懶洋洋沙巴遊... part 3

第三日, 要搬酒店啦~

依舊9點幾起身去食早餐, 今次去另一個餐廳食, D野其實都係差唔多...

唯一唔同既係, 佢有個kid corner, d 野食可能啱小朋友多D掛, 不過瑤瑤豬係唔多欣賞架, 繼續係玩多過食 =.=" 又係粥粉面飯樣樣食小小 (今次去旅行, 小豬最唔好就係食既方面)

小豬見我地影相成日都V, 所以佢又V... ops, 未識伸2隻手指出來, 伸住一隻先啦~ XD... 

lei 張好似打功夫...

食完早餐, 我就返房執野先, 熊熊帶住小豬去放電... (由於時間有限, 所以冇得再去泳池玩lu...)

check out 左之後, 熊貓就去左香宮食lunch (lei 餐係酒店送架) , 所以又食XD

香宮係食中式點心架 (不過冇影到野食相...) 野食都幾好味, 不過服務就幾亂下, 搞到一大輪先知我地應該係食咩野餐 (因為酒店送既係set lunch 來架), 然後, 個waiter會冇啦啦黑面啦, 唔理我地啦~ 熊熊臨走前唔小心掃到鼓油樽, 個waiter個樣好似就來打人咁...  well, 做為五星酒店既中菜廳, D 服務仲差過街邊大排檔, 真係唔得...

不過, 瑤瑤豬就一於少理, 繼續食佢既星星餅, 食食下對腳仲放埋上枱... 真係失禮晒... =.="

食完lunch, 就搭的士去碼頭啦~ (熊熊擺左烏龍... 其實特優係包送埋我地去碼頭架, 叫我地2點係lobby 等, 點知熊熊以為我地自己要2點去到碼頭, 所以餐飯食得勁趕。 去到碼頭, 特優既staff 打來問我地係邊, 佢地係lobby 等緊我地喎... =.=")

之後果2晚, 我地住Gayana Eco Resort, 係個島上架, 所以熊貓充满期待...

要搭船去個島... 果程船勁啦~ 我地坐左架類似大飛咁既野, 全程好似坐咁香蕉船咁... 我一手要攬住小豬, 一手要搵地方捉實, 真係有D驚。坐係對面既個香港女仔, 全程都係度驚叫咁滯... 反觀小豬, 佢又好似冇咩野, 只係著住救生衣唔多舒服, 所以一臉不爽...

來到酒店, 嗯... 有DD失望, 間酒店唔係baby friendly, 我諗小豬應該係當日該酒店最細既住客... 酒店所以既通道基本都建係海上, D圍欄就幾疏下, 小豬跑緊既時候, 係要望到實一實架...

酒店房唔算太靚, 不過主要係冇浴缸 (不過之後諗下, 人地叫Eco Resort 呀, 冇浴缸都正常呀...) 熊貓訂既 mangrove villa, 係可以打開露台門, 就可以行落個海啦, 可惜我地間房最靠岸既, 對正酒店既雜物房, 雖然有想過轉房, 不過同一房種已經full 晒, 如果upgrade 另一款房, 係對山既, 而且個露台得幾條線圍住, 對於帶住小豬既熊貓來講, 有D危險, 所以最後都係住返原本果間房

至於個海... 嗯... 可能唔應該同馬爾代夫既海相提並論, lei 度既海真係幾多垃圾, 能見度都幾低... 所以有D失望...  不過小豬依然係好開心既爬上爬落架...

Settle 好左之後, 趁仲有太陽, 就落海玩下先~ 熊熊話佢自己係海豚, 而小豬就係訓練師.... 哈哈, 都有D似喎... XD

LEI晚食左room service, 其實D野食同去酒店既餐廳食係一樣架, 係露台食都幾正呀... 值得推介既係右下角果碗白色野, 馬拉菜, 唔記得叫咩野, 係類似涼拌海魚肉, D魚肉好滑, 酸酸辣辣咁. 好好味。

瑤瑤豬一開始有參與食蝦片同薯條既活動, 都食左半條炸魚柳既, 之後就扭計要我抱, 下一分鐘就已經瞓著啦 (係呀, 果日又冇瞓晏覺呀) 當時7點幾, 佢一直瞓到10點就醒左, 開左枝奶俾佢, 飲飲下又再瞓過, 然後就一直瞓到第二朝啦~ yeah~~~

懶洋洋沙巴遊... part 2

酒店房都幾好瞓, 齊齊一覺瞓天光 (不過瑤瑤豬既睡相真係嚇死人... 瞓左個H型出來... =.=")
九點幾起身食早餐...

