疑似玫瑰疹?

5月4日
今次貓貓一早較好鬧鐘, 零晨4點起身探熱, 餵藥。結果, 鬧鐘響左, 摸左下小豬, 一D都唔熱喎, 所以就冇餵藥。點知, 到左6點左右, 佢開始EERR啦, 再摸, 又係熱啦啦, 39.4度餵藥, 攬住再瞓過, 到朝早起身時(大概8點多DD), 基本上都退左燒LU。
本來今日要返PG架, 不過, 都係唔好返啦, 對大家都好D。今日既小豬非常之扭計, 又非常之呆喎, 中午果餐粥, 99煲左非常之"清淡"既節瓜肉碎魚肉粥(不斷叫99煲得清淡D, 但佢就覺得貓貓虐待緊佢個寶貝孫, 唔俾野佢食) 結果係食左2啖就唔食啦~之後又唔知係唔係扭瞓覺, 狂喊, 但氹佢瞓又唔瞓喎, 最終要出動揹帶, 帶佢出去行街街, 先瞓左覺 (小豬出世咁耐, 都係第一次要出動揹帶先可以瞓到覺咋)
瞓左2個幾鐘後, 就冇咁扭計, 餵左半碗白粥, 就玩左陣, 但係唔係精靈。平時既小豬係甩繩馬騮, 果日就變左呆豬, 就連夜晚最鐘意係床上碌來碌去, 爬高爬低既活動, 都變左大字型瞓左係度睇下電視, 咬下奶咀。食完奶後, 碌左冇2下就瞓左

5月5日
今日全日冇燒啦~, 但依然係扭計精同呆豬, 今日仲係痴媽B添 雖然媽咪都好鐘意小豬痴住我, 不過, LEI日要返新屋執野, 結果就係狂喊LOR..夜晚幫小豬沖涼時, 見到個背脊花花地, 有D紅色點點, 不過唔多, 都唔誇張。婆婆話係出疹架啦~ 咁貓貓就當係出疹啦, 仲同婆婆講, 都唔係好誇張者, 婆婆話, 醫生係要講得誇張D, 亦可能有D媽媽覺得咁樣已經好勁架啦~
今日全日都冇食退燒藥, 又冇燒啦~
夜晚又係呆呆咁, 1個奶咀, 唔駛5分鐘就瞓左啦~ (但全日其實瞓得好多, 朝早食完早奶後再瞓到11點半。 食完午餐, 玩2玩扭2扭, 再瞓多2個幾鐘, 夜晚唔到11點又瞓左啦~)

5月6日
做媽媽既, 真係矛盾。平時不知幾想佢啦啦聲瞓, 但係LEI幾日佢真係咁樣既時候, 又擔心佢唔知有冇事 所以今日一早, 就打去醫生度, 問下咁樣係咪有事, 不過姑娘話都正常既, 因為發燒同出疹係會攰D喎...
另外, 99話, 小豬冇出疹喎, 返到屋企, 望下佢個背脊又正差唔多冇晒粒粒喎, 得返小小紅.. 然後熊熊SEARCH返玫瑰疹既相, 人地果D真係幾誇張同恐佈喎, 咁小豬星期日既背脊都真係好輕微喎...
咁到底係唔係玫瑰疹呀? 到底係出左疹, 然後退左定係冇出到疹呀?真係R晒頭
如果小豬繼續係扭計精加呆豬, 可能都係又要去探醫生啦~~

唔呆既時候, 都幾精靈架~