25個月

咁就又一個月啦~ 寫成長記錄其實都幾好, 以前以為一定會記得既小豬既第一次, 其實隨住時間, 係會唔記得架, 所以寫低就實冇問題啦~

25個月既小豬... 依然係得27磅左右, lei 個12-13kg既重量已經徘徊左3-4個月啦~ 唔知幾時先會有所突破lei... 高度係88cm 左右啦~

食野方面, 同之前都係差唔多, 1日2餐奶, 2-3餐飯/面/米粉/ 字母粉等, 餐與餐之前有數之不盡既小食同零食。我有同99講話, 健康院姑娘話餐與餐中間只可以做一次茶點, 如果唔係對D牙唔好架... 99好讚同, 不過讚同還讚同, 小食同零食依然係數之不盡 =.=" 食飯方面, 小豬基本上都係自己"筆"來食, 都算"筆"得唔錯, 比之前既成地都係好左D架啦~又識得自己捧住個碗來飲湯(超愛湯), 通常都係自己飲一半, 請件衫飲埋另外果半... 超超超愛飲維他奶, 我本來以為小豬只係鐘意飲紙包(可能見到大人有得飲, 所以又想飲), 有次買左包韓國草莓牛奶俾佢飲, 點知飲左2啖就俾返我啦, 但飲維他奶真係勁快, 細包果隻2啖就飲晒lu...

瞓覺方面, 我99成日講, 小豬依家最唔聽話就係瞓覺, 要氹好耐好耐先肯瞓... 我都覺得係貪玩左... 我以前夜晚一邊開住電視(但冇聲既), 一邊同佢唱下歌, 拍下佢就OK啦, 但lei 輪小豬係要坐係度同我一齊睇電視, 仲要睇到好入神, 我唯有熄左電視陪佢一齊瞓啦~ 結果, 我瞓左小豬都仲係跳緊... 所以lei 輪我晚晚都好早瞓 (11點左右啦)

Potty training 方面, 小豬從上海返來之後就正式開始左potty training 啦... 99話, 每次vee vee 完就會同99講"嫲嫲濕濕, 嫲嫲濕濕..." 但就唔肯坐potty, 要vee 係地上/ 片片上 =.=" poopoo 方面, 有試過一次成功既... 唔心急, 慢慢來啦, 唔好俾壓力大家 (主要唔係我洗褲既... :P)

動作方面, 繼續向住馬騮方面發展, 帶佢出去放電真係放埋自己D電咁, 不過放電工作大部份時間都係62來做, 每日朝早就99帶小豬去會所, 瞓醒晏覺就叫爺爺帶去公園, 一日出去玩2次係唔係太多lei? 依家識得自己上落樓梯, 如果拖住佢一隻手 (如果佢肯俾你拖既話), 行樓梯就好似大人咁連住行架啦~ lei隻豬出街仲係唔多肯俾人拖手行 (lei 樣真係最頭痛). 有時拖住手行得果一陣, 就要你抱 (好多時仲要指明要我抱), 真係抱到手都斷, 所以依家出街仲係要帶住BB車 (但隻衰豬好多時都唔肯坐BB車, 要用餅, 維他奶等引佢坐一陣) 依然會瞓地下, 所以我同熊熊既共識係瞓地下, 數3聲都唔起身既話, 就要打pat pat ... 試過一日打左4次patpat...其他唔乖既地方會講道理, 只係唔可以瞓地下...

講野方面, PG話要識講全名喎, 小豬仲係唔多識, 不過維他奶奶就講得好標準, 好明顯係小豬唔肯講啦~ 其他單字比之前都多左好多, 雖然主要係食物, 都好呀... N+V既簡單句子, 係見完健康院姑娘後都明顯多左... 識唱既歌除左完整ABC song之外, 仲有好幾首超級無敌估歌仔, 包括twinkle twinkle little star, thank you song, happy birthday, which way we should go, number song, I love my family等 (well, PG話最少要識唱一首中文歌喎... 其實, 小豬都識唱"我是隻茶壺"既, 不過大部份人聽唔明者...)