由於係peak season, 所以酒店開多左間中菜廳食早餐... 基本上來講都係普通啦, 冇咩野驚喜。瑤瑤豬果期開始要自己食飯, 同埋唔多肯食飯, 所以拎左粥粉面飯俾佢, 都係樣樣食小小, 玩既成分多D (同大半年前去澳門, 小豬狂食自助餐既情景差好遠...)

食完早餐諗住返房換衫先去泳池, 點知小豬好似認得去泳池既路, 自己走左去泳池果條路, 熊貓特登走埋一二邊, 等佢見唔到我地, 小豬都只係回頭見唔到人就停左係度, 又唔喊又唔行返轉頭。結果, 同小豬講左1X次換左衫即刻去玩水, 先夾硬將佢捉返房... 佢自己一換完衫就即刻拎埋對鞋俾你幫佢著... 然後就拖住爸B去泳池lu... =.="

lei 個係第一日既泳池相, 小豬玩得好開心, 不過沙巴既天氣, 係冇左太陽就會開始涼涼地, 玩左1個鐘, 未到5點, 小豬既嘴唇就開始紫紫地, 所以就啦啦聲抱佢返房沖涼lu...

第二日, 基本上就係泳池邊渡過, 小豬見到人地有玩沙既玩具, 就走埋去玩埋一份, 玩到人地走左都仲要拎住D玩具, 最後要大喊一場先可以俾返D玩具俾人... =.=" 

上次去澳門既經驗, 玩到中午, 就抱小豬上水,俾佢係池邊瞓個晏覺... 以為今次都係咁, 就真係太傻太天真啦~ 幫她換埋衫, 陪埋佢係沙灘椅度瞓, 小豬仲係不斷自己爬落去, 左搞右搞同埋行去泳池邊, 於是者1個鐘之後, 熊貓就放棄啦, 由得小豬唔瞓晏覺啦~

小豬玩左好耐淺水區, 熊熊話要帶佢去深水區喎.... LEI張相係未落水之前影架~

Lei 張幾好, 似模似樣喎... 可惜影完LEI張, 小豬就開始驚驚lu...  喊左輪之後, 就帶佢返淺水區, 由得小豬自己係淺水區行來行去啦~ (原來睇落大膽既瑤瑤豬真係勁細膽呀~ XD)

唯一可以令小豬自動離動泳池既就係LEI杯雪糕啦~ 

LEI間酒店有整個沙巴最靚既日落, 熊貓當然要睇下啦~ 嗯... 同馬爾代夫既比, 其實都差幾遠, 不過大家都慕名而來, 好熱鬧啦~ 而小豬係日落前都仲好起勁咁行來行去, 爬上爬落,係太陽落山前既果刻, 佢就趴左係我度瞓著左lu (當時仲著住泳衣...)

返到房換好衫 (除著泳衣都可以唔醒架), 熊貓就又出發去食野啦~

繼續係亞洲城食海鮮... 今次試華興 (拎住特優既卡片有九五折)

食海鮮前叫左沙嗲... 好似馬幣$8.00/ 10串, 超好味

沙巴必試既桔仔冰, 好清涼, 消暑一流

奶油虎蝦, 今次食$70/隻 (不過都唔係最大隻, 華興既最大隻係$80), 超好味, 虎蝦彈牙, 奶油汁又好好味, 好食過雙天既奶油好多下...  熊熊食完返要留返個奶油汁點其他海鮮

白灼虎蝦仔, $36.00/份, 好得, 又係好彈牙好鮮甜, 香港應該又係買唔返...

灼鰤魽, $30.00 / 份, 鮮甜, 不過其他地方應該食得到既

灼XX螺, $30.00/份, 都唔錯

炒沙巴樹仔菜, $35.00 / 份, 好味, 份量好夠, 好满足

白胡椒炒蟹, $60.00 , 超好味, 雖然D蟹唔算平, 不過白胡椒既做法真係好正呀...

當我飽到上心口既時候, 熊熊說要試埋燒雞翼喎.... 仲要2隻起, 結果我幫手食左半隻, 熊熊食左1隻半, 我由於太飽, 所以對雞翼既味道已經冇咩野印象lu...

仲有, 必食既椰子布甸, 原本以為D椰子布甸應該係同一個supplier, 味道應該係一樣, 點知LEI個布甸清甜好多呀, 結果我用左自己個甜品胃, KO左大半個...

整體來講, 華興D野好味D, 可能濃味小小比較啱熊貓胃口掛, 不過華興就貴小小, 但D人又大檬小小, 買單只係馬幣280.00咋 (諗返轉頭, 應該係計少左個蟹... ) LEI餐真係超满足呀...

