2014 最後一Blog... 海洋公園

今年非常非常懶寫BLOG既我, 點都要係2014年既最後一日寫返篇先...
通常應該寫2014年大事回顧, 不過平凡如我又冇咩野大事喎, 所以都係寫下漏左好多好多篇既BLOG既其中一篇啦...

熊貓家終於係12月時, 走左去買海洋公園年票啦 (熊熊講左有半年 :P) 同迪迪尼相比, 海洋公園既年票都仲係算唔貴, 當然, 買得年票就要去多幾次啦~ 所以12月熊貓家去左2次...(都唔算好多啦) 不過小豬就好開心...

第一次去 (其實係小豬既第二次海洋公園), 見到熊貓瞓緊覺, 之後既N日, 小豬都話要去睇panda 瞓覺豬喎... XD 我地10點幾去到, 去到下書就開始好多旅行團, 小豬又開始要求抱抱, 就係4點左右走人lu...

第二次, 食埋晏1點幾先入場, 但又唔算好多人喎... 有人幫手影相... yeah~

第一時間去睇熊貓... 

不過安安佳佳都係房, 唯有係出面影張相啦~

然後去睇crocodile (唔知點解, 同corcodile影相要R晒腰咁.. =.=")

今次敢摸摸隻crocodile啦 (假架), 上次連假既都唔肯...

終於見到熊貓啦~ 今次有表演食竹同埋屙poo poo =.="

食完屙完就去左瞓覺啦 (做熊貓都係嘆呀~~~)

然後, 去左兒童樂園... 小豬仲第一次玩跳樓機... 

第一次玩, 我C都要熊熊陪玩, 仲以為小豬會驚到喊呀 (因為等緊時, 見大佢好多既小朋友都玩到喊) 點知, 小豬玩得好開心, 跟住D小朋友係咁叫喎...

今次來, 小豬夠高啦, 所以兒童樂園樣樣野可以玩...

佢仲第一次自己一個人玩機動遊戲

(不過相中LEI架野普通啦, 實在係轉得太耐, 轉足2分鐘, 轉到小豬都冇心機啦~)

然後睇企鵝... 不過小豬都係鐘意行舖頭多D...

最後玩到6點幾, 行埋個室內燈海館就走啦...

LEI個整得好靚呀, 不過冇帶大機, 影得好少相~

小豬都幾勁, 冇瞓晏覺, 由頭玩到走人, 係的士先瞓覺... 

我覺得海洋公園真係幾好, 又有得玩又有野睇又唔算好多人, 睇來好快我地又會去架啦~

又生日... (又遲左...)

今次真係遲左好好好多先寫呀... :P

今年既慶生活動勁lor... 係去露營呀...
本來係早幾個星期去架, 不過個週末是係上2個月中唯一落雨既週末, 所以冇得去... 熊熊係我生日前一個星期話, 不如正日果日去啦... 又好啦, 反正年紀大左既女人只係希望一家人平平安安, 齊齊整整咁, 去邊都冇所謂啦...  不過地點就由之前開車可以去到既扶輪公園營地變成左海下營地, 而熊細佬又臨時放飛機, 所以熊熊就拎餐C lor...  (由於我又要拖實小豬, 又要拎野, 又要揹袋, 所以都冇手影低熊熊既慘況... XD)

我地下畫2點幾去到黃石碼頭搭船, 係西營地落船, 可能太好天啦, 所以對於個海既西營地已經插針都插唔入Lu , 所以就改去南營地, 係一大片草地... (但都係啱啱搵到最後一個又有枱又有燒烤爐又有位紥營既地方)

熊熊係度努力起營中, 小豬就勁嘆咁享用咁佢既late lunch 包包...

幾嘆... 手勢標準咁拎住個酒杯嘆橙汁...

成個trip, 隻衰豬只肯飲橙汁, 唔飲水...  不過, 一次半次就由佢啦...

起好左個營, 小豬就發現左隔離有隻狗仔, 於是勁開心咁要同隻狗仔玩, 好彩隻狗仔好好脾氣, 任搞... 之後果個鐘, 基本上狗仔就八八卦卦去下其他人既營, 小豬就係後面係咁追 (聽講, 因為我去左洗野...)

