開學啦~

上個星期五, 小豬開學啦~ 呢個重要既日子, 我之前都成日想像下, 想像下自己到時會唔會勁唔捨得, 不過到左果日又冇喎... 可能第一日返學, 有家長陪上堂, 小朋友都好似返緊PG咁, 所以大家都算合作 (最坐唔定又唔合作果個應該都要數到小豬啦~ =.=")

著住校服影張相先...

去到校門口, 應公公既要求, 又影多張... 不過好曬下, 所以小豬面冇表情 =.="

到課室又快快手影返張... 之後就上堂啦~

頭果2日只係返一個鐘, 仲要有家長陪同, 感覺就好似返左堂PG咁, 唯一唔同既係, 中間有個vee vee time, 大家排隊去vee vee, 好搞笑, 不過遲D自己返學時, 唔知學校點搞lei...

今朝爸B陪返學, 小豬自己要求, 要自拍一張... 

聽日開始, 就要自己返學... 一個鐘咁多... 返4日, 到再下個星期一就正式返學lu... 都預左會喊, 希望唔好喊太耐啦~

原來小朋友開始返學, 要準備好多野呀...

除左要買鞋買襪之外,仲要準備以下既野

- 印左名同班別既防水label, 方便周圍貼, 要讓小豬帶返去既每一樣野上面都有佢個名, 方便老師唔會拎錯/擺錯

- 印左名既洗手唛, 同上既同一道理, 要燙落每件校服/外套 /褲上, 

- 自製有相既name card, 放係書包度,

- 大保鮮袋, 用來放片片, 更換既衫褲底底同襪

- A4file 一個, 用來keep 返學校既通告同回條

- 毛巾仔N條, 因為學校話要環保, 所以要用毛巾唔用紙巾

- 學生相5張 (返學前2日先通知, 結果第一日交唔到, 要星期一先交)

暫時係咁多, 希望冇漏野啦~

小豬開始返學, 其實我都跟埋一齊返學, 早左好多好多起身, 起身後又要留意下有冇咩野風吹草動, 令幼稚園停學, 再來又要日日幫小豬量體溫(學校要求).... 總覺得自己又去返返學既日子 (希望小豬唔好咁快有功課啦~)

我最親愛既小豬, 開始返學就代表你既人生又向前邁進左一大步啦, 以後你既世界唔單止有屋企人, 仲會有朋友仔同老師, 希望你繼續開心快樂咁過每一天

最後, 好趕咁出街影左學生相...

影得好醜樣呀... 哈哈~

不過唔緊要啦, 學生相係醜樣架啦~ XD