重陽郊遊

補埋篇過期BLOG先~

今年重陽節好好天, 風和日麗又秋高氣爽, 所以熊熊話要帶大家 (包括左熊弟弟, 公公, 婆婆, 貓貓同小豬)遠離人煙, 去郊遊 . 不過佢唔記得左果日係重陽呀... 結果就 ops... 去左清水灣郊野公園, 仲多人過銅鑼灣, 旺過旺角 =.=" D 車多到打晒蛇餅... 不過郊野公園既位置都幾方便, 又有一個好大既燒烤場, 好多人係度BBQ呀~

一路上瑤瑤豬都好開心. 可能知道有得出去玩, 所以好合作, 又肯戴帽。落車後見到打晒蛇餅既車龍, 熊熊決定泊車係路邊, 我地就係停車場附近等。有好多人來BBQ, 亦有好多係來放狗, 放風箏 或 放B。見有D山路, 最後都係決定揹住小豬行 (要讚多次條揹帶, 揹住24磅人仔都仲算輕鬆, 可以行陣山) 去到山頂既涼亭,係放風箏既地方, 已經有好多小朋友玩緊啦~ 不過剛剛去到時, 剛好係下晝2-3點, 好曬, 所以就玩左陣吹波波, 然後去搵地方野餐...

冇錯... 係野餐... 由於熊熊對LEI件事好認真, 帶晒D露營用品, 所以我地既野餐係有即場煎腸仔同西班牙海鮮飯架。個飯仲幾好味添 

小豬都算第一次咁近距離接觸大自然, 所以好好奇, 咩野都走去睇下, 不斷要求出去行 (所以話係放B, 真係同放狗差唔多架... XD)

玩到4點幾, 通常小豬點頂, 到LEI個鐘數都要瞓覺啦, 所以熊熊仲超細心咁帶埋張珊瑚被俾小豬墊住來瞓 (平時又唔見對我咁細心...), 又開埋奶, 又唱埋歌, 又出動埋奶咀, 點知小豬都係唔肯瞓, 抗爭左一大輪之後,. 抗爭勝利, 熊熊抱起左佢, 小豬即刻開心到笑左出聲... =.=" 

差唔多每一group 人都有1-2個B / 小朋友, 所以好多人係度吹波波呀。我買果個係手動架,  真係按到手軟。見隔離係用電動架, 個小朋友自己玩, D波波就係咁出啦~ 搞到我都想買返個, 費事辛苦自己啦~ 唔好既地方係, 電動出既波波size 比較細, 同埋個個波都差唔多大細, 唔似手動或吹出來果D. 可以好有變化。不過, 瑤瑤豬應該冇咩野所謂, 佢係咁想行去個細佬果邊玩埋一份, 同時又指揮我不斷咁吹波波...

差唔多5點既時候, KO埋個海鮮(湯)飯, 就收拾去放風箏啦, 順便仲可以睇日落...

個風箏既年紀仲大過瑤瑤豬呀, 係上次同熊弟弟一齊去露營時買架, 好彩熊弟弟好細心咁收埋左, 今次先唔駛再買過咋, 可惜今次玩玩下斷左線呀...幸好有幫佢留倩影... :P

就咁樣, 今次個郊遊順利完成, 之後就行去攞車同食晚飯。 可能小豬知道走人啦, 所以自己走左去釣魚, 未行到去車果度, 已經係咁"鐘下鐘下"啦~ 之後仲任抱都唔醒, yeah ... 可以食餐安樂既晚餐啦~~~

LEI個姿式, 由開飯到埋單都冇變架, 幾勁~~~

怪獸熊貓 之 更新

N班既報名(交Form)活動已經七七八八啦, 開始等面試, 聽講座, 面試同等結果, 來個小總結先。
目前為止報左11間學校, 仲會報多一間 (之前以為DEAD 左果間, 原來連FORM 都交唔到, 所以冇計), 暫時有6間安排左面試時間。

其中2間已經面試左, 一間收左瑤瑤豬, 另一間就11月頭知道結果 (應該係唔得既)
星期六知道有offer, 並要求這個星期三至五去交留位費時, 開心左一陣, 然後就諗住之後D interview 點好lei? 個offer 雖然唔係好心儀既學校, 但地點OK, 又係上午班, 所以我都係會俾留位費既, 話晒都係小豬第一次憑自己既努力(哈哈, 如果有努力既話) 得到既offer ma...