食完飯, 瑤瑤豬就瞓醒啦~ (即係又冇食晚飯), 佢坐係BB車上食左個之前帶既面包仔咋...  熊貓出發去搵橋底下既榴槤飄香... 原來當時已經過左食榴槤既季節啦~ 所以搵到既時候, 雖然有幾檔仔, 但就冇咩野人買來食。 熊貓搵左間最多人既檔仔, 叫左個唔知咩野名既榴槤, 細細個要$35馬幣呀... 不過都好味...人地話馬拉既榴槤有小小甘甘地既味道... 係真架... 至於瑤瑤豬大小姐, 就連榴槤都唔肯食... 算... 慳返...  返到酒店隊左9安奶就算lu..

咁就第二日啦, 第三日要搬酒店啦~.

懶洋洋沙巴遊... part 1

終於開始寫遊記... 真係有排追... XD

1月25日正式開始遊沙巴啦~ 神咁早, 6299就車我地去機場啦~ 瑤瑤豬應該知道有得玩, 一起身就好醒神, 落左車同爺爺嫲嫲叔叔講左bye bye , 就頭都唔回咁入左機場lu...

入到機場, 換返D薄身小小的衫, 就入閘啦~  小豬都算聽話, 全程都肯坐BB車, 唔扭抱... 入左閘後, 我地去左lounge度坐左陣, 食個早餐, 拎返2枝水 (因為airasia 冇水提供), 小豬都趁機落下地, 爬高爬低撞到頭...:P

好鐘意Lei 張相, 好似俾人捉到小豬偷食咁, 小豬又交足戲喎... XD

機上果3個鐘都真係幾辛苦, 由於架機好爆, 小豬真係要坐係我大脾, D位又幾窄... 小豬全程爬上爬落, 自帶左藍莓, 再加ipad, iphone 都係頂得果一陣... 然後我同熊熊就輪住帶小豬出去行街街, 中途熊熊帶左小豬出去玩左陣 (大概3-4個字)。

本來叫左飛機餐 (自費, 訂機票時訂埋架, 因為熊熊唔知小豬當時想食咩野, 所以每程叫左3個餐...) 不過情況好混亂, 所以飛機餐都冇影相。 我覺得都唔難食, 其中有個面仲幾好味添, 可惜小豬一點都唔欣賞 (可能係馬拉既飛機餐, 個個都有小小辣), 總之就勁混亂啦~ 總結係, 小B上機都係唔好食飯面之類, 食包應該會好好多...

搞完一輪之後, 熊熊話, 都係唔好貪2歲以下既B唔駛機票LEI樣野, 下次出去都係買個位俾小豬自己坐

終於,過左2個半鐘後, 瑤瑤豬冇晒電啦... 降落時瞓著左... 本來以為一天都光晒, 只要放佢落BB車就搞定, 原來airasia既BB車係跟行李一齊出架, 既係要抱住小豬落機, 要入左境 去左拎行李時先有BB車呀... 再加上入境D counter 動作超~快, 輪流抱都手斷...

扲好行李, 出發... 今次係經特優旅遊BOOK酒店, 所以有人來接機, 同埋送我地去酒店... 咁樣都幾好, 除左慳返的士錢, 仲有人帶我地去唱錢, 買電話卡, 唔駛四圍搵

頭2晚住Shangri-la's Tanjung Aru Resort, 距離機場好近, 好快就到。

Lobby 好靚呀, 不過熊熊去左check-in , 我要睇住隻馬騮瑤, 冇影相咁滯...  (上次放B時覺得好好用既帶, 俾隻馬騮瑤發現左, 唔俾我拖住佢, 係都要自己拎返條帶, 所以我真係追到佢氣咳)

上到房, 好靚又好大, 瑤瑤豬見到酒店房超超超開心, 不斷咁跑來跑去... 

沙巴既天氣好好, 好好陽光, 但又唔係好似香港咁濕熱, 熊熊大愛。

settle左之後, 就換左夏天衫去個club lounge 度食小小野 (因為我地想要既日子冇房, 所以upgrade左房, 送埋個lounge 可以任食, 去左個lounge幾次, 發覺D 野食都OK, 係可以唔駛俾錢食飽飽架。當然, 熊貓係要留肚食海鮮架)

之後去左游水,不過D 相係另一部相機度, 所以skip 左LEI part先。遊完水, 返房沖涼, 再去lounge 度飲返杯 (下晝4-8 係紅白酒任飲啦, 正~)然後出發去亞洲城食海鮮...

第一日去左食相當出名既雙天...

