FTM的星期天

今個星期天係我自己一打一既FTM 星期天, 因為熊熊要擺展, 公公婆婆又仲係上海未返來, 於是我留係屋企, 對住隻小豬玩one on one...

例牌一朝早係我唔肯起身, 小豬係身邊玩來玩來, 叫左N咁多聲起身後, 終於都係要起身啦~ 起左身, 俾小豬食左D面包, 就開始第一個活動啦~

就係玩水彩啦~ 小豬都幾鐘意玩架, 不過平時99 OR婆婆屋企都唔會俾小豬玩, 費事搞到人地屋企啦~ 自己屋企就冇所謂, 而且小豬玩左陣就會主動要求抹手...

對於自己既大作... 睇來有D唔满意喎... 哈哈, 下次等我買返D海棉, 俾小豬點點點先~

玩完水彩就去樓下超市買餸煮晏晝飯... 

二歲豬, 我覺得係時候要佢行多D, 所以用維他奶奶引下佢...  (小豬勁鐘意維他奶, 每次見到, 無論係大盒裝, 普通盒裝OR 佢飲開既迷你版, 小豬都係好興奮咁指住話係維他奶奶... XD)

買完餸, 小豬話要幫手拎袋喎...  咁乖豬呀, 咁我拎起舊西瓜, 然後, 俾佢揹住個環保袋, 行左幾步, 佢就伸手拎左盒水餃俾我... 行多2步, 又拎多樣野出來俾我... 於是者, 唔到10分鐘既路程, 小豬就一邊行一邊將袋入面既餸都拎晒出來俾我... 最後連自己都俾埋我, 要我抱喎... =.="

晏晝食菜心肉碎磨菇面, 小豬食得幾好, 食左ikea 既碗满一碗...  佢食完, 我又食埋野, 就又出街啦~ 今次去遠D, 又再挑戰唔帶BB車...

去到商場, 都係買杯starbucks 飲下先, (都估到小豬又會飲埋一份, 所以唔敢要咖啡, 叫左細杯既lemonade, 仲要小冰添... ) 果然, 小豬搶住要飲, 仲拎住唔肯放手添, 結果只可以快D飲晒佢... :P

飲完好味既lemonade, 就來到放電時段啦~

哈哈, 又只係影到LEI條滑梯呀... 其實lei 個係遊樂場隔離小小既一條滑梯, 好少人玩架... 通常我都會帶小豬去遊樂場玩一陣, 玩到佢開始發癲, 衰跑時, 我就會帶佢來lei 條滑梯, 感覺安全D, 所以影襯都係LEI個背景...

LEI輪小豬又大膽左, 唔玩BB滑梯, 走去同D4-5歲既小朋友一齊玩滑梯, 條滑梯係斜D, 同埋好滑, sir 得極快,  我聽到身邊的某個家長在尖叫, 話滑梯點解咁滑既....  小豬就玩得好開心... 

仲有樣好笑野, 小豬爬緊上滑梯既時候, 有個男仔係前面用D幾危險既方法爬, 小豬又想有樣學樣, 於是 我同小豬講唔可以咁做架, 咁樣好危險... 然後個男仔就拎個頭過來同小豬話, 係呀我4歲啦, 所以我可以咁做架, 你唔可以架...  (我心諗, 4歲都有D危險喎)...

放左半個鐘電後, 我就冇晒電啦, 係商場行多陣就打道回府...  小豬又係行行下又要抱幾抱, 抱到手都軟埋... 最後shuttle bus 都唔等啦, 打的的返屋企...

返到屋企幫小豬沖埋涼, 就俾佢瞓覺, 9秒9 就瞓左, 陪瞓既我都跟埋瞓左陣... 起身後覺得對手唔係屬於我架... 

瞓醒就有得食飯, 晚餐係南瓜肉碎磨菇飯, 再加菜心 (哈哈, 同下晝差唔多) 諗住換個裝飯既兜兜, 等小豬見到會開心D (不過小豬睇唔出個兜兜係minnie 呀) 食得普通啦 (當然係食唔晒相中既飯啦, 食左一半左右...) 之後就來搶我D 水餃皮食喎...

食完飯, 跟小豬玩了幾個遊戲, 又看了字母卡, 講左2個故事, 飲左奶,刷埋珍, 10點鐘就準備上床瞓覺啦~

LEI個時候, 熊熊返來啦, 見到爸B既小豬好開心, 於是... 玩到過左12點先肯瞓....

我想講多次, 其實FTM都幾開心呀... XD

2歲啦~

咁就2歲啦~~~

本來好有心機咁搵左一堆1-2歲既相出來.. 不過D app 最多都係可以擺9張相, 美圖秀秀既電腦版都唔係好多選揀, 我又趕時間... 所以有DD求其...

2歲豬啦~ 媽咪爸B希望你唔好成日都病病, 要健健康康, 開開心心啦~~ 

PG趣事

最後2間PN都出左結果, 可惜都係waiting list... 有D唔開心, 所以PN既summary 遲D先寫... 寫返D搞笑野先~

話說琴日帶瑤瑤豬去PG補堂, 第一次補weekday 既堂 (冇返太多堂, 又諗住上埋lei 期就唔上啦, 所以要快D補晒D堂) PG一向有飲水時間, 但係weekend 既堂, 飲水就係飲水, 冇得食茶點(即係自備零食), 原來weekday既堂會長小小, 中間個break會長小小, 個個家長都自備一盒餅仔or 生果, 我唔知, 所以只帶左水咋...