未生BB之前, 會覺得家長幫小B報6間8間幼稚園好誇張, 但估唔到輪到自己既時候係12間 =.="
怪獸家長... 唯有認左佢吧啦~ 不斷提下自己, 唔好太催谷小豬, 亦都唔好太緊張個結果 (當然有左offer之後, 講lei句講得輕鬆左, 話晒小豬一出世, 係完全冇諗住要即刻報幼稚園, 而樓下果間又係超難入既...真係一D"揸拿"都冇架) 等小豬每次都開開心心地去一個新地方玩玩...

星期六見小豬玩到成身汗 (係冷氣房 =.=") 於是幫佢紥左三條蔥, 戀女既貓貓覺得好可愛... XD

18個月

yeah~ 瑤瑤豬歲半啦~

身高, 繼續係80CM左右, 姑娘話算係中碼B, 發展正常 (唔通真係矮豬豬?)
體重, 10.9KG, 即係24磅, 今次係著衫自己企係電子磅上架, 可能個磅同屋企有D唔同, 所以都搞左輪

食野方面, 不過不失, 同之前都差唔多。基本上咩野都食啦, 依然好為食 (good good~)
一日5-6餐, 其中2餐係奶, 其它係粥, 米粉同麥皮。99會煲湯俾小豬飲, 佢都好鐘意。 姑娘話18個月要食飯仔, 最好係跟大人一齊食 (之前已經同99講左好幾次, 不過99唔信, 今次佢自己係健康院聽姑娘講, 夜晚即刻俾左小豬食小半碗大人飯)
LEI期鐘意自己食飯, 仲要左右開工添...XD

Poo poo 又開始正常返, 依然十個臭 =.="

 

 拎返之前D相, 雖然個樣唔同左, 但一樣瞓得好淋

瞓覺方面, 時好時差。試過連住幾晚半夜都喊醒, 我諗住攬下佢 (以前咁樣就OK架啦), 點知仲俾佢推開添, 要開燈見到係媽媽先肯過來 (可能係發惡夢掛), 一般夜晚10-10:30 瞓, 朝早7點幾瞓住飲奶, 再瞓多1個鐘。日頭就nap 2-3個鐘

講野方面, 今個月算係比較大進步 (當然2歲依然係要返健康院follow), 識主動講既有bye bye (最鐘意睇左5秒書之後, 合埋本書, 然後講bye bye =.=") 謝謝 (基本上可以運用自如, 任何想要既野, 都會講謝謝先~) nono (又一運用自如既單字, 唔肯既時候可以不斷搖頭加講nono ...)
其他仲有apple, duck, blue, baba , mama, 婆婆, 嫲嫲
其他既單字, 就係跟人口水尾, 可以跟到幾多下

動作方面, 最鐘意跑跑跑, 試過好幾次跑得太快, 轉唔切彎, 最後撞牆再彈返落地 XD, 見識過幾次之後就唔會緊張啦, 只係覺得好好笑
好鐘意刷牙, 其實係鐘意用牙刷點水, 再擺係口入面啜啜啜。
非常鐘意玩水同洗手, 試過公公帶小豬洗手, 洗左4次都唔肯走 =.="
返屋企識得自己除socks, 然後放去洗衣籃

性格方面,就越來越明顯啦, 係個冇耐性但又唔怕生既小朋友, 雖然成日都笑但脾氣唔多好, 要好好教, 唔好俾爺爺嫲嫲寵壞呀...
今個月去左2場面試, 媽媽都好满意, 唔係因為小豬表現地好 (其實個表現真係好麻麻 :P), 而係見到小豬每次都好開心地係一個新環境玩, 好快就融入到, 一D都唔覺得面試係樣辛苦野
LEI幾日, 小豬好有主見地唔肯著著開既果對鞋, 一著上腳, 就係咁nono 到暈, 一除就冇事 (哈哈, 小豬開始大個女啦~

歲半啦 (所以有籍口可以買蛋糕 yeah~~~) 爸B媽咪希望你每日開開心心, 快高長大啦~  唔好成日扭計發脾氣 (千祈唔好再瞓地下, 下次見到要打打 !!)

