熊貓家事

2013年4月11日星期四

澳門遊

話說, 復活節前1個星期左右, 貓貓係度諗復活節帶瑤瑤豬出去玩下啦, 費事4日都係屋企, 好似好悶咁。熊熊說去澳門喎, 話澳門復活節冇特別貴左喎...
好啦, 上網CHECK... 嗯... 都冇平到喎~~~ 不過講左(其實只係諗左)去澳門, 就會特突間好想去喎, 最後都係成團 (熊貓3小口加公公婆婆, 屈蛇係一間房

)
住SHERATON, 話係最新, 亦係最平既四五星酒店喎, 一晚1700多DD, 包2人早餐 (圍返4個人住, 平~

)

去到酒店,算係正正常常既酒店房啦, 唔係好大驚喜(當然冇威尼斯人咁大, 又冇grand hyatt 咁靚)不過瑤瑤豬就好開心咁周圍爬

本來諗住帶小豬去游下水, 玩下酒店既baby room... 不過...
第一日去到雖然冇落雨, 但酒店果邊幾大風, 熊熊不肯俾小豬去泳池 (但貓貓特登幫小豬買左新泳衣呀

)
SHERATON話酒店會有個BABYAREA俾BB玩, 貓貓搵左一輪, 發現未開同埋超細...

唯有係房試著泳衣, 再在係房既浴缸玩水...

差D想將個水泡都拎出來玩... 不過浴缸當然係唔夠大架啦~

玩完水, 食埋奶奶, 再眠一眠, 就出發去開餐啦~ 勁多人等的士呀, 所以就改搭GALAXY既SHUTTLE, 再轉車。等GALAXY既SHUTTLE又等一輪, 再轉舊城區既SHUTTLE,時又遇啱司機要食飯, 開左幾架車都只係放人落車, 冇再上車, 於是,決定行過去 (原來都好近) 去左熊熊每次一定會去既小飛象。到果時已經8點啦, 但Ops 好多人呀, 不過都係排下隊啦。係餐廳對面既公園仔餵左小豬食粥先 (d 粥係果朝煲定, 用保溫杯帶過來架, 象印既保溫杯真係好勁, 差唔多十個鐘後, D粥仲係幾熱下) 食完粥就有位啦~ 好野~ 餐飯幾好味(不過冇手影相

) 又唔貴, 5餸1個海鮮飯再加枝酒, 先7百。小豬仲食左D蛋黃和包包... 好開心... 食完飯就返酒店LU, 公公婆婆幫手睇住小豬, 熊貓就去左威尼斯人既賭場行左轉...然後就返房搵周公LU~

Day 2 齊齊去食早餐 (酒店包二人早餐, 不過唔知點解俾早餐劵時俾左6張, 即每日3張) SHERATON既自助早餐真係唔得呀, 野食好麻麻, 唔多款, 而且係開左間BALL ROOM俾住客食早餐, 真係好奇怪呀...
食完早餐, 好大雨呀, 但又冇理由係房架, 於是又出發去GALAXY。GALAXY商場既店舖平民化D, 唔係下下都國際大名牌, 當然貓貓都冇入去行。諗住行下睇下食咩野午餐, Ops又係超多人。最後諗住係群芳食自助LUNCH, 要等。好啦, 一等就等左個幾鐘, 好彩既係餐廳出面有個好大既AREA俾人坐住等, 唔好彩既係等左差唔多2點都未有位, 但個BUFFET係到3點咋... 所以最後都係放棄 (自我安慰, 當係有個地方坐下啦~

最後去左FOOD COURT食野, 不過係FOOD COURT食野要買卡 (排一輪) 然後再去點野食(再排一輪)

