驚險刺激既聖誕擔泥之旅... 1

趁記得, 要快D記低...
話說唔怕C既兩公婆, 諗住帶2個囡去hea 住旅行, 但又唔想去D去過既地方, 於是揀左一輪, 揀左長灘島, 以棉花沙而聞名, 但對香港人來講唔算太熱門既旅遊點, 因為冇直機... 都係飛去馬尼拉, 再轉機, 可以轉去Kalibo, 再搭個幾鐘車再搭幾分鐘船, 或者轉去Caticlan, 再搭1X分鐘車再搭幾分鐘船... 慳家如我.. 揀左Kalibo...結果, 未出發, 馬尼拉去kalibo既航班時間已經delay 左幾次...

未出發先興奮既小豬

未出發就瞓左既咩咩

今次帶左油顏色既書俾小豬係飛機消磨時間, 小豬總算幾合作... 只係差唔多降落時, 小豬開始話耳仔痛 (搭咁多次飛機都未試過, 可能當時佢有D咳, 耳鼻喉相通掛... )抱住咩咩既我, 用左個好work 但又好白痴既方法, 就係俾左個奶嘴小豬, 佢又肯啜, 仲要勁開心 (咁大個人仲成個BB咁),最後啜啜下仲瞓左添...

就係咁, 第一程好順利...

轉機... 我買機票時, 轉機係等2個鐘左右 (當時覺得幾好呀)... 結果, check-in 時已變左等差唔多5個鐘 =.=" (由1點幾落機, 到6點再上機), 點知call borading 時, 己差唔多7點... 再點知, 上左機都係得個坐字, 一開始話排航道, 之後又話架機有D小問題, 最後要所有人落晒機 =.="""

由上機坐坐坐, 坐到瞓左覺啦... 落機繼續等又繼續瞓... 成個露宿者咁...

本來我好擔心咁delay 法, 會冇船去長灘島, 好彩打俾酒店confirm 都會有船, 個心都定D...

不過, 我覺得架飛機既乘客都幾有品, 咁搞法都係默默接受, 冇人鼓噪... 如果係強國人機真係折左架機都似(利申, 我係心中爆晒粗... 不過只係心中... XD)

最後, 夜晚9:45起飛, 10: 25左右就land 左啦...

再黑麻麻咁亡命飛車左一個鐘多D, 終於到左啦... 搭船既地方... :P

當時係12點幾掛... 

只能話好彩有搵酒店安排接送, 如果唔係真係企左係度...老公話只係拖住2個喼行去碼頭就會要左佢條命... 

半夜1點幾... 終於到酒店啦... 

我地由朝早8點幾出發, 經歷左17鐘... 終於到啦... (哭)

老公平時9成時間都想打鍋佢, 但有時都叫有D用, 好似今次咁, 一直保持愉快心情, 如果唔係我實發癲... XD

今次我地第一間酒店係ASYA Premier Suite, 全酒店得28間房, 每間房都係過千呎架... 

好正...

(又到想打鍋老公時間)

可惜... 冇相囉... 用左老公部電話影左間房.. 再然後, 老公係某次行山比賽時跌左張SD card

2個小朋友去到酒店房都醒左, 仲好興奮... 不斷係度玩玩玩...

結果, 我泵埋奶, 差唔多3點先有得瞓

 (朝早6點半就起左身啦... )

好彩之前有睇過blogger 寫, 去旅行時, 等待都係其中一環, 應該好好享受下... XD