溜冰初體驗

小豬細細個既時候, 爺爺就成日帶佢去睇人溜冰, 所以小豬成日都想試下, 而且, 覺得自己會好叻溜冰...佢話溜冰係著住條裙, 然後轉轉轉... XD

星期六, 由於天雨關係, 終於安排老公同小豬一齊去圓方溜冰 (不過, 其實老公都麻麻地識溜架, 而我當然係得個睇字啦 :P)

圓方既溜冰場好多人呀, 不過主要係親子為主, 收費為$1/1分鐘, 租企鵝同海獅係$100 同$150/2個鐘。我地一開始租左企鵝, 小豬著好鞋, 係陸地上行左幾步就差唔多識跑咁滯, 所以好有信心咁入左冰場啦... 點知行唔夠一圈, 老公就帶住小豬同企鵝出返來, 話要換成海獅 (海獅係有得坐架) 結果玩左成個鐘, 小豬基本上都係坐係海獅上, 由老公推住行~ 跟據老公既講法, 小豬雖然好想自己企係度行, 不過完全掌握唔到, 所以落地幾十秒就會放棄坐返上海獅度... 而由於老公麻麻地既技術, 又唔識教小豬... =.="

最後, 由於老公自己著溜冰鞋著得太鬆, 玩左一個鐘後, 竟然隻腳磨甩皮... 第二日又要跑全馬, 所以提早走人... 小豬既朋友仔都玩左2個鐘先走... 不過算啦, 第一次試玩下先啦...

整體來講, 小豬的溜冰初體驗就係咁樣好挫敗咁完成左, 問小豬下次仲玩唔玩, 佢話唔玩喎, 因為她企唔到, 要搵老師來教佢喎... (唔服輸既小豬, 最後總要加返句, 不過, 我識游水架... =.=") 睇來遲下要搵下D溜冰堂俾小豬玩下lu...

依家D小朋友真係好幸褔 (定唔幸褔lei? ) 溜冰呢D活動, 以前都係1X歲同frd 出去玩架, 仲要係玩roller, 依家成個場都係D幾歲既小朋友, 推住個企鵝玩緊, 7-8歲既已經可以自轉啦...