又面試... take 9 & 10

漫長既PN面試, 接近尾聲, 今個星期六就係最後一個啦~
為左記錄完整, 所以都係繼續寫埋LEI 2間

2月19日in德寶

德寶係將軍澳區都算唔錯,有2間, 我地in 婆婆樓下果間 (好明顯我係分唔到邊間打邊間架... :P) 校舍都幾大,成幢有3層, 婆婆果邊有好多小朋友係去德寶架, 所以婆婆好鐘意LEI間, 幻想第時可以接瑤瑤豬放學...XD
可能我好遲先交表, 所以10月果輪interview冇小豬份

面試當日, 係小豬病病之前果日, 不過見佢又冇野, 所以就照去面試。去到學校, 撞啱下晝班送返學, 可能過左年後開學冇耐, 都幾多小朋友係度勁喊, 然後見到D老師就好快手咁將喊到2行鼻涕既小朋友一個一個咁接入班房, 都幾搞笑... 我估小豬當時唔係好知發生咩野事掛, 所以佢冇咩野反應
原來我地係in 後補出來果D位, 所以一個time slot只係in 一個小朋友。負責interview 既係Mr. Kenji, 係一個好nice, 但只講英文既阿Sir... (Ops,  第一次全英文, 仲要係男人... 小豬對住男人通常都係得個呆樣, 比較鐘意年輕的姐姐... ) 面試內容
1. 同公仔握手, 再指五官 (指到, 但唔肯講... 係屋企, 小豬一日起碼要講10次)
2. 之後, 係生果, 香蕉, 蘋果同提子, 要求講banana , apple 同grape (當然唔肯講, 係屋企都只係識講apple, 另外2款只識講蕉蕉同子子), 然後, 將XX俾媽媽, YY俾老師之類, 又撞到手神, 俾啱晒喎
3. 油顏色,. 俾左個波既空白圖片 同埋3枝唔同色既蠟筆, 要求講顏色 (係屋企識, 出到去唔講)要求用某隻色油個波既其中一格(拎啱老師要求既顏色, 不過當然係亂咁油啦~)再要求, 將唔同既顏色俾返老師, 識...
4. 形狀, 長方型, 圖型, 三角型 (完全唔識)

之後就同家長(即係我)吹左幾句, 說小豬好怕醜, 仲問我係屋企要同佢講下英文, 等小豬唔好驚英文 , 我唯由好面懞咁同老師講, 其實小豬係屋企都成日睇英文電視架, 識講既單詞大部份都係英文, 不過出到來佢又唔肯講喎=.=" 不過, 老師都好好人既安慰我, 話小豬既英文聽力非常之好 (其實成個interview,我都係隔離不斷用中文提水...)

3月3日收到結果, 有國際部既上午班既offer, 不過我地冇留位呀...


2月21日in St. Cat

lei個interview, 我真係要承認自己好怪獸, 到依家都仲有D內疚

當日小豬仲燒緊, 所以餵完藥先出門, 搞到好趕先去到。去到要量體溫先可以入去, 食完退燒藥既小豬, 當然冇問題啦 (量到只有36.2度咋, 證明果D度額頭既槍真係好唔準)
入到去, 先玩左陣玩具, 一張枱6個小朋友 (可能個個家長都知, 面試係果陣已經開始, 所以個個都好俾心機咁同個小朋友玩玩具), 然後就叫名入房lu...

入到房係group interview, 小朋友坐前面, 家長坐後面, 要一邊睇左個B, 一邊填問卷
一個老師講故事, 另一個老師觀察
講故事既老師會叫小朋友輪流講自己既名( 小豬講到), 吹風車(小豬都識吹), 輪住出去拎一樣指定既玩具, 放入指定顏色兜 (小豬拎到隻鴨仔, 第一次放錯兜, 老師講多次個顏色, 就放啱左), 之後叫小朋友起身跟老師一齊行一個圈, 扮游水 (小豬係果組2個肯起身行既小朋友之一, 不過行行下行得快過老師, 但就唔識扮游水),  游完水老師要小朋友講指定既食物名 (小豬果個係餅, 所以佢講到), 最後, 老師送左包餅俾每個小朋友, 小豬拎左之後都有講謝謝
小豬一出課室就話要抱, 當然唔抱得啦, 唯有分散佢注意, 行多陣又想抱... 唯有話爸B俾出面, 行到出去又想抱, 唯左met走貼紙然後抱啦~

對於小豬既表現, 其實我好满意, 不過小豬係gp interview既成績一向都唔好, 所以lei 間連2nd in既機會都冇 (因為gp interview 好多時要大家輪住來做某D task, 小豬冇野做既時候就周圍搞, 好似LEI個interview 咁, 小豬冇野做, 就不斷轉過頭來叫媽咪, 我估係咁樣衰左掛)

今個星期仲有最後2個interview, 而其中一個仲要係正99樓下既學之園, 希望順利完成啦~

面試果2日完全冇影相, 所以放D近照上來先~

LEI排開始俾小豬飲維他奶, 大愛...

某個熱到冇朋友既星期六, 要紥夠4條辮先好D, 不過一陣就俾小豬拆晒lu...

望到定一定, 因為爺爺拎住部電話引佢MA... 都好, 難得影到小豬對眼咁大 XD