瑤瑤豬坐低後, 見其他小朋友都開始享用茶點, 就同我講
豬: 媽咪, 餅餅...
我: 冇餅餅喎... 飲住水先啦~
豬: (再望下同學仔) 媽咪, 餅餅...
我: 飲水先啦, 落堂先食啦...
豬: (語氣同上) 媽咪, 餅餅...
我: .... .... (冇理佢, 去左掉紙巾)
掉完紙巾, 見小豬已經食緊餅餅啦, 原來係隔離個家長請小豬食左塊餅..
點知隻為食豬食完第一塊, 未夠喎, 又問果個家長要左塊... (我係隔離滴緊汗)
點知隻為食豬食完第二塊, 仲未夠喎...................

我即刻分散佢注意, 要佢同D同學仔cheers... 揭起左成班同學仔cheers 來cheers 去 (其實平時上PG,到飲水時間, 一定會好似去飲咁架, lei 堂可能大家掛住食茶點, 所以一開始冇人玩cheers)
cheers 完一輪後, 另一個媽媽又叫仔仔請小豬食左塊餅...
就咁樣, 係各位好心既媽媽施捨下, 為食豬既媽媽(即係我)終於滴住汗咁捱過左lei 個冇帶茶點既茶點時段...

lei 件事既教訓係...
任何時間都要帶D餅餅旁身
就算係同一間PG, 唔同老師上堂都會有好大既分別架
瑤瑤豬又算大個左D啦, 識得主動用語言來表達佢既要求, 又係咁既情況都冇發爛渣 (不過, 可能只係未發爛渣前已經有個好心既媽媽請左佢食餅者... XD)

豬咀

lei 輪, 瑤瑤豬學識左豬咀

一開始, 要同佢講幾次, 先會豬...

唔駛幾日, 就已經運甪純熟, 話豬就豬啦~ XD

又面試... 最終take

終於寫到最終take 啦... 其實係我對寫面試既果團火熄左... 所以最後2次既面試情況拖左好耐先寫呀...

最後一個PN既面試係3月15 既劍鳴... 對於LEI個面試,都係當玩下, 實在太六合彩feel 啦, 5,6千個B爭4X個位, 就算覺得瑤瑤豬都唔算差, 但都未好到可以中到果40個位啦~ 所以都係玩下啦~

當係玩, 又真係幾好玩喎...
一去到, 學校安排左幾個攤位遊戲俾未夠鐘interveiw 既小朋友玩, 有吹波波, 打鼓, 做手工等, 小朋友都玩得好開心, 有D似嘉年華feel...

小豬都玩得好開心, 玩左陣, 就到小豬去interview啦 (只可以一個家長入去)~ 入到課室 (其實係一個室內既play ground, 有sir滑梯架), 交左問卷後, 小朋友就可以去玩再等叫名啦~ 小豬想玩sir滑梯 (我有D驚小豬玩得太開心陣間唔肯去面試), 不過小豬強烈要求, 就唯有俾佢玩啦~ 好彩, 個滑梯唔係好滑, 小豬click 住左, 所以玩左一次就唔玩lu (唔知點解, 會所個滑梯係好滑架, 小豬玩果個既時候係飛落來咁滯, 但係公園果D通常都唔係好滑, 會click 下click下, 小豬可能覺得唔夠刺激掛) 玩左陣其他野, 就到小豬interview 啦...

group Interview
一入去, 先坐係枱上玩玩具, 有老師行過來問平時係屋企用咩野語言同小豬溝通...
然後, 移師坐係地下個mat度, 有個net 講故事 (well , in 左咁多間, 第一間要你坐地下, 雖然有墊, 不過又唔駛除鞋, 同坐地下冇分別),
個故事係講big sister 見到妹妹喊既時候點氹佢... 講到中間, 老師請小朋友出去餵BB食面包, 我見冇人舉手話要出去, 請細細聲提水叫小豬舉手, 而小豬都順利出到去, 餵左BB食面包。
講多幾講, 老師又請小朋友出去餵BB飲奶, 今次個個小朋友都輪流出去餵奶, 小豬又自己舉手要出去, 點知拎到枝玩具奶之後, 就想自己飲喎 , 我忍唔住笑左...
講完故事, 就係跳舞時間, 啱晒小豬, 跳得勁開心。
跳完舞之後, 就要爬去拎禮物... (唔知點解要爬lei?) 要D識行識走既小朋友爬, 有時都會幾混亂, 一輪混亂後, 小豬都順利爬左過去拎禮物, 有講謝謝。

咁就in 完啦~ 成個interview都算簡單, 應該有好多小朋友都會好順利完成。唔知間學校想睇D咩野LEI...

in 完之後搵返熊熊, 原來佢係我地interview 時, 睇緊上年學校既教學報告, 上年既PN班有教中國薯仔同日本薯仔既分別, 除左教顏色, size 既分別, 又會叫小朋友試下自己種, 又會食下薯仔沙律試下味道上有冇唔同.... 咁日常生活既教學方法, 又幾好喎...

就咁樣, 瑤瑤豬既PN班大作戰正式完成啦~
等最後2間出埋結果後, 等我寫返個summary 先~ (希望寫得成啦~XD)