算啦~ 求其食完個LUNCH, 小豬係商場影左陣相, 就返酒店lu

返到酒店, 公公婆婆去左賭場玩, 熊熊去搞回程既船飛, 而貓貓就陪食奶同陪瞓

小豬瞓左差唔多3個鐘呀, 最好由於晚飯既book 枱時間到啦~ 所以啦啦聲同小豬沖涼出門口。今次去左威尼斯人入面既一間葡國餐, 點解會食果間, 因為其他餐廳都FULL左, BOOK唔到位, 熊貓又唔想好似晏晝咁呆等, 所以好一餐唔好又一餐啦~ 而小豬... 佢已經唔肯食BABY FOOD啦~勉強食左3分1之後, 就唔食LU, 唯有食包同食蛋啦~ (其實係朝早既BUFFET度, 拎左D粥架, 可惜BUFFET冇白粥, 有味粥又勁味精, 唔敢俾小豬食太多)

食完飯, 公公婆婆又去玩陣, 熊熊排左好耐隊既POKER又排到啦喎, 所以留低貓貓單打獨鬥, 不過都係小菜一碟啦~

公公婆婆返來, 貓貓就去左賭場交電費

老虎機真係玩幾多次都係輸呀, 不過都幾開心呀~

熊熊既POKER枱小勝, 所以叫左ROOM SERVICE 做宵夜

Day 3 熊貓放棄左早餐, 只係公公婆婆自己落去食 (佢地拎左D有味粥俾小豬, 不過都係食左小小) check-out 左之後就去食水蟹粥啦~ 又係好多人, 排左陣隊就有得食。要左水蟹粥, 墨魚波雙拼, 西蘭花炒花枝片, 同伊面, 出名既餸好味, 唔出名既唔好味, 講完~ 不過小豬就好開心咁第一次食清水伊面(將炒好既伊面放係滾水中波一輪, 就食得啦~)本來想加多個田雞粥, 但係等左好耐都未得, 放棄。貓貓買左D甜品就返酒店LU~ 係酒店商場既FOOD COURT, 小豬又食奶奶, 然後就回程啦~

回程既小插曲係.... 熊熊睇錯上船既碼頭, 去到新口岸準備上船, 先發覺原來係氹仔碼頭上船喎

, 好彩預鬆左時間...

不過熊熊就俾貓貓笑左好耐呀~

就咁樣3日2夜澳門之行就完成啦~ 婆婆話有D悶喎, 不過帶住BB出門係咁上下架啦~

2013年4月5日星期五

受傷週...

剛剛過左既復活節, 熊貓一家去左澳門hea呀, 遊記後補...

復活節後, 瑤瑤豬就不斷驚嚇受傷呀... (嚇死貓貓

)

大件事D既係, 小豬有一朝係床上碌左落來。事源, 果朝幫小豬換好片換埋衫, 佢都仲覺豬豬緊喎, 於是熊貓就繼續準備出門口, 留小豬係大床瞓多陣。貓貓係隔離房帶緊耳環時, 聽到細細聲"boom"一野, 果下貓貓仲以為係熊熊搵野時發出架(當時隻熊搵緊KEY), 然後就聽到小豬哭(本來以為係小豬瞓醒見唔到人, 所以喊...) 點知入到去, 見到小豬已經坐左係地上

哇, 嚇死貓貓, 即刻抱起喊緊既小豬, 摸下頭仔有冇事。而小豬既喊法係普通喊, 食左粒星星餅後, 就收聲LU~
送左瑤瑤豬去99度, 再關照要小心留意小豬有冇呆, 有冇嘔等, 好彩過左3日都仲係精靈活潑, 食得玩得瞓得, 應該冇事掛...

熊貓估計, 小豬唔知點樣地, 用左PAT PAT落地, 只係一般痛, 冇衰喊, 所以整到頭既機會唔高掛... (熊貓張大床差唔多成米高, 頭落地既話, 真係...

)
今次真係超級大意左, 諗起都覺得好內疚....

之後幾日, 瑤瑤豬繼續四圍搞事, 然後繼續受傷...
琴日, 小豬照舊爬入書房玩, 將書架上既野整晒落地。貓貓去到書房時, 見到小豬真想將於落FLASH卡既盒整落地(個盒起碼有2舊磚架埋咁重) 貓貓仲未出得切手, 小豬已經好成功咁將個盒整左出來。ops... 貓貓見住個盒趺左落小豬既腳上...

