第一次生日飯...

瑤瑤豬既第一個生日, 媽咪冇搞到任何生日會呀, 因為熊貓都覺得小豬咁細個, 其實唔知發生咩野事, 搞生日會又會打亂小豬既作息時間, 而最重要既係... 懶
所以小豬既第一個生日, 就係屋企附近食左餐飯。

揀左紫粵軒, 其實都冇特別原因, 只係想食好D。酒店入面既中菜廳, SERVICE真係唔錯, 小豬又有自己既餐具, 又有一張坐得舒服又fit size既BB櫈, 所以成晚小豬都好合作, 自己坐係度, 望住我地食佢既生日飯~

食左D咩野? 嗯... 瑤瑤豬出世後, 貓貓已經冇再影食物相LU, 有時間都食多2啖啦~ 記得有個醬烤骨相當唔錯, 仲試左龍蝦湯泡飯, 都幾得意 啦~ 不過小豬就好開心啦~ 因為係生日, 所以好多餸都可以試左1-2啖, 仲有得食雞脾添 (本來只係諗住做下樣, 點知小豬真係咬左落去, 食得到之餘, 仲咬左好多啖呀~) 見係生日, 就由得你啦~~~

生日蛋糕都係酒店訂架, 因為自帶蛋糕要HK$200.00既切餅費呀, 但係酒店訂都係HK$200.00一個, 咁當然係酒店訂埋啦, 唔記得叫咩野名啦, 係一個雜莓MOUSSE蛋糕~ 估唔到個蛋糕真係好好食呀~~~小豬都好欣賞咁食左好多,貓貓就更欣賞咁食左更加多~ 真係相當唔錯~

至於生日禮物, 當然係一歲針啦~ 仲要係生日當日打針, 不過貓貓已經好好咁幫小豬減左枝MMR針, 改為遲D打四痘針。
四大長老加太婆既利是, 同埋爸B媽咪既三輪單車仔... 我諗小豬都係鐘意掛(小豬超鐘意利是... 封, 一見到就會即刻拎住不放手~ 叻女..., 只係要利是封好啦, 入面既$$記得俾晒媽咪啦~)
三輪單車仔要五月尾先到貨呀, 快D就好啦~~~~