是日生日大餐係海鮮BBQ, 有比目魚(俾小豬架), 蘑菇, 露荀, 龍蝦, 大蝦, 白鱔, 花甲, 和牛... (由於太黑, 所以冇影相... :P) 樣樣都好味, 特別是白鱔, 真係超超超正... 小豬坐定定食左成份比目魚後, 就四圍走走走lu... 一時又話要去同狗仔玩, 一時又去爬來爬去, 冇時停, 最後因為好大風就趕左佢入營, 佢都仲要多輪, 係冇瞓晏覺既情況下, 10點幾先瞓左... =.="

小豬瞓左, 我地終於可以靜靜地望下星空, 燒下野食 (不過當時四圍D人都差唔多瞓晒覺lu...) 無幾耐後, 牛大哥就開如四圍搵野食... 都真係有D驚

果晚我瞓得麻麻地, 因為勁勁勁大風, 我成日都驚住個營會被吹走... XD, 小豬就瞓得好熱 (我估), 因為我驚佢凍, 就用左最厚既睡袋, 半夜佢自己除睡袋除左2次...  我地今次3個人瞓4人營, 好好多, 上次來既時候, 2個人瞓2人營, 真係好逼

第二朝, 熊大廚包辦左早餐同午餐, 早餐係咸牛炒蛋同粟米通粉 (唔知點解冇影相...)小豬唔俾面, 只係飲橙汁...

然後又去搵狗仔啦... 連條尾都唔放過...

主人影狗, 小豬又要影埋一份...

隻狗仔真係好乖, 小豬就...

後面個藍色橙色營就係我地架啦...

 ＿

同狗仔玩左好耐, 先開始同其他小朋友玩 (果度真係勁多人帶住小朋友去玩呀...)

去到11點幾, 好多人散水啦, 不過熊熊說要食埋個lunch喎 (都係佢主理), 有豆鼓鮻魚炒油麥菜, 蕃茄炒蛋, 回鍋肉, 粟米湯同白飯... 

終於有影相... XD

最勁係LEI個白飯, 真係用米煲出來架...

雖然熊熊自己煲都係食左幾啖, 不過小豬就好俾面咁食左1/3個飯 (應該係肚餓啦)

食完lunch就執野走啦... 食晒D野, 飲晒D酒, 行李即刻就輕左好多... 不過由黃石碼頭出返去就好煩lu, 搵唔到的士, 唯有搭巴士出西貢先, 係巴士上, 小豬就瞓到成隻豬咁啦... 然後抱住隻豬等的士又係手斷咁滯, 而最緊要係, 小豬係落的士時就瞓醒啦... =.="

整體來講, 去露營都係好開心架, 下次可以帶埋風箏過去就仲開心, 不過第二日食完早餐就好走啦, 食埋晏先返去, 大家都好攰 (星期一時, 小豬可能仲係幾攰, 係學校狂喊, 老師話小豬從來都冇咁樣過, 好彩星期二就正常返...)

K1再面試... 8

隔左好耐, 又要再面試啦...  今次係女龍校, 本來我麻麻地想小豬讀女校, 但去交FORM時見到學校校舍勁靚勁大, 即刻改觀... 可惜小豬似乎都唔想讀女校呀... =.="

面試當日係in 12:45架, 熊熊去左山野之王, 於是我單拖出發, 諗住搭的士唔太遠啦, 所以12點出門。點知等左半個鐘的士 (call 的士竟然正常價都冇人接order... 內心不斷爆粗), 結果12:50先到學校門口... 好彩又冇話唔俾in...

入到學校, D老師, 學生同helper 都好nice, 好多人都拎到公仔同小朋友玩, 小豬都有俾反應, 玩得幾開心... 等左一陣就叫number, 入課室group-in (小豬group-in既往績, 成功率係零 =.="), 一group 有7-8個小朋友, 其中一個未入課室就狂喊, 最後個家長話放棄, 另一個見到媽咪係坐後面, 而唔係坐隔離又係度喊, 結果小豬好八掛地係咁望住人喊... 另外有2個小朋友自己走左係媽咪隔離, 結果小豬又有樣學樣想走過來, 俾我叫返佢坐低

正式interview, 家長係要填問卷既...
一開始唱twinkle twinkle little star (小豬係屋企成日都唱), 不過, 當時係冇反應架
之後, 係個袋拎個生果, 講生果名同顏色, 小豬拎左士多啤梨, 冇講到生果名, 好似有講Red
然後, 扮食生果 (冇反應, 掛住四圍望), 同俾返D生果俾老師 (有俾)
最後老師俾禮物, 有講thank you...

其實我之前唔多會理解, 點解家長會in完出來會即刻話小朋友in 得唔好, 今次完全體會到, 出到來只想同小豬講, 你玩野呀... (睇來我都幾怪獸...), 當然怪獸還怪獸, 最後我都有請小豬食雪糕. 學熊熊既講法, 唯有小一時再俾心機啦...

我覺得lei 張勁好笑, 佢自稱俾Teddy Iris XD

---

暫時in左8間, 有3間出左成績, 小豬有2個am offer, 1個pm waiting...

waiting 果間係城中名校, 真係好多人爭, 小豬當日既表現幾好 (即係自己話俾老師知, 自己好乖好合作果間), 所以冇offer我覺得幾可惜...

聽講今個星期仲會有2間出成績, 希望有好消息啦~

另外, 聽日就係最後一個面試, 平常心地加油啦~