15個月

話咁快就已經15個月啦~

身高唔知 不過好似高左唔少, 體重, 好似都係23磅 (再一次證明, BB係唔讚得架)係出世到依家, 第一次沒體重方面既增長... 不過進步既地方係, 瑤瑤豬可以自己企係個磅度磅重啦... 係14個月既最後一日, 小豬既第七隻牙仔蒲頭啦~

食野方面, 每日2-3餐奶, 4-6安左右, 2碗厚粥. 軟飯, 另外, 有湯, 生果, 面包, 餅乾, 基本上個口都係唔停既, 見到大人食緊野, 就係沖返來, "ar..m, ar.. m"咁狂講, 直到你俾d佢食。第一啖總會擺個好難食既樣, 然後, 就會再問你拎來食...  暫時都鐘意食野, 咩野都肯食... POO POO 方面都幾正常, 一日通常都有一次, 間唔中有一日冇, 但第二日就會有2次。POO POO 越來越似大人果d啦, 仲好好好臭... 雖然99話要幫瑤瑤豬戒片, 不過睇來佢都係唔識戒架啦 (雖然貓貓都唔識) 所以戒片係0進度, 不過lei d野又 急唔來...

瞓覺方面, 同之前差唔多, 通常11點前會瞓, 瞓到第二朝7點幾就會開始典, 7:45飲完第一枝奶後, 有時就會再瞓過, 有時就已經好精神咁搞兩老啦... 日頭瞓1-2次, 每次2個鐘左右

動作方面, 心情好既時候會同人HELLO, BYE  BYE , 飛吻 (同一時間做齊咁多樣), lei輪會不停咁同人BYE BYE 。最鐘意就係將d cd dvd拆件 (拎隻碟出來, 將cd既封面拎埋出來, 有時仲會拆埋個盒)屋企always都係亂到飛起...lei輪仲係扲住隻cd, 走去電視前, 係咁隊部dvd機, 應該係想播碟睇掛... 試過拎住貓貓既手袋, 然後, 同晒所有人講BYE BYE , 然後自己就走左去門口啦, 笑死貓貓... 行路就行得穩左又快左, 但係出街唔肯俾人拖手, 試過幾次係街度"Lur"地, 非常之唔要得,不過仲係互相摸索階段, 希望遲D會好D啦 ~

講野方面, 仲係只識BB話, 連爸爸媽媽都未識叫bor... 99既14個月理論 (過左14 個月就會突然識講野架啦...) 已經變成15個月理論啦 雖然只係識講BB話, 不過瑤瑤豬絕對係個唔怕醜, 好鐘意講既小豬, 佢會自己走去看更果度, 對住個看更係咁講野 (不過講野好大聲, 人地以為係罵他呢...)

後面既頭髮長左好多, 終於可以紥辮啦~~~


希望小豬可以繼續健健康康, ,開開心心啦 ~ 媽媽鍚鍚..