榮休

媽媽奶終於榮休啦~ 所以一定要寫返篇BLOG紀念下先~

貓貓LEI個奶媽一向都唔算太辛苦, 初時好彩地遇到個好陪月, 係頭果幾日上奶既時候, 教&幫貓貓按摩, 然後又識得煲D湯水俾貓貓通乳線同上奶, 所以貓貓LEI個奶媽, 幸運地冇試過塞奶, 乳線炎等痛楚, 都算當得順順利利, 唯一既痛就係瑤瑤豬頭幾日出力咁啜個未係好有奶既奶媽, 攪到2邊都損左, 但又冇時間俾佢地復完喎, 於是又啜又損又再痛過 (果下真係幾痛下架)所以貓貓好快就開始轉為半泵半埋身, 好彩小豬又肯埋身又肯食奶樽, 令到貓貓可以繼續做奶媽。

剛剛出世既瑤瑤豬一日大概食8餐, 每次係埋身15分鐘再補奶樽, 而貓貓就將其他既泵出來, 留做下一餐。一早一晚果2餐都係全奶樽 (都係全泵奶), 朝早泵係因為陪月話一早既奶水最充足, 泵多D有多D成功感 夜晚就希望小豬可以食飽D, 唔好半夜嘈醒熊貓 (當然, 係LEI方面, 瑤瑤豬絕對係隻乖豬, 除左頭個月半夜係貓貓叫醒佢食奶奶外, 滿左月之後就冇再起身食夜奶LU, 連夜奶都唔駛戒 自動波咁由12點前食完最後一餐奶, 就瞓到朝早6,7點啦, 真係超鍚媽咪)

返左工之後, 就變為一日泵4次, 而埋身就變為朝早起身既親子活動LU, 每朝埋身10分鐘, 再補奶樽。之後一日五餐, 小豬最高峰時, 每餐8安, 即係每日飲1 lit幾奶, 好彩D奶都算跟得上。由於瑤瑤豬自小就有飲下冰奶, 所以都唔算太有追奶既壓力。到瑤瑤豬6個月, 開始食固體食物時, 貓貓就改為泵3次, 過左農曆年後就變為2次, 係瑤瑤豬11個月大既時候就只泵朝早一次, 小豬一歲時就唔再泵奶, 只係朝早埋身20分鐘。過渡左10日後, 終於可以榮休啦~

貓貓覺得自己好叻, 堅持左一年, 超額左成倍時間完成左LEI個任務。然後, 都要多謝熊熊既支持同唔反對 (頭果6個月, 熊熊係支持架, 不過, 每日要泵4次奶真係好唔方便架, 要限時限刻返屋企OR搵地方泵奶真係好麻煩。餵夠左6個月, 點知貓貓話要加碼喎~ 熊熊唯有黑住面咁唔反對啦, 不過, 對外, 佢依然係表示支持既, 所以都係抵錫) 媽媽同99既湯水都好重要, 貓貓自從生左之後就變成湯水怪lu, 每餐通常都係3碗。貓貓覺得餵母乳雖然睇落係媽媽做既事, 但起實都係全屋企一齊做既事, 屋企人既支持或者唔反對, 唔會講埋D唔等駛既野, 又或者偶然一,兩次係其他人面前既讚賞, 都係好重要架。
最重要既都係瑤瑤豬既識貨, 又肯埋身又肯食奶樽仲要肯食冰奶 (冰奶真係好難食...但小豬都好乖咁飲左500包既冰奶, 真係乖豬)出左牙仔之後, 都好少咬媽咪, 等媽咪可以一路親子, 一路安心釣魚 小豬既身體都算係OK (touchwood), 成年中只係病過2次 (再touchwood), 都係俾人傳染架, 雖然唔係小肥豬, 不過媽咪都收貨啦~

雖然交接既過程唔太順利, 小豬唔肯食奶粉, 不過都進步緊, 所以媽媽奶決定榮休啦~雖然有D唔捨得, 雖然其實仲可以餵多幾個朝早, 但費事小豬又記返起美味既媽媽奶, 再擺食奶粉啦~

冇左媽媽奶既保護, 小豬你要繼續健健康康, 食多D野呀~