病病方面, 小豬係2歲生日前 (即係去上海前) 又病左次甘既, 食左第2次抗生素... 今次小豬食藥真係好乖, 完全冇反抗, 食完藥仲主動飲水, 仲會自己拍手話叻叻... 雖然食藥好乖, 但都係希望小豬唔好成日病啦~ 1-2歲好似加加埋埋病左5次呀... 遲D仲要返學添...

含住維他奶既包包樣, 你話如果平時都係包包樣有幾好lei...

難得企定定俾我影相

唔夠一秒就走左lu...

見我地走左唔等佢, 又喊住咁跑返過來...

依家隨時隨地都可以影到既豬嘴相... XD

趣事

今朝瞓瞓下覺, 俾熊熊拍醒, 問我係床尾果舊係咩野來架...
瞓到懵懵地既我, 望左眼床尾, 仲係度諗唔通琴晚瞓覺時唔記得拎開D衫? 再順手望左一眼窗台... Ops 唔見左小豬既?
原來, 小豬半夜唔知點樣地碌左去床尾,仲要好好瞓添...
真係諗極都唔明小豬係點樣碌過左我, 去到床尾, zip左係我同熊熊中間... =.="
小豬咁既睡姿, 遲D要佢自己瞓時, 應該會不斷咁碌左落床添...

---

最近... 我發現小豬好似識講粗口... 應該話係識鬧人...
試過幾次, 叫小豬唔好做某D野, 抱開小豬時, 小豬就會一輪嘴咁講"ABCDEFG".....
諗左好耐, 我覺得應該係有人(多數應該係我家大少)係小豬面前用過粗口鬧人, 小豬當然聽唔明又學唔到果D一輪嘴粗口, 但就知道左原來係某D場合係要一輪嘴咁講野以示不满... 所以佢就用左佢最熟悉既"ABCDEFG", 一口氣咁講晒出來, 以為咁樣就係鬧緊人啦~
雖然, 好好笑, 但都提醒左我, 小朋友好多時係我地既一面鏡,我地做緊既野, 小朋友很容易就會跟住做啦~ 所以首先要再三提醒各人唔可以係小豬面前鬧人/ 講粗口...

送上醜樣睡姿一個...  lei 幾日又係夜一夜都唔肯瞓, 第二日就換好晒衫都唔知醒...  =.="

又肥佬~~~

又肥佬啦.......................
講既係4月尾, 見健康院見姑娘, 跟進講野方面既進度... 結果... 又肥佬啦~

約左期, 4月尾, 去到健康院, 先知原來除左係跟進講野進度, 仲要跟進小肌肉既運用 (即係砌積木) 粗心既我完全冇留意小豬原來連Lei part都係肥左佬既, 所以完全冇練過 (主要係屋企係冇積木既...)

小肌肉果part. 姑娘今次要小豬砌五層, 結果小豬搞過晒姑娘枱面既所有野, 又指住D積木講晒D 顏色, 就係唔肯砌... 最叻果次砌到第五層時就掉晒lu...
姑娘話, 咁要肥佬架喎... 我於是面懵懵解話, 屋企冇積木呀, 所以可能小豬唔係好知點玩法... 姑娘話, 咁好啦, 俾張紙你畫圈啦~ 小豬很開心咁拎住張紙, 我啦啦聲同佢唱歌, make a circle... 好快, 小豬既圈已經畫满成張紙lu... 姑娘話, 畫圈都係訓練小肌肉既, 所以小豬合格啦~ (我滴晒汗)

然後, 姑娘話, 不如順便考埋佢認知能力啦~ 就拎左本日常生活用品既書仔出來, 叫小豬指...  小豬基本上都指到, 到最後冇心機亂咁指既時候, 我地話佢錯叫佢再指過, 佢都有指啱返... 姑娘話小豬既一般認知冇問題, 亦都識得聽指令... 既係冇事

