早到的下水禮....

早係復活節既時候, 貓貓就想俾瑤瑤行下水禮啦, 不過真係幾大風又有D凍喎, 於是一等就等左個幾月。
其實貓貓係唔識游水架, 見小豬好鐘意玩水, 所以就想俾佢早D落水, 早D習慣下腳唔到地既感覺, 大個唔好好似貓貓咁, 只係鐘意游乾水

第一次係五月中, 婆婆屋企樓下既泳池, 可能座向既問題, 下晝去, 冇太陽, 雖然個天都熱熱地, 但就唔算太熱, 所以玩左陣, 小豬就嘴唇有D紫紫地, 即刻抱上屋企沖返個熱水涼...

雖然只係玩左一陣水, 但係要拎好多野落去呀.... 而熊熊就好俾心機咁係咁吹...

第二, 三, 四次都去左樓下既泳池。上個星期超好天, 所以好多BB一齊行下水禮, 瑤瑤豬見到其他BB好開心呀... 腳踢踢咁玩左個幾鐘。而剛剛個星期日, 玩左陣就開始落雨啦, 所以就轉戰室內池。不過室內池細好多, 始終未咁好玩。下個星期去澳門, 可以係人造沙灘度玩啦, 希望到時好天D啦~

落左4次水, 玩得最開心既, 都係上星期果次, 不過其中有件插曲。話說熊熊吹漲左個青蛙仔後, 就將小豬放左上青蛙仔度, 然後好開心咁一推,將青蛙仔推左出去, 點知青蛙仔飄左冇幾遠就反艇喎, 而小豬就雙腳向上。熊熊當然係即刻抱起個囡啦 (貓貓當時呆左..)之後, 小豬要媽咪抱, 唔睬爸B喎, 可能飲左幾啖水掛, 所以有D想喊, 又喊唔出咁, 不過玩多一陣就唔記得LU.... 諗返轉頭真係幾危險喎, 不過又幾好笑~ 之後熊貓就小心好多啦~, 不過小豬自此鐘意左飲泳池水, 成日自動波咁張大個嘴係度飲水

其實每次去玩水, 瑤瑤豬都好開心, 不過玩左之後貓貓就要手抱小豬同佢洗頭沖涼 (仲要洗埋自己), 都好辛苦下, 好彩每次用毛巾將小豬裏實後, 小豬都會乖乖坐係度, 等貓貓可以抹乾自己, 換好衫 (上個星期, 冇抹自己, 就搞左小豬先, 結果咳左成個星期)


貓貓鐘意LEI張, 好似好型咁, 不過實情係, iphone 未影得切, 小豬個頭已經轉左去第二度lu...