住院1.2.3.4.5

繼生小豬時既住院1,2,3後, 要寫返生咩咩既住1.2.3.4.5先...  係醫院住左5晚喎... 真係好耐... 係咩野都比生小豬時耐左... 生之前本來係住一晚, 第二朝就催生, 點知第二日太多人催生/自然生 / 緊急生, 我竟然冇位生喎, 於是第二日係醫院無所事事, 同人吹下水, 睇電視由朝早7點睇到夜晚11點... 第三日係戲肉, 生完咩咩差唔多夜晚11點先返到產後房, 又再開始我既牛牛生活...

雖然係第二胎, 但初初開始餵母乳依然係苦差... 我依然勁快咁俾咩咩咬損左... 依然係不停咁俾咩咩啜啜啜, 都啜唔飽...  唔同既係, 咩咩好快有poo poo, 但好耐好耐先有vv喎, 而且今次唔知係咪因為醫院努力推廣母乳, 竟然唔俾我補奶粉喎... 所以咩咩做左房入面最嘈既果個B, 嘈到最後一日有個姑娘笑笑口咁同咩咩講, 我認得你把聲喎, 做咩野又喊呀 (我心諗, 肚餓咪喊lor...)結果, 咩咩出院既時候, 收水收左差唔多10%, 跌穿3KG...

雖然係第二胎, 但我真係咩野都唔記得晒...好雞手鴨腳咁幫咩咩換片, NB 對我來講真係好耐之前既事, 而且臍帶夾又係度, 結果一開始既2-3條片片都係漏濕左架... (真係失禮晒...) 於是又要雞手鴨腳咁幫咩咩換衫

原本順產住3日2夜就可以走啦, 但係咩咩出世時, 個頭上有個水瘤 (仲好大下), 醫生姑娘都同我講話個瘤會慢慢吸收返, 所以我一直都冇擔心過, 直到臨出院時, 個兒科醫生話唔出得院, 要再觀察多一日, 睇下個瘤有冇變大... 果下, 我係度諗, 原來醫生唔係一直都有留意架... 原來有機會變大架...  個心即刻驚左... 好啦, 留多一日就一日啦... 好彩之後又冇變大...

係醫院留多一日, 個黃又再升左... 再次臨出院時, 個黃已經升到閘晒界 (之前果幾日都一直係合格架, 不過我就望住咩咩越來越黃), 然後要抽血睇下駛唔駛去兒科病房照燈, 如果要既話, 咩咩就要自己留係醫院啦...咩咩抽完血, 等份report 等左好耐, 終於有姑娘理我時, 她話... 頭先抽血抽得唔夠多, 驗唔到, 所以要再抽過.... (即刻想爆粗...) 可憐既咩咩於是又要捱多一針... 最後都唔駛照燈可以出院啦... 不過醫生說同我講, 由於個水瘤入面全部都係血水, 吸收左之後會加重D黃, 所以要小心睇住... (又驚過...) 出院後果日都仲係紅日, 要初四先可以打去健康院...

雖然樣樣都好似有小小阻滯, 但都係好小事, 可能係第二胎, 我自己既心態比較好, 知道樣樣都會慢慢好起來, 唔駛太緊張  (但第一次出唔院果下都係有D唔開心架)

終於可以出院啦... 小豬見到咩咩好開心呀... XD

(下一篇, 繼續係有D阻滯既坐月生活)

4歲快樂~

望住D小朋友大, 就會覺得時光飛逝... 4年時間真係眨眼就過啦...

四歲既小豬已經由個BB樣變成左小朋友樣lu (要睇返D相先記得小豬之前真的好BB呀)

我最可愛既小豬

雖然今年媽媽俾唔到太多時間你, 但做左家姐既你真係表現得好好呀...

希望你可以繼續開開心心, 健健康康咁享受你既童年生活 (最好乖D, 唔好睇咁多電視同i Pad)

繼續做個鍚妹妹既好家姐...