小豬當然係狂喊啦~~~ (比碌落床果野緊好多..)貓貓抱住小豬, ho左陣, 出動左4粒星星餅, 先搞定, check 下隻腳仔, 紫左一條, 其他都冇野, 又企得又行得, 應該冇野掛, 熊熊話如果今日都未變豬腳就應該冇傷到筋骨掛...

琴晚約左朋友上來探小豬, 結果, 狂喊 (可能腳痛掛...) 真係失禮晒...

小朋友經過跌跌撞撞, 先會成長架, 貓貓知道, 希望小豬痛完之後, 會小心D啦~
最好唔好跌得咁甘啦~~~

2013年3月27日星期三

11個月... 零10日

又遲lu...

11個月零10日
體重:21磅 (係呀, 比10個月時重左D咁多多咋, 病左一個星期, 輕左磅半有多...

)
身高: 74CM掛 (貓貓依然覺得瑤瑤豬唔係好識高, 秋天時著既褲, 依家都係著得到)

身型方面, 真係冇咩野變化, 最誇張既係, 果時係Marks & Spencer買既背心乖爬爬(3-6mth) 著到依家都仲著得到

, LEI 5件背心真係抵到LEI.. 不過貓貓寧願瑤瑤長高D長肥D呀。牙仔方面, 係10個半月時出左第三隻牙仔啦, 不過唔係上門牙, 而係上門牙右側既果隻 (唔係要出上門牙先架咩?

)琴晚幫佢清潔時, 發現上門牙都有眉目啦, 不過隻小豬點都唔肯俾貓貓摸真D

(今晚再試過~)

食野方面, 都係2粥3奶, 貓貓仲堅持緊最後一個月的人奶, 依家D奶都係少左好多呀, 好彩之前有冰奶, 所以雖然依家係入不敷支, 但都叫係全人奶。每餐既奶大概7-8安, 比以前少左1安左右。不過貓貓都冇以前咁執著, 一定要小豬飲晒LU。瞓覺前既果餐最難餵, 食左一半後, 就要食幾食, 就玩幾玩,成餐奶又去返半個鐘左右LU~ 食粥方面, 大人碗半碗至一碗左右, 11月開始試左蛋白, 今日仲試埋全蛋, so far 都OK

除左食粥, 係食晚飯既時候, 瑤瑤豬都會坐上枱陪大人一齊食, 而大人既飯就係佢既零食, 食得好開心, 可以吃一茶匙左右。琴日開始, 99俾左D冇調味既大人湯水佢試, 嗯... 都可以, 但係都係鐘意飲水多D。生果方面, 冇試新野呀, 都係以火龍果為主(因為poo poo依然唔多好), 再試香蕉, 今次冇事啦, 所以得閒都係食下香蕉。瑤瑤豬為食左好多, 試過自己met左粒提子, 放落口, 仲咬開左呀 (貓貓當時正坐係隔離, 幫提子去皮去核, 以便可以服侍小豬食,. 點知佢覺得貓貓唔夠快手, 要自己來...

)

語言方面,冇新野呀, 都係baba, mama, 疑似bye bye, 奶奶, mum mum 同水蛇春咁長既BB話。不過明顯地瑤瑤豬讓多左野, 成日都bilebala咁大聲講野

動作方面, 仲未可以完全自己企, 但係離手既次數多左又長左, 相信好快就可以自己企啦~ 前幾個星期, 團購左個吸塵機器人, 小豬第一次見它係度自己吸塵時, 嚇親, 勁喊同埋爬到飛咁快咁來貓貓度要抱抱 (貓貓好衰咁, 冇第一時間出手相救, 反而拎住電話拍片

) 自此之後, 小豬爬既速度就保持係飛咁快 (同貓貓行路既速度差唔多啦~) 最鐘意望住小豬, 一路飛爬, 一路四萬咁既口爬來貓貓腳邊要抱抱, SO SWEET~