最後係關於講野方面, 姑娘主要係問我, 我講左D日常小豬會講既單字, 顏色等 (不過姑娘要我講, 我又一時間真係講唔出喎... ) 然後, 姑娘就問小豬識唔識講名詞加動詞咁講, 我話好少, 聽過1-2次啦... 姑娘就話, 要同佢講多D野, 俾機會佢講多D, 有時小豬講完一句唔知咩野野時, 家長可以試下幫佢re-phase等... 30個月要再跟進... 即係肥佬...... (我有諗過, 係咪因為我講唔晒小豬平時係屋企講既野, 所以搞到佢肥佬lei.. 不過小豬係當時又真係啱啱先開始講N+V喎... 算啦, 再跟進都唔係好大件事者, 小豬係識講好多BB話架, 係我地唔識聽者... :P)

臨走前, 我同姑娘講, 覺得小豬有D鬥雞, 姑娘望左陣話唔覺, 但都即刻安排左我地見醫生, 不過可能要等耐D... 於是 我就同小豬一齊去洗手間。 洗手間中有個BB洗手盤, 啱晒小豬既高度, 所以同小豬玩左陣洗手, 點知未洗完手就叫名去見醫生啦~ 超快~

Lei 個醫生好nice, 同小豬玩左陣, 又檢查左一輪, 結論係冇事... 我話有時影相係幾覺, 仲show 埋相俾醫生睇, 醫生睇完一輪既結論係... 小豬既鼻樑太低, 所以有時影相係遮左D眼白, 睇相就會覺得眼珠去左一邊... 鼻樑會慢慢生高(希望係啦~), 到時就會好好多啦~ XD

就咁去完健康院, 30個月見啦~

母親節之 Red Bull Flugtag 梁祝化蝶 2014

今年母親節, 照樣係提前食左個飯, 熊熊依舊係冇表示架... (哼)  不過算啦...
母親節既活動係去睇契爺跳海...  XD

諗住會好多人, 所以今次輕裝上陣, 只係帶左揹帶就出發啦, 冇拎到BB車... 去程時, 小豬都算幾乖 (因為著左小豬好鐘意既水鞋), 搭地鐵時都不外乎行來行去, 四圍搞搞震, 最後出動左iphone, 就乖乖坐到中環...

去到中環真係人山人海呀~ 好彩我地有staff pass 可以成功咁入到去同契爺影相

(唔知點解影到爆晒光咁... 又唔知點解影到我咁肥...  唔好答我因為個人既關係lor.. )

由於我抱住小豬, 冇得四圍影, 唯有借用下朋友D相啦~

Lei 個墓都幾整得幾好喎....

臨跳前, 係跑道上既最後準備...

跳完後, 契爺幾開心~~~ XD

小豬可能見多人, 個地上又唔多好行, 主動要求做隻樹熊豬, 全程坐係揹帶上, 得閒聽到強勁音樂, 又會自己un下, 但就唔肯落地... 所以都母親節我係去左擔泥架... 擔泥2個幾鐘...  =.="

離開中環後, 熊熊說要買野返去韓燒喎, 所以去左TST既韓國街, 點知瀨野... 去到TST後, D下大到LEI... 我揹住小豬用一把遮, 熊熊同朋友用另一把... 行果10米左右既露天地方, 我就濕左半邊身, 熊熊同朋友就濕到好似著左衫沖完涼咁 (都唔知佢地把遮用來遮左邊度) 幸好. 小豬只係條褲濕左小小咋...  即刻覺得好彩冇推BB車, 如果唔係仲狠狽...

係韓國街買左D燒烤野就打的的返屋企LU... 而小豬係的士上終於記起今日未同周公子玩喎, 急急去會周公子啦~~~

就咁樣, 簡單, 狼狽, 擔住泥又愉快既一個母親節... 下年應該唔晒擔泥了掛~~~

T2事件簿...II

T2繼續中...