今朝瞓醒 見到小豬將自己埋左係公仔堆中好搞笑, 正想影相時, 熊熊話佢已經影左啦~~~ XD

忙碌的星期六

剛過的星期六, 超忙, 走4場...

第一場, 係N班大件戰 take 2, 方方樂趣

今次in 9 點, 算係幾早, 不過咁都好, 唔會miss 左之後的PG 

預鬆左時間, 8點半就去到, 仲冇人排隊 不過一陣就開始有人啦~ 原來最早果場係8點45分, 所以要等一陣。

終於有得入去玩啦~ 小豬好開心, 四圍走四圍玩, 見到有得玩呔盤, 就坐左上去玩左好耐。LEI 間幼稚園既playground 比較細 (應該話整體都好細)同埋係open area 加左蓬, 平時應該都OK, 但interveiw 果日本來就熱, 再加多人, 熱到D BB個個滴晒汗

等緊既時候, 小豬竟然走左去reception miss 隔離, 坐低, 仲同miss 講左輪BB話, 可惜人地應該聽唔明你講緊咩野 :P

輪到小豬in 啦, 爸B臨時被通知可以一齊入去, 所以牛仔褲T-shirt 就走去interview 啦 (不過貓貓一早知道會入去in , 都係牛仔褲T-Shirt XD)

今次interview 既miss對BB好熱情, 亦都好多讚美, 個interview 就比較短同簡單

一開始玩lego, miss 示範砌左一舊, 要小豬砌埋另外2舊, 小豬OK

之後拆散lego, 將藍色俾爸b, 紅色俾媽咪, 小豬ok (應該係撞彩, 小豬未係好分到顏色)

然後, 叫小豬指邊個媽咪, 邊個係爸b, 小豬指到。再問, 媽咪隻手俾邊, 小豬呆左, 問多幾次後, 佢伸左自己隻手出來 XD, 再問多幾次, 都係唔得。 改問爸B隻手, 爸B即刻同佢玩give me five, 小豬一拍, 當係指左啦, miss 順手同左小豬玩give me ten (係屋企冇試過), 小豬都識俾2隻手~

之後玩puzzle, 今次比較難, 係動物既puzzle, 係miss 既幫助下, 勉強完成左一個

最後, miss 拎左香蕉同蘋果既玩具, 叫小豬揀一個俾爸B, 另一個俾媽咪

走之前, 小豬都有同miss 揮手講bye bye

interview 完左, 校方仲好細心咁安排左compus tour, 雖然校舍比較細, 不過就見到D miss 都好nice。 小豬見到個外籍老師都唔驚, 仲當左係自己屋企咁, 係咁走來走去, 又走去搞D玩具。

就咁樣, 唔到9點15分, 就走人LU~

見時間有多, 就去食個早餐先。 小豬第一次去茶餐廳, 好好奇, 自己拎住碗同羮, 扮食空氣 XD

食完早餐, 就去PG啦~

去完PG, 返來食左粥粥。原本想佢瞓一陣, 咁樣先有精神去另一間幼稚園既open compus 嘛。點知陪瞓果個 (今次唔係我)都瞓著左, 小豬仲好精神咁係隔離玩玩玩, 去到點幾都唔瞓就算啦~

嗱... 一上車即瞓... 唔到半個鐘既車程邊夠架。所以, 本來想自己去行一轉間幼稚園就算, 不過99又話叫醒小豬去玩下啦~ 都好啦 反正抱返屋企時又係會醒... 

幼稚園既open compus, 搞得好有聲有色, 有攤位, 有表演, 有遊戲, 仲有好多好多既人呀... =.=" 真係多人到爆... 我見D攤位都唔係好啱小豬玩, 所以都只係行左個圈就走啦。 特別既地方既, 有個幾大既open toilet, D細細既馬筒同尿兜好搞笑呀, 洗手既地方都係矮矮架, 於是同小豬洗左次手 (佢超鐘意洗手玩水), 然後就走啦~ 臨走個汽球一個, 小豬超鐘意, 不過好快, 枝棒就俾小豬拆斷左lu...