D虎蝦好大隻呀, 雖然唔係好平,由30馬幣至70馬幣一隻, 不過講真LEI個價錢係香港都食唔返LEI 個size既虎蝦, 熊貓試左2隻40, 2隻50既 (因為我刨blog時, 見其他人話最大隻果D, D肉唔滑), $40/隻既用鼓油皇煎, $50/隻既用當地出名既奶油, 結果2款都好味, 不過熊貓覺得反而係鼓油皇既做法出色D, 奶油有DD偏甜。另外, 仲叫左魔鬼魚 (好大份, 先$25馬幣), 螺 (好鮮甜, 好似$20), 沙巴樹仔菜 (我大愛, 不過雙天既份量好少, 有D唔夠喉), 見D蟹做緊特價 (好似$30, 5隻), 又試下... 覺得唔應該貪特價, D蟹好少肉, 不過白胡椒既煮法就超好味....  最後當然係椰子布丁, 雙天既OK, 不過係SSP有間做椰皇布丁既舖都好出色, 所以又唔算好驚艷

食左咁耐, 都冇提到瑤瑤豬LEI... 因為有隻小豬係的士上又跳又爬, 玩左好耐, 然後突然企定定, 發力... 原來poo poo 左... 再然後唔知係咪用左好多力, poo poo 完就企左係度瞓著左...XXXXD

落左的士後, 幫小豬善後, 佢都唔知醒喎, 一路瞓左我地食完走人... 本來諗住食完飯周圍行下, 點知小豬瞓醒, 扭抱不肯坐車, 熊熊抱左陣就頂唔順, 打的返酒店lu... 返到酒店, 叫左room service 雞湯米粉俾小豬, 點知佢又唔多肯食, 仲叫左個超好味既mushroom soup... 冇相, 因為瑤瑤豬冇瞓, 要睇住馬騮瑤lor...

第一天... 完

出遊

原本諗住最後一個星期, 可以冇咁忙, 真係太天真啦~
希望有人可以追返聖誕同新年的blog 啦 (應該都好難... XD)
不過終於都可以收爐啦~~~  而聽日就係期待已久既熊貓家旅行lu~~~

希望一切順利, 可以食多D海鮮啦~ ~~~

21個月

lei 輪好忙, 趕住收爐...所以2014年既第一篇BLOG竟然係17號喎... =.=" 希望下個星期有時間可以出多幾篇, 追返之前新年聖誕既blog...

21個月大既瑤瑤豬, 未稱豬仔呀... 感覺上重左DD, 但就好似冇高過 (明明出世時係長腿妹妹, 點解大大下好似唔多高既... )

食野方面同之前差唔多, 不過LEI輪唔鐘意食飯, 只鐘意食菜飲湯, 粉面都可以, 只係唔鐘意食飯 (似我~ :P) 不過小朋友都係應該食多D飯, 先會快高長大架MA...
瞓覺方面, 差左... 其實又唔算差左, 只係再夜D瞓, 又晏D起身(唔知係咪因為夜左瞓, 錯過左長高既黃金時段, 所以依家係矮豬...) 又晏D nap , 結果係一個惡性循環... 每日瞓之前都要爬高爬低, 爬上我個身度跳跳跳, 又要roll the boat roll 好幾次, 先肯瞓, 所以好多時索性熄燈齊齊瞓 (哈哈, 所以我係瞓多左架~~~)
動作方面, 又靈活左, 琴日見佢可以自己打觔斗啦... 十分鐘意跳舞, 一聽到音樂就會放低晒所有野, 起身跳舞 (不過舞姿依然十分之醜樣...) 不過小豬好enjoy就由得佢啦~
講野方面, 都進步左D既, 雖然依然好多BB話, 不過有時都係主動講D名詞出來, 都算係咁啦~ Lei 輪小豬好鐘意自己數數字同字母, 雖然有時數數下就亂晒籠, 但都算係有進步啦... 仲有就係佢開始唱歌啦~唱得最多係"roll the boat" 既第一句, 同Happy birthday 既 "you" (可能其他小豬都有成日唱, 不過我聽唔明... XD)

面試方面 (遲D寫多篇先), 2013年既最後3個月共in 左8間學校, 有5個offer 同3封rejected letter, 對於大部份時間仲係一舊飯既小豬來講, 成績相當满意。, 依家仲係happy schoole 同 學業為重既教學理念中掙扎。 來緊應該仲有4間會in, 抱住去玩既心情, 希望小豬會enjoy 啦~

lei 個小朋友, 你留返2粒飯做宵夜呀?

超愛lei 個backpack, 可以咁樣放B法真係爽~ XD

難得可以影張正經唔濛既相~

大部份時間影到既都係瞓覺樣 

(lei 個小朋友, 朝早幫佢換片換衫, 抹面, 擦埋面霜都係仲可以繼續瞓, 真係勁啦~

下年LEI個時候, 就要返學啦, 到時就冇得咁瞓法啦~)

不過, 戀女既媽媽覺得LEI個覺豬樣真係好可愛呀... XD

唔... 都幾襯呀....XD