生日快樂呀~~

一隻咩咩既誕生

隔左咁耐, 終於覺得應該寫低下生既過程 (其實生小豬時係冇寫架, 可能覺得冇咩野寫掛 :就P)

咩咩既預産期係一月尾, 雖然距離立春好近, 但個個都話第二胎會早D架, 所以一直以為咩咩係屬羊, 點知佢應該覺得媽咪既肚實在太舒服, 整極都唔肯出來, 直到催生既日子, 先飲埋茶再入院... 可能臨近新年又係星期五, 所以被安排催生果日, 姑娘話冇位俾我生喎, 所以又向遲多一日, 最後咩咩係我肚入面玩足41週先三催四請咁出來, 住得仲耐過小豬呀 (小豬係40週6日)

講返催生, 真係好好好恐怖呀... 我好天真咁以為第二胎會快D, 2-3個鐘應該搞掟, 點知...
由10點10分開始落藥, 一開始都冇野, 老公1點鐘來探我時, 仲有講有笑... (冋我一齊催生既另一個媽媽1點幾就已經生得...)去到2點幾開始來料, 4點幾時已經勁痛, 老公被金call左入來幫我按摩 (但其實冇咩野用:P), 果時醫生來check, 話子宮頸短左同埋薄左 (即係未開)... 我心諗唔係掛, 我已經覺得勁痛啦... 痛過上次果3度多多聲... 好辛苦咁捱到 6點, 痛到C咁等醫生再check... 3度... OMG...簡直想爆粗咁滯...  於是我係痛既時候後悔點解要順產唔開刀, 唔痛既時候就不斷同姑娘講要開刀... 又好彩地遇到個幾好既姑娘, 仲會哄下我叫我唔好扭計 (聽講之前果生既人, 只係痛既時候叫出聲都被醫生鬧...) 之後又過左段時間, 突然話可以入產房喎 (精神為之一振)

入到產房, 終於有得聞笑氣啦, 令我士氣大增... 由於已經痾唔到VV啦, 姑娘要幫我放尿... 再之後姑娘又話有先前部隊阻住左咩咩, 要我自已搞定佢... (嘿嘿... 生之前都想搞定佢架,不過估唔到會阻住咩咩... 嘿嘿...) 係我努力緊既時候突然覺得有舊好大好大既野... 初時仲以為係唔係太多日冇去, 所以舊先前部隊太大, 唯有試下啦... 突然諗到, 會唔會問下姑娘先... 於是姑娘又幫我望下... 一望之下, 姑娘即刻叫我hold 住, 原來已經係咩咩既頭仔啦... 姑娘即刻將床變形, 再叫我出力... 用力push左一下, 諗住抖抖時, 姑娘話唔好抖啦 個頭仔已經出左來啦, 成功在望啦, 於是再用力... 然後就聽到咩咩好大聲咁喊啦... (老公話佢喊得大聲過小豬好多), 咩咩仲一手拎住姑娘條毛巾唔放.... 終於完成啦... 由落藥開始計... 又係十個鐘左右... (又話第二胎會快D既....)

今次醫院新增左成個鐘既親子時間, 要係產房度攬住新生兒成個鐘... 冇咩野做, 就餵下奶啦... 再之後就入產後房啦... 原來小豬同四大長老一齊係出面等左成晚, 可惜唔可以停低影張相, 小豬又入唔到病房... 小豬見到咩咩都好興奮, 不斷話咩咩好cute... 係病房settle 後已經係夜晚11點啦... 成日都只係食左早餐, 連水都冇得飲, 點知一飲水食野就嘔.... (我估應該係之前果隻止痛針既副作用... 於是只可以好慢好慢咁飲水同食餅 ... ) 之後我既牛牛生活正式開始啦... 不過第一晚我落唔到床, 又勁攰, 所以每次餵完奶就拜托姑娘幫我睇住咩咩 (第二胎真係唔同D架, 小豬既時候真係完全唔想交俾姑娘照顧...)

最後要記低既趣事一件... 好耐之前, 當仲未生小豬前, 我四圍搵下D blog 睇下人地既生仔過程, 最記得既係有人話年三十晚, 佢一個人係張床典緊既時候, D姑娘就係隔離討論緊陣間既團年飯食咩野...  結果輪到我既時候, 姑娘就討論緊係年宵買左個識行既恐龍波波俾個仔... (我當時幾想搭嘴話我買左個識行既紫色大象呀... XD)
由於成個過程只係產房先可以聞笑氣, 所以今次生B成個過程都好清醒, 就算係臨生之前, 唔痛既時候都仲可以答到姑娘既問題...

咩咩既玉照一張... 比小豬白D, 不過少好多頭髮呀... 

