13個月

13個月既瑤瑤豬, 身高體重都冇度 (12個月時, 重20磅, 高77CM左右, 係隻中碼豬) 唔知點解, 係健康院磅重會輕過醫生度咁多 不過算啦, 總之健健康康就OK啦~

食方面
係差唔多1歲既時候轉食奶粉啦, 一開始唔肯食奶粉喎, 係點都唔肯果隻, 一啖都唔肯, 果時既貓貓想盡辦法, 試左唔同既牌子, 又將奶粉溝落D粥仔度, 都唔得, 唯有食下芝士, 食下乳酪, 直到有一日婆婆沖錯奶粉, 6安水只放左2匙奶粉 (正常要放6匙), 小豬竟然肯食4安喎, 真係錯有錯著。就咁樣隔幾日加上匙奶粉, 過左冇耐,小豬就食返正常既濃度啦~ 依家一日3餐奶, 每餐5-6安, 基本上係自己拎住奶樽食架, 不過食食下就冇心機想玩, 就要出手幫下佢 (OR拑住佢)食埋枝奶, 通常都要食剩1安所以沖奶時會沖多安, 等佢食剩 (真係浪費...)
一個2餐粥 (已經好接近軟飯啦), 99依然好好餸, 每餐都有菜有瓜有魚有肉。小豬可以食大半碗至一碗, 不過LEI輪隻豬好鐘意食食下, 伸手將口入面粥拎出來睇一輪, 再放入口 搞到成地都係...未試新野呀, 不過今個月應該會試下牛啦~ 生果方面, 就有新嘗試, 食左橙, 榴槤, 芒果同西瓜。好愛橙, 榴槤都會食2啖, 芒果同西果就會拎出來玩LU... 依家每日食2次生果, 每次半個至1個。另外, 就係得閒會食下面包, 餅乾, 芝士, 湯水, 大人食飯時, 佢就會坐係隔離食下飯呀, 菜心呀, 魚呀... 總之, 小豬醒既時候就不停咁食野啦, 覺得佢仲食得多過貓貓, 但又唔見佢肥返D喎 

Poo Poo 方面
唔知係小豬既腸胃終於開始適應固體食物, 定係因為開始食橙, 今個月既POO POO終於開始正常D啦, 每1-2日就會有一次, 有時1日2次 講多次, 做左媽媽後, 先會覺得便便真係好重要架

做休時間LEI2個月, 小豬除左病病既果個星期外, 其他的生活都係好定時, 朝早8點左右起身飲早餐奶, 然後就送去99度。係99度食小小野, 就去會所/公園玩, 玩1個鐘左右就返屋企, 沖涼食粥瞓覺。 瞓2個幾鐘後, 就起身玩玩玩, 3-4點係下午茶, 飲奶食生果食包, 再玩, 再瞓覺。7點幾起身, 又食粥, 玩一陣, 熊貓就返屋企啦, 大人食飯時, 小豬又坐隔離食下野, 玩下, 然後就返屋企LU。返到屋企, 玩多陣, 就飲瞓覺奶, 然後就瞓覺啦~ 總括來講, 每日既活動就係食, 玩同瞓 (真係好開心呀, 搞到貓貓都好想做返BB呀...)

語言及動作
講野方面, 依然好多BB話, 講得到既依然只得baba 同mama, 有時, 有D 類似 mum mum 同bye bye 既野...
鐘意唱歌, 對住小豬唱歌時, 有時小豬會跟住個節奏配返D BB話歌詞
動作方面, 小豬過左1歲生日之後果日, 就肯俾人扶住行啦, 然後慢慢又肯自己放手行幾步, 再然後係13個月既果日, 小豬已經可以係屋度自己走來走去啦~不過, 唔知點解, 小豬係唔肯俾人拖住行架, 一拖過就變軟皮蛇lu LEI幾日仲識得自己爬櫈呀, 超危險...
除此之外, 手指指(雖然唔係成日咁做), give me five, hands up, 舉手, 拍手, hello, bye bye, 點蟲蟲都識過一輪, 不過唔知點解, LEI輪叫佢做又冇咩野返應LU, 淨係鐘意拍手,係咁拍手
不過, 玩搖控, 手機, 電話就一路都記得架喎, 依家仲識"禁"熄電腦, 開抽濕機, 開冷氣呀... 總之見到搖控就第一時間冲過去啦~

 行行行

 仲係唔多鐘意騎馬馬, 所以最叻係爬返落來
 如果個頭擺正D, 你話幾好LEI...

 

媽咪希望你日日都好開心啦, 快D做隻肥肥白白既小豬啦~
唔識既動作遲早都係識既 (早DD就好啦~)