流血事件

琴日, 熊貓屋企發生左流血事件...
事源, 貓貓沖緊涼, 熊熊就係廰陪瑤瑤豬玩。差唔多沖完既時候, 聽到小豬係度喊, 佢隻喊法應該係跌親果隻喊(即係超大聲, 喊一下之後, 就冇聲儲氣喊下一聲, 再大聲D...) 貓貓當然即刻衝出去睇下咩野事...

出到去, 小豬已經喊到眼淚鼻涕一起來啦, 一見到貓貓就爬過來。貓貓抱起佢ho 返, Ops... 見到佢下唇度, 有好多血呀...

原來有隻小豬好頑皮,又唔知自己未識企, 就唔知點解地單腳企喎 (唉, 人地最多係未識行先學跑, LEI隻小豬係未識雙腳企就玩單腳企... ) 一個企唔穩. 就向後跌啦~ 好彩熊熊眼明手快, 一下托住左佢既後腦, 如果唔係仲甘呀...

檢查完一輪, 應該係小豬既下牙咬到上唇入面D牙肉呀, 係咁流血呀... ho左幾ho後, 瑤瑤豬就冇再喊啦, 俾佢飲左D水水後, 就冇事LU, 諗住用紗布幫佢止血, 佢就係度食紗布喎, 唯有伸隻手指入去幫佢止啦, 點知佢以為有野食, 係咁咬貓貓隻手指... 好痛呀... 唯有放棄...點知小豬係度咀郁郁, 好似品嚐緊D血咁

好彩最後都冇事, 又冇影響之後餐奶同埋今日既奶同粥

貓貓知道, 小朋友總要跌下, 流下血先會大既... 唔... 適應中...

每朝瞓醒, 對眼都係朣架, D雙眼皮唔知走左去邊, 好彩收工去接佢時通常都變返靚豬咋...