參觀完, 就即刻返屋企瞓覺, 因為仲有最後一場既莊友聚會。小豬一開始當然唔肯瞓啦, 搞左一輪之後, 瞓左2個鐘先俾我地搞醒...

是次聚會, 小豬唔多合作呀, 粥又食小小, 又唔肯俾人抱, 要自己行, 好彩食飯果度有間房, 咁小豬行來行去都冇咁驚。

好消息係好快又會多個凝天B啦~, 不過我就俾人笑到面黃LOR (要罰隻熊跪鑽石... 哼....)

行完四場, 貓貓攰死左啦~~~~

生活二, 三事

瑤瑤豬平日係嫲嫲湊架。嫲嫲基本上每日都會帶小豬去會所同其他小朋友玩下, 由於每日去既時間都差唔多, 所以識左一班BB及BB照顧者既朋友。小B見到面, 大家會攬攬, 大人當然係吹下水啦~ 所以成日都會有D趣事。

最新趣事, 前日瑤瑤豬如常落去玩。朋友仔中, 有個BB著左對新鞋, 同小豬果對一模一樣。小豬發覺之後, 以為對鞋係自己架, 所以走去除人地對鞋 =.=" 個BB當然唔肯啦~, 於是一個跑一個追... 追果個發覺跑得唔夠人快, 於是用爬 =.=" (爬會快過跑架咩???) 而最搞笑既係, 其實小豬追緊人地既時候,係著住自己果對同人一模一樣既鞋架... 

99話, D大人係隔離望住, 笑死左... XD...

--

上個星期開始, 瑤瑤豬識得講謝謝啦~ 當然, 一開始, 講得唔多清楚, 又唔多肯講, 但到左今個星期, 已經可以純熟咁運用。可能佢發現左LEI個字好駛好用, 依家係超自動波啦~

例如, 飲睡前奶, 以前佢會識得自己瞓好, 舉埋手話要飲奶奶, 但要佢講埋個謝謝 或 奶奶, 就好似打緊佢咁, 於是飲奶前既講野訓練通常都係喊住咁完結。LEI幾日, 自動波瞓好, 舉手, 唔駛提都講埋謝謝, 然後就即刻有奶飲, 大家都好輕鬆 :)

又試住, 貓貓拎住小豬既奶咀, 小豬見到就行過來, 講聲謝謝, 然後直接含住個奶咀就走左...

咁確實, 謝謝係好駛好用既, 希望你繼續用多D啦~

--

琴晚返去, 發覺瑤瑤豬既新詞彙 "NO"

然後, 小豬已經變身做左NO NO B啦~ 咩野都NO NO, 幸好, 佢應該都識"NO"既意思, 唔係"念口黃", 有野食時候, 係唔會講NO NO 架

-- 

琴晚湊小豬返屋企時, 小豬要自己行。 通常佢都唔俾人拖住行, 要自己自由奔放咁係天橋上一路叫一路跑 =.=" 咁冇咩野人既時候, 都ok既, 但琴晚應該剛剛來左班車, 所以好多人, 唯有堅持要佢拖手手啦~

估唔到小豬拖左爸b隻手之後, 跑過來, 拖埋媽咪隻手, 就咁樣三個人手拖手咁行返屋企啦~ 感覺好幸褔呀~~~ (雖然3個人一字排開, 再加bb車, 好阻住人 :p)

瑤瑤豬既第一個interview

10月5日... 瑤瑤豬既第一個面試

好多人都去左LEI個面試, 瑤瑤豬被安排係5:30 in, 個時間幾好, 可以食飽瞓夠先去in (想像中), 但現實係, 1點幾去左飲茶, 小豬2點9先肯瞓... 瞓到4點9仲未瞓夠, 結果變左呆呆豬... =.="