溜冰初體驗

小豬細細個既時候, 爺爺就成日帶佢去睇人溜冰, 所以小豬成日都想試下, 而且, 覺得自己會好叻溜冰...佢話溜冰係著住條裙, 然後轉轉轉... XD

星期六, 由於天雨關係, 終於安排老公同小豬一齊去圓方溜冰 (不過, 其實老公都麻麻地識溜架, 而我當然係得個睇字啦 :P)

圓方既溜冰場好多人呀, 不過主要係親子為主, 收費為$1/1分鐘, 租企鵝同海獅係$100 同$150/2個鐘。我地一開始租左企鵝, 小豬著好鞋, 係陸地上行左幾步就差唔多識跑咁滯, 所以好有信心咁入左冰場啦... 點知行唔夠一圈, 老公就帶住小豬同企鵝出返來, 話要換成海獅 (海獅係有得坐架) 結果玩左成個鐘, 小豬基本上都係坐係海獅上, 由老公推住行~ 跟據老公既講法, 小豬雖然好想自己企係度行, 不過完全掌握唔到, 所以落地幾十秒就會放棄坐返上海獅度... 而由於老公麻麻地既技術, 又唔識教小豬... =.="

最後, 由於老公自己著溜冰鞋著得太鬆, 玩左一個鐘後, 竟然隻腳磨甩皮... 第二日又要跑全馬, 所以提早走人... 小豬既朋友仔都玩左2個鐘先走... 不過算啦, 第一次試玩下先啦...

整體來講, 小豬的溜冰初體驗就係咁樣好挫敗咁完成左, 問小豬下次仲玩唔玩, 佢話唔玩喎, 因為她企唔到, 要搵老師來教佢喎... (唔服輸既小豬, 最後總要加返句, 不過, 我識游水架... =.=") 睇來遲下要搵下D溜冰堂俾小豬玩下lu...

依家D小朋友真係好幸褔 (定唔幸褔lei? ) 溜冰呢D活動, 以前都係1X歲同frd 出去玩架, 仲要係玩roller, 依家成個場都係D幾歲既小朋友, 推住個企鵝玩緊, 7-8歲既已經可以自轉啦...

咩咩第一篇

係咩咩就來面世既時候, 又好濃縮咁寫下先...

咩咩... 乳名咩咩, 依家就來38週, 同小豬一樣, 係一個大頭短腳妹 (個頭大左2週, 腳就短左2週... 唉...) 私家度話依家有3.2KG, 不過由於係大頭, 所以實際應該冇咁重, 算係中大碼B... 咩咩極有可能係一隻超細既羊咩咩, 但如果佢同小豬一樣日數出世既話,請會係隻超大馬騮仔, 所以個名到依家仲未confirm 呀...

今次孕咩咩, 可以話辛苦過第一胎 (始終年紀大左=.=") 一直嘔到5個月先開始冇嘔, 但胃口就要到6個月左右先開始好返D。但 D腰酸骨痛, 假宮縮等就早左好多開始。到4個月左右做checking 時, 又懷疑胎盤過低 (果時我成日同咩咩講, 叫佢帶埋自己間屋爬高D XD) 好彩到5個幾月時, 個胎盤升返高啦... 不過除此之外, 其他都算正正常常既...

人哋話第二胎, 係會放肆D架, 呢樣野係完完全全咁體驗係我身上, 除左未夠3個月就走左去旅行外 (因為已經買晒機票, book晒酒店), 5個月時又去多次... 之後又試過單拖小豬去迪迪尼, 海洋公園, 由朝玩到晚.... 總覺得係咩咩出世前, 要放多D時間係小豬度, 所以盡量每個星期六或日都會帶佢出去玩, 直到9個月先開始閉關...
由於頭幾個月狂嘔, 所以食到咩野就食咩野, 因此都冇戒魚生, 蝦, 沙律等 (食海膽仲食得好開心添...), 一開始冇戒, 所以之後都一直冇戒...  反而今次豆漿牛奶都飲少左, 總之就係幾放肆啦...至於胎教... 小豬果時都冇做過咩野, 今次有教小豬做功課呀, 講故事呀... 都算係胎教啦... XD

小豬暫時都好期待就來有個妹妹 (不過,好多人話當咩咩出左世, 小豬就開始發脾四啦... 希望到時可以handle 得到啦), 除左得閒就衝過來鍚下我個肚之外, 有好多野都會預埋妹妹一份, 例如聖誕節, 同學仔家長送禮物俾小朋友, 小豬拎左自己果份後, 仲想幫妹妹都拎一份;  99買野俾小豬, 小豬又會提99要買埋俾妹妹, 又話會教妹妹唱歌同跳舞, 等.... 雖然咩咩出世後, 小豬應該會妒嫉, 但我相信慢慢就會好架啦...

最後希望一切順順利利啦... 最好唔好要我係醫院過年啦... XD