琴日, 小豬3點幾先開始瞓晏覺, 一瞓就瞓左差唔多3個鐘, 最後俾我捉佢起身 (費事夜晚好夜先瞓啦~) 起身後既小豬, 玩左一陣就準備俾佢食晚飯啦~

首先, 唔肯坐係自己張highchair 度, 所以喊... OK... 咁坐係自己既凳仔度啦~
然後, 望住碗粥, 又喊...  嗯... 碗粥都唔係好醜樣者... 不過唔食就唔食住啦...
咁小豬唔食, 我同熊熊就飲湯先啦...  小豬見到我地飲湯... 又喊...
以為佢都想飲, 就俾左一啖佢啦... 點知, 佢喊多下...
Ops... 咁既係點嗎?
最後, 小豬要我抱住... 熊熊就自己飲湯... 我試幾次想飲埋一份, 點知一拎起個碗, 小豬又喊喎...
=.="
搞左3-4個字後, 小豬突然指住個碗, 話豆腐 (其實係淮山)... 然後就開始食我D淮山喎, 食食下仲食晒添... 食完後, 仲自己坐低, 食左半碗粥添...
真係R晒頭, 都唔知發生左咩野事...

T2事件簿

T2 stand for Trouble / Terrible 2....

進入左T2既年紀, 真係有D terrible, 但又好笑喎, 所以要記低先...
事1
平時飲瞓覺奶前, 要自己瞓好, 舉手, 講" 奶奶" , 講名同埋鍚媽咪5啖,  係23個月左右開始, 突然唔肯做LEI堆野喎, 一叫小豬講"奶奶" 就碌來碌去發脾四, 有試過僵持左10分鐘先唔肯講 =.="
唯一肯做既就只有鍚媽咪... :P
所以通常都會有奶飲... 過左幾個星期又冇事返lu...

事2
屋企買左2張俾小豬坐既小凳仔, 小豬成日都會搬來搬去, 以便佢自己爬上床OR 去洗手
有晚, 我搬左去廚房, 企高D拎野落來 (之後仲要擺返上去架), 小豬見到就要搬返出去喎, 於是我同小豬講" 媽咪要用呀, 放陣先啦" 小豬唔肯, 堅持要搬出來, 仲拎住張凳仔, 再啤住我喎... 真係啤加... 啤完一輪就搬左張凳仔出去啦...
重點係... 一將凳仔搬離左廚房, 小豬就放低張凳, 仲開始喊添... 仲喊住行過來要我抱抱安慰添 =.=" 我剛剛俾隻豬啤完, 都好想喊喎....

事3
LEI件係聽返來架.... 不過可信性都好高...
小豬間唔中就會自己"了" 鼻... 爺爺話, 果日小豬自己"了"鼻, 仲"了"左好大舊白雪雪既鼻C出來...
正當爺爺想拎紙巾俾小豬時, 小豬走去請嫲嫲食喎...  而嫲嫲又好開心咁以為粒寶貝孫有好野請自己食添... 好彩食之前都有望下咋...
我聽完笑到肚痛... XD

2歲相

之前見到groupon 有影相 package, $268, 包12張相, 所以又買左。
雖然, 要我家大少熊熊大人出山影相, 真係好鬼難, 不過每年同小豬影一次相, 咁熊熊都唯有接受啦~ XD

今次係Sens 影, 大少話要假期先影, 所以要加HK$300.00 (求其啦, 加就加啦, 反正都冇諗過$268可以買到單) 同上次 face比, Sens 冇場景俾人揀, 只係一間房同埋有D玩具同道具...

先來小豬既獨照... 影得幾好, 可能小豬大個左, 表情豐富左好多, 攝影師又捕住得好好, 雖然背景係一片白, 但都可以揀到唔同表情既小豬相

同爸B既"溫馨"相

Lei 條裙其實好靚架, 不過,可能影到好後期先換, 小豬冇咩野電lu, 所以揀唔到D相可以見晒成條裙架... 

最後係家庭相... 都幾好... 唯一可惜既係, 揀唔到我同小豬既二人相...

不過, 揀相既過程真係唔多愉快... 揀相時個staff 又要坐係度幫你揀, 聽到你話唔諗住買多幾張相, 就連返轉頭想睇多次都唔多肯...  最多熊熊話會買返個slideshow, 個staff 先叫合作小小咋... 其實間公司都應該唔算細呀, 我見都搵D明星family 影下相, 做宣傳,但咁做生意法, 只可以話, 間公司之後既發展真係大極都有限... 

最後買多左2張相, 再加埋個slideshow, 買單一千大元... 見小豬都算影得幾可愛, 都算啦, 不過唔會有下次lor...

.