去到啓思, 真係超多人呀, 同樣係5:30 in, 有成幾十個家長排緊隊。幸好, 學校好體諒, 可以由一個家長排隊, 小B可以去學校既playground 玩。其實個playground 都唔算細, 不過實在太多人, 基本上係一大班小B係度呆企。

LEI個玩具好搞笑, 好似一大班B一齊企係入面, 等D家長來"探監"... XD

仲有個細細既魚池, 瑤瑤豬企左係隔離睇左好耐魚魚














等左3-4個字之後, 就入去啦~ (不過冇再影相LU~)

入到去, 有4張枱仔, 上面放左D玩具, 等D小B自己玩玩具, 等MISS過來同佢地interview
瑤瑤豬都等左陣, 玩緊果張枱就坐左幾個小朋友玩緊, 之後有個miss 就過左來, 叫我地去另一張枱interview (另一張枱有好多新既玩具, 瑤瑤豬keep 住都好想玩咁, 唔多理個miss... 唉)

首先, miss 拎左張報名表出來, 問小豬張相係邊個來架, 小豬就指住張相, bilibala 講左陣BB話

然後, 考形狀, 有6個形狀puzzle, miss 示範放左一個入去, 叫小豬做埋其餘既5個 (係屋企, 成功率係50% 左右)。 小豬都叫幾叻咁放到4個, 最後一個長方形做唔到...

下一個, 砌積木 (屋企只玩過lego, 冇玩過積木, 原來2者好唔同, LEGO放左上去就食住左, 積木係唔得既) 試左幾次, 都係放左上去, 但唔肯放手, fail... 好彩都肯俾返D積木miss

然後, 問邊個係媽咪 (心中暗喜), 點知小豬係冇反應架... 問左幾次, 都係冇反應, LEI個時間, miss 拎左個杯仔出來, 話請媽咪飲水, 小豬終於識得俾我啦... 之後要佢俾埋塊餅俾我, 都有俾

下一個, miss 拎左本紅色既書出來, 打開第一頁, 有隻蘋果同朵花, 問邊隻係蘋果 (心中大喜, 諗住唔係咁好彩下, 小豬識既一千零一個字, 咁都問中...) 結果係, 邊有咁好彩呀, 小豬又係冇反應 (平時佢見到會apple apple 係咁叫架), miss 指住隻蘋果俾小豬, 再問邊個係蘋果, 小豬就走去指左朵花... ops... 哈哈, miss 都冇佢咁好氣,叫媽媽同小豬一齊睇下本書 (但明顯個miss 已經週圍望啦)
睇完紅色書, 再睇動物書。小豬見到隻狗仔, 有扮狗仔叫, miss 又問係其他動物係咩野, 都係冇反應架 (LEI個正常, 平時係屋企都只會扮狗叫)

最後, miss 拎左個公仔出來, 問五官, 都叫識晒既... 臨完既時候, miss 俾左張貼紙, 要小豬講謝謝, 小豬都係開口講左D野啦, 最後都識得揮手同miss 講bye bye

總體來講, 小B既interview 真係控制唔到架, 諗住識既野又會突然唔識, 諗住唔識既野, 又好似識小小喎, 所以真係要用好平常好平常既心去interview, 當帶住阿囡去個新地方玩下啦~ lei 間應該都唔會收架啦~

唔知之後仲有幾多個interview lei?

又剪頭髮

繼續寫過期BLOG先~ XD

瑤瑤豬對上果次剪頭髮, 係貓貓操刀... 不過由於熊熊係隔離bilibala, 就變左斜陰頭啦~


舊相回顧 (瑤瑤豬個樣好奸呀...)
其實貓貓覺得都唔太差者... 雖然啱啱剪完既時候有D短, 之後都開始順眼啦~
不過熊熊就得閒無事係隔離取笑小豬既髮型(主要係取笑我就真... =.=")
well... 終於等到瑤瑤豬既頭髮長返, 可以再去剪啦.. 今次都係出去剪啦~ 一來就來到面試季節, 貓貓驚自己又一個唔覺意失手, 而最緊要係費事熊熊又係隔離嘈嘈嘈啦~~~~

