 例如呢個swing, 佢最後好似玩左4次)

吸取左之前果晚既教訓, 玩完返屋企直接沖涼食野然後先瞓覺, 結果小豬唔夠8點半就瞓左

而老公繼續唔舒服, 又瞓左...

而我同咩咩, 搞完9點幾餐奶, 係10點半都一齊瞓左, 諗住等咩咩叫醒我... 點知佢到半夜4點幾先再喊食喎, 真係開心C我...XD

第四日, 最後一堂, 教練帶住佢地係冰場行左一圈... 都算唔錯啦...

之後約左大學同學飲茶去會所玩

老公無聊整咩咩...

well... 其實老公真係好鐘意整蠱D囡

有相為證...

就咁樣, 勁充實既4日紅日就過左啦... 

咩咩係呢4日已經練到可以自己係BB車上飲奶... 趕時間時, 只要塞枝奶俾佢, 就可以出門啦, 佢通常都可以自己飲到大半枝既 

另一開心大發現係, elements 既育嬰室真係好正, 又靚又乾淨, 仲有免費既尿片, 尿片墊等提供, 又要助奶器, 又有熱水, 又有high chair等等, 我果4日, 日日都去果度泵奶... 唯一唔好既, 成個商場得一個咁正既育嬰室, 母乳餵奶房有時要等一陣...

好啦, 下年既easter, 咩咩就一歲幾啦, 可以同小豬一起玩egg hunting 啦~

Happy 100 days~

話咁快就100日啦...  雖然第2胎樣樣野都hea D, 但百日宴都係要搞既... 本來諗住book 返上次間酒樓, 用返上次間餅舖... 點知2間都冇做喎, 結果又搵左一大輪... 吸取上一次既教訓, 今次認認真真搞, 費事又俾人哦一輪...

小朋友都係鐘意汽球架... 小豬果晚玩得好開心

TB左一大堆波同埋一罐氣, 結果全場8個小朋友都玩到勁開心

主角咩咩是日造型...

睇佢呢一身造型, 就知道我已經被小豬training 過, 由一個完全唔OK粉紅色既人, 變成依家咁...

超貴生日蛋糕... 

但我覺得唔係好靚lor...

不過今次有記得切蛋糕, 個蛋糕都好味架... 只係貴...

(由其係我落左訂之後, 先係媽媽group度見人介紹平靚正蛋糕, 我1個等於人地3個...唉...)

其實咩咩果晚大部份時間都被包到成隻糉咁... 

D老人家驚佢凍... =.=" 

佢自己食飽奶奶又瞓埋覺, 最後大合照時就醒左, 可以影返幾張相...

其實百日宴果日係第99天...

第100日, 我地去左BBQ同行山...

真係好熱呀...

幫2個小朋友擦左幾次防蚊膏... 但就唔記得幫自己擦...

結果證明防蚊膏既有用架... 我就被咬左好多舊... 

同叔叔一齊"透"爐

小豬好開心. 終於又可以吹波波啦 ...

佢依家已經係自己拎住吹... 雖然都會fing D出來, 但已經唔會有2/3波波水被直接倒落地下啦

望住咩咩, 就會覺得小豬真係大得好快呀...

希望2姐妹會相親相愛啦...

同場加映

咩咩走佬記...

不過click 住左... XD

三個月啦...

話咁快咩咩已經3個月啦... 湊住2件D時間真係過得超快 (不過我都認我已經算好好彩, 四大長老都肯忙手湊) 快速咁講下3個月既成長記錄...

體重: 3.3 KG (出世) -> 3.95 KG (1個月)-> 4.95 KG (2個月), 3個月未磅.. (由出世時既中碼偏大B變左唔夠50既中碼偏細B =.=")
身高: 60CM (2個月), 排90左右 (長過小豬當年2CM)
頭圍: 40CM (2個月), 同家姐一樣係個大頭妹....

飲奶: 今次差唔多補左2個星期既奶粉, 先開始做人奶B。奶樽同埋身都OK...  暫時仲係1日6餐, 每餐140ml 左右, 今日開始試下轉5餐先... 咩咩有樣搞笑野, 佢唔鐘意人地抱住佢餵奶, 鐘意自己瞓係落飲奶... (其實都幾好, 可以free 到1-2隻手出來做其他野), 有時墊條毛巾係度, 墊高個奶樽, 佢就可以自己飲奶啦... 有時出街, 但咩咩又肚餓時, 我會放咩咩係BB車, 俾枝奶佢自己啜, 隔一陣佢就會食到大半枝 / 食晒架啦.... 不過咁食法唔好既地方係比較容易嘔奶,  咩咩仲係1-2個月既時候, 成日都會嘔返1-2啖出來... 食奶樽方面, 本來都係用chu chu , 不過眼見佢越食越慢, 再加個第二個冇鬼用陪月連奶都餵唔到, 所以我都係轉左pigeon 既母乳奶咀, 轉左之後食得好左, 但都算慢, 通常都要30-45分鐘

夜奶: 咩咩都算乖, 但就冇小豬當年咁勁... 咩咩頭個月, 每晚要起身1-2次... 每次都要玩返個幾鐘, 再加上為左追奶, 半夜都要泵一次奶... 真係人都癲。臨返工前既1個星期左右, 我決定半夜只係埋身, 唔好又埋身又補樽又換片又泵奶, 咁樣相對來講又好D... 咩咩好乖咁係我第一日返工既夜晚.. 戒左夜奶...都算好叻叻, 好鍚媽咪呀... 依家雖然有時仲會朝早唔夠6點就er er 叫 (1星期1-2次)但我覺得已經好好...

瞓覺: 鐘意瞓high chair , 又鐘意俾人包住來瞓... 頭一個月時, 成日抱到成隻糉咁, 佢就瞓左好安穩啦... 到依家, 咩咩夜晚仲係鐘意瞓high chair , 唔鐘意瞓自己既床仔...

動作: 超極鐘意同人傾計, 未到2個月時就會撩人同佢傾計, 一有人理佢, 就會開心笑... 同佢傾計, 佢又會俾到反應你, 自己係度er er 叫, 好似同人對答咁, 好搞笑... 唔算太喊包... 同埋今次咩咩D喊聲好容易理解... 通常係肚餓, 眼瞓 或者投訴冇人理佢時就喊啦...  如果想撩人玩時喊, 一抱起就即刻唔喊... 肚餓時, 就會喊到勁大聲, 勁長氣, 同埋真係會有眼淚...
另一樣同小豬一樣既係, 勁鐘意沖涼, 喊到折天都好, 一開始洗面除衫準備沖涼就唔喊啦, 不過咩咩上水時都係好開心既, 唔似小豬上水先走來喊...

啱啱出世, D皮膚都幾差, 果下我都幾後悔冇好好去胎毒=.="

呢張同小豬BB時好似呀...

瞓左覺都識笑 XD

自細培養自己奶樽自己攞 XD

我係賣魚妹 (開始越來越似男仔... =.=")

間唔中都會似返女仔既...

打完二月針, 有DD發燒... 果晚爸爸撩佢玩, 佢扁咀喊呀...

應該真係好唔舒服

好彩第二日就冇事lu...

第一次著褲好開心...

不過唔著褲時仲開心 XD

媽媽話冇影到扁咀喊既樣, 即刻試範一個...

三個月大啦...

要繼續健健康康, 開開心心呀~