熊貓家事: 第一個二字頭... 二十個月...

又一個月... 時間真係過得快啦~

25.5磅 / 84 CM高 (大約)

食飯方面大致都係咁, 早晚飲奶 (每餐5安左右), 依然係奶樽飲(其實係我懶, 冇幫瑤瑤豬戒奶樽, 不過見佢用杯OR水樽可以飲水呀, 湯呀, 藥水呀, 只係飲奶係要奶樽, 都由佢啦~ 不過主要都係我懶) 一日2餐飯仔, 食量好飄下, 可能有D食厭左99果D超極好餸既"白"飯仔, 要改食面呀, 字母粉OR好純淨既冇餸白飯仔 (呵呵, 我真係做少好多~~~) 中間還係下午茶, 湯, 水果, 芝士, 乳酪, 餅乾之類啦~

Poo Poo方面, 都正常, 不過potty training 都係未開始。之前未凍時, 想叫99幫佢train下架, 不過, 9962又話佢一唔著片就搞到四圍都係, 我又冇得話"potty training 係咁架啦, 教多幾次就會識架啦~" 始終果度唔係自己屋企, 拖地果個又唔係我...星期六日我地又通常會出街, 再加上依家天寒地凍, 大條理由著片~ XD 目標係入學前可以自己去到啦~ (希望唔算係個大目標啦~)

瞓覺... 繼續係夜鬼... lei 輪日日要係床度爬返半個鐘先會有小小想瞓既意慾, 有時見我出房拎D野, 就係第一時間爬落床去廳玩 (lei 輪著住個厚身睡袋, 成隻teletubbies 咁好搞笑, 不過影唔到相...) 由於夜晚夜瞓, 又天寒地凍, 所以朝朝都係瞓住換衫去99度... 日頭個nap 就依然係2-3個鐘...

牙仔, 第13同14隻, 一齊蒲頭啦~ 可以出牙有D痛, 所以瑤瑤豬有時係突然指住個咀喊幾下, 要你幫佢吹幾下氹返喎.. (其實都好搞笑 XD)

講野方面, 特多BB話, 聽得明既都多左小小, 開始鐘意跟人口水尾, 會自動將你講既詞語變成疊字講返出來, 所以我地都開始多D同佢講大人話, 等佢早D可以習慣講詞語 (其實, 疊字都好, 以前同熊熊講野都係講疊字架啦~) 有時自己會數數字, 由一數到十, 通常中間會冇左"七" 唔知點解, 又會肯同我一起數字母, 由a數到z。有時數數下, 會唔等我自己講埋之後果2-3個字母, 算係好大既進步, 所以我好满意啦~~~ :p

行為方面, lei輪唔鐘意行路, 係屋企行到冇時停都好, 出左街, 就行10步要你抱一抱, 抱完一輪又行返10步左右又要抱... 真係手都斷... 不過好處係肯坐返bb車啦, 唔會好似以前抱佢上bb車好似打仗咁... 其他動作都靈活左好多, 識得自己搬櫈去第二度拎自己想要既野, 最常見係見到爸B有野食, 就第一時間搬櫈去搶野食 XD

天氣凍左, 病多左, 發現婆婆樓下既兒科幾好, 睇過2次, 每次都食到第二日藥就好得七七八八啦~ 不過瑤瑤豬勁驚個醫生呀, 未入去就喊定先, 好彩醫生度有好多好玩既野分散小豬既注意。食藥方面, 瑤瑤豬叻左好多, 唔駛好似以前咁夾硬來, 出動幾個人先餵到藥。依家會同佢講道理 (食完藥就唔咳咳啦~) 同埋利誘 (大量星星餅), 就可以一個人輕鬆餵完藥啦~ 希望LEI招可以繼續有用啦~~~LEI輪D 病菌咁勁, 所以都的起心肝同小豬去打流感針啦, 同埋不斷提醒自己要幫小豬消毒 (依家成日唔記得 =.=")