於是追月日就去左剪頭髮, 係坑口既髮型舖, 已經係第三次剪啦, 但就係第一次自己坐係度。剪之前當然係影張相啦~ 不過隻衰豬唔合作, 點都影唔到正面相...
好彩既係, 剪頭髮都算合作, 出動左iphone 同星星餅就OK啦~ 雖然剪陰既時候有DD唔舒服, 不過見媽媽係隔離, 又有得嘆餅餅就冇出聲啦~

(題外話, LEI個SALON, 瑤瑤豬剪過3次... 貓貓覺得個髮型師真係唔太有愛心...唔係話佢對住D小朋友點樣唔好, 只係冇笑容, 一睇就覺得佢冇愛心。做左媽媽後, 總希望人地會笑笑口咁對住小豬, 雖然瑤瑤唔算係人見人愛型, 不過, 做得小朋友生意, 對住小朋友笑下, 令佢地合作D都好應該者... 不過唔知附近仲有邊可以幫BB剪頭髮, 唯有繼續去住先啦~)

剪完頭髮, 嘆緊包包, 等緊爸B, 因為熊熊又要剪埋一份喎... 等到就來瞓著咁滯, 爸B先剪完... 本來以為瑤瑤豬差唔多瞓著啦~ 點知一推出街又醒晒, 於是去放電...

可能個日又熱又晒, 所以公園冇咩野人, 連小豬最鐘意既尿片swing 都唔駛排隊... 小豬好開心咁玩左陣就開始走人 (因為swing 個位真係好晒呀...) 走左陣, 我地都覺得勁熱, 要走人啦~ 好彩瑤瑤豬都肯乖乖走人可能佢自己都覺得勁熱...) 入返popcorn, 係板長食TEA...





諗住瑤瑤豬又食左包, 又放左電, 應該眼瞓啦掛...  點知都要玩多半個鐘

終於可以安安靜靜咁嘆埋剩下果幾件壽B啦~~~

中秋節

LEI個 係瑤瑤豬第二個中秋節呀, 仲記得上年小豬仲係只識得坐係度, 見到契爺就喊到咩野咁, 今年已經識行識走啦~

拎住隻燈籠好開心呀... (唉, 原來要買燈籠俾小豬都要排下隊, 由於9月頭出左去玩, 諗住返來先買小豬至愛既鴨鴨燈籠... 點知, 返到來, 爺爺買左2隻恐龍戰隊既燈籠, 仲要係起晒角果D硬膠燈籠, 太嫲嫲送左個公雞燈籠, 唔知邊個又買左個兔兔燈籠... 所以熊熊唔準我再買... 好啦, 睇在隻兔兔幾可愛既份上, 今年唔買燈籠啦~~~

可能當日熊貓早收工, 又或者知道有得出街玩, 當晚瑤瑤豬心情大好, 成日都四萬咁既口

哇哈哈, 睇下小豬幾有氣勢, 左手螢光波, 右手燈籠, 仲有...  XD, 貓貓既傑作幾靚BOR :P
都話要將小豬身上掛满晒螢光棒架啦~









去左99樓下既平台, 好多人呀... 望左2眼月光之後, 就搵左個地方坐低開餐 (係呀, 啱啱食完晚飯, 又再食過)



有得食, 小豬又點會執輸呀, 先一手拎左條香蕉, 之後見其他人食緊月餅, 又過去係咁"ar...m" 結果都起碼食左8分1個月餅(唔連蛋黃)

 

食完野, 就係平台放左陣電, 瑤瑤豬喪跑左一輪, 見到人地玩又走去湊熱鬧 (可惜人地唔理佢 :P)
10點幾就返去LU...

雖然只係比平時既瞓覺時間遲左小小, 但可能小豬玩得太開心, 半夜發惡夢呀, 起左身幾轉, 於是第二朝齊齊瞓到11點幾

就咁樣, 又一個中秋節啦~ 雖然冇得好似以前咁, 同成班朋友燒野食, 吹完水後再去bar, 不過咁樣既中秋都好開心呀... 哈哈, 應該話, 個人開始老lu, 追求既生